1 Ni kana jaa san nuu ia Dios, ni kana jaa san nuu ya,

nagua ja na konini ya tnoꞌo ja jikantaꞌu san nuu ya.

2 Kiuu ja kusuchi ini san, te ndanduku san Jitoꞌo,

te ni ja tu jinkuiin san ja kaneꞌe san ndaꞌa san nuu ndakuatu san tnoꞌo jakuaa,

su tu yaꞌa ini anu san ja ndusii ini san.

3 Te nuu ndakaꞌan san ia Dios, te tnana ndaꞌu san,

te ndakani ini san tniuu saꞌa ya, te kuita anu san.

4 Te tu jandetu ni ja kusun san, vi Jitoꞌo san,

te vini ja tu jini san nagua saꞌa san, te ni ja tu kuu ja kaꞌan san.

5 Ndakaꞌan san ndee kiuu xtnañuꞌu

vi nagua ni kuu ndee jananaꞌa yun.

6 Te ndakaꞌan san yaa ja ni ojita san tnoꞌo jakuaa,

te ndakani ini san jin anu san, te kachi san:

7 “¿A vi in jichi ni, ni skexiko ña Jitoꞌo,

te ma kaꞌan ndaꞌu kaꞌan kee ka ña ya jion?

8 ¿A vi ma kundaꞌu saꞌun ka ini ña ya jion?

¿A vi nikuii nikani ja ni ndiꞌi tnoꞌo ni kee yuꞌu ya?

9 ¿A ni ndunaa ini ia Dios ja kundaꞌu ini ña ya jion?

¿A kiti ini ndevaꞌa ya ja vini ja tu kaꞌan ndaꞌu kaꞌan kee ka ña ya?”

10 Te ni kachi san: “Yaꞌa kuu ja kusuchi ka inio,

chi masu inuu ka saꞌa ia oo ndee sukun tniuu naꞌnu jin nagua ni osaꞌa ya ndee ama ka”.

11 Kondakaꞌan san tniuu naꞌnu ni saꞌa Jitoꞌo,

te kondakaꞌan san javii javaꞌa ni saꞌa ya ndee ja ni kuu nanaꞌa yun.

12 Te kondakaꞌan san ndiꞌi tniuu naꞌnu ni saꞌa ni, vi Dios,

te kokaꞌan san tniuu vii ni saꞌa ni.

13 Te ichi vii kuu ichi ni, vi Dios.

Te tu na inka chuꞌchi kaꞌnu ka saa maa ni.

14 Chi maa ni kuu ia Dios ja saꞌa ni tniuu vii tniuu vaꞌa,

te ni xneꞌe ni jakaꞌnu ni nuu ñayiu taka ñuu.

15 Te jin jandakui ni, ni ndatau ni ñayiu ñuu ni,

ja ka kui ndikin tata Jacob vi seꞌe de José.

16 Nuu ni jini ña ndute mar jin ni, vi Dios, te ni yuꞌu de,

te vi ni kisi kaꞌa ndute mar ja ni yuꞌu.

17 Te ni kuun sau ndee nuu viko,

te ni kaꞌndi andivi, vi ni kuun tajan.

18 Te vi jiso kuiti kaꞌndi saꞌa ni nuu yiꞌi tikacha andivi,

te nii kuiti ñuyiu yeꞌe ja kuun tajan, te ni kisi ñuꞌu ja ni tnaa.

19 Te ni june ni ichi nuu ndute mar, vi ni jaꞌnde ni ndute mar,

su tu na in ni nukuꞌun ndenu naꞌa siꞌin ni.

20 Te ni ondeka ni ñayiu ñuu ni ja ni ka ojikai na kuinio ndikachi,

jin maꞌñu sagua Moisés vi Aarón.