1 ¡Kaꞌnu kuu Jitoꞌo!

Na taꞌu na ndetu ñayiu yuꞌu niꞌnu Jitoꞌo,

te junkuaan ndevaꞌa ini tnoꞌo ja tatnuni ya.

2 Te vi kokuu naꞌnu ndikin tatai nuu ñuyiu,

te vi niꞌi ndikin tata ñayiu ndaa javii javaꞌa ia Dios.

3 Te konevaꞌa kuaꞌi jakuika nuu veꞌi,

te siun ni kosaꞌa ndai.

4 Te koo in ñuꞌu ja koyeꞌe niꞌnu maꞌñu sagua ñunee nuu ka oo ñayiu ndaa,

chi kaꞌnu ndevaꞌa ini ia Dios vi ndaꞌu ini ya vi saꞌa ndaa ya.

5 Ñayiu ndaꞌu ini, te jiñaꞌa nui nuu inka ñayiu,

chi kevii kevaꞌi, te jini saꞌa ndai jin ja nevaꞌi.

6 Te yun kuu ja ma kendoo kueꞌe saꞌuin,

te siun ni vi kondakaꞌan ña jin ñayiu ndaa yun.

7 Te ma koyuꞌi nuu ka kaꞌan ñayiu ja koo tnundoꞌo,

chi oo yutnu anui, te kukanu ini Jitoꞌo.

8 Te kukanu ini ja oo yutnu anui, te tu yuꞌi,

guaa ndee na kuni ja vi skunaa ñayiu ka kaꞌan uꞌu ña jin.

9 Te jaꞌndei ja nevaꞌi ja skutaꞌui ñayiu ka kundaꞌu,

te siun ni kosaꞌa ndai, saa te kokuu kaꞌnui, te niꞌi kuaꞌa jayiñuꞌu.

10 Te nuu vi kuni ñayiu kueꞌe yaꞌa,

te vi kiti ini ndevaꞌi, te vi ndakaꞌñi noꞌi,

su ndi joo ndi joo te vi nai,

te suni naa ja ni ka ondioo ini ñayiu kueꞌe ja vi niꞌi.