1 Ni kiukuei ñayiu inka ñuu nuu ñuu ja ni saꞌa jajin ni, vi Dios,

te ni ka saꞌa neꞌe ni ka saꞌa yichi veñuꞌu ii ni, vi ni ka xnani ndiꞌi Jerusalén.

2 Te ni ka xndendoi yiki kuñu tee ni ka ojinokuechi nuu ni,

ja ni ka jaa ña kiti ndagua, vi ni ka jaa ña kiti yuku jin ñayiu maa ni.

3 Te ni ka jati niñi ñayiu Israel ninii Jerusalén na kuinio ndute,

te ni in ñayiu, tu na in ni oo ja tayuꞌu ña jin.

4 Te ka kendoo san jakanoo nuu ñayiu sava ka ñuu ja ka oo yatni jin san,

vi ka jaku ndee ña ñayiu ka oo xiin nuu ka oo san, vi ka saꞌa kuasun ñai.

5 ¿Nasaa ka kiuu kuu ja kokiti ini ni nuu in in san, vi Jitoꞌo san?

¿A vi siun ni kokiti ini ni, na kuinio in ñuꞌu ja kai koko koko?

6 Kokiti ini ni nuu ñayiu sava ka ñuu ja tu ka jini ña jin ni,

vi nuu ka tatnuni rey ja tu ka ndakakuneꞌe ña jin ni.

7 Chi ni ka jaꞌni ña de jin ndikin tata Jacob,

te ni ka xnaa de ñuu ni.

8 Te ma tetniuu ni tnundoꞌo siki in in sein ja jaꞌa yika kuechi ni ka osaꞌa ndi nijaꞌnu san.

Neꞌe ñama ni, te kundaꞌu ini ña ni, chi ja ni ka kuita saꞌun san.

9 Chituu ña ni, vi Dios, chi maa ni kuu ia skaku niꞌnu ña, nagua ja na kokaꞌnu sivi ni.

Skaku niꞌnu ña ni nagua ja na koo jayiñuꞌu nuu ni,

te kuakaꞌnu ini ni jin yika kuechi ka saꞌa san.

10 Chi kana saa vi kachi ñayiu sava ka ñuu: “¿Ndenu oo tu Dios ñayiu yaꞌa?”

Te kuandetu ni na vi kuni san naxa ndaxtenaa ni ñayiu ni ka jaꞌni ña jin tee ni ka ojinokuechi nuu ni,

nagua ja suni na vi kuni ñayiu tu ka jini ña jin ni.

11 Te konini ni ja ka kana ndaꞌu ñayiu ka ndesi vekaa,

te jin ja jakaꞌnu ni skaku niꞌnu ni ñayiu ka oo ja vi kui.

12 Te ndajioneꞌe ni uja jakueꞌe siki ñayiu sava ka ñuu ja ka oo yatni jin san,

nagua ni ka takanoo ñai jin ni, vi Jitoꞌo san.

13 Te sein, chi ñayiu ñuu maa ni ka kuu san,

vi ka kuu san na kuinio ndikachi ja ka ñuꞌu ti nuu ite kuikuii ni,

te siun ni vi kosaꞌa kaꞌnu ña san,

te nikuii nikani vi kokata san yaa ja ka saꞌa kaꞌnu ña san.