1 Maa Jitoꞌo tavaꞌa ña jin san, te tu jini san nau ja ka kaꞌan ñayiu nuu san:

“Kunu ni kuaꞌan ni ndee yuku yun, tayuꞌu nuu ni na kuinio tisala”.

2 Chi kondiaꞌa ni ñayiu kueꞌe yaꞌa, te kuni ni naxa ka chiꞌi yutnu ndugua nuu kuji,

te ka jiokuitai yoꞌo yun ja vi tiuu yuꞌu ñai jin ñayiu ka oo ndaa ini anui.

3 ¿Te naxa vi saꞌa ñayiu ndaa nuu ja na vi ndakoo vaa ñayiu kueꞌe,

te vi saꞌi nagua ka kuini mai, te tu na in kuu ja tatnuni ka?, ka kachi.

4 Su oo maa Jitoꞌo veñuꞌu ii ya, te ndee andivi oo ya tatnuni ya,

te ndiaꞌa guaguaꞌa ya nagua ka saꞌa ñayiu,

te jin nduchi nuu ya skuaꞌa guaguaꞌa ya nagua ka saꞌa ñayiu yun.

5 Te jito tnuni ña Jitoꞌo jin ñayiu ndaa,

te skexiko ya ñayiu kueꞌe vi ñayiu inu niꞌi ini.

6 Te skuun ya tikayi kai koko koko vi ñuꞌu jin azufre,

vi tetniuu ya tachi niꞌi ndevaꞌa ja kuu in tnundoꞌo ndevaꞌa ja vi tnaꞌa ñayiu kueꞌe yun.

7 Chi ia ndaa kuu Jitoꞌo, te kutoo ya ñayiu ka saꞌa ndaa,

te vi kuni ña ñayiu ndaa jin ya.