1 Te vitna, vi ñani vi kuaꞌa, vi kokusii ini ni nuu Jitoꞌo Jesukristu. Ja maa san, chi tu tunini san ja ndajiokuiin san tee tuku san tnoꞌo ja ja ni tee san, chi tnoꞌo ja ka kukanu ini maa ni kuu. 2 Te vi koto ni maa ni jin tee ni kiukuei neꞌu maa ni ja ka saꞌa de tniuu kueꞌe ja ka kuu de na kuinio tiꞌina. Te ka kaxtnoꞌo de ja chitnuni teyii nuu yiki kuñu de nagua ja vi koo guaꞌa de nuu ia Dios. 3 Chi mao ka kuu ñayiu ja ka yitnuni ndija ini anuo, chi ka jinokuechio nuu ia Dios jin maꞌñu sagua Espíritu ya, te ka kusii inio ja ka oo jin Jesukristu. Te tu ka kandijao ja vi koo guaꞌo nuu ia Dios jin naxa ka oo jin yiki kuñuo. 4 Chi visi suni maa san, chi kuu kandija san ja oo guaꞌa san nuu ia Dios jin yiki kuñu maa san. Te nuu ja ndee in ñayiu ndakani ini ja oo guaꞌi nuu ia Dios jin yiki kuñui, te viꞌi ka tu sein. 5 Chi ni ka chitnuni nuu yiki kuñu san nuu una kiuu ja ni kaku san, nagua tatnuni maa Ley, chi tatatnoꞌo ñayiu Israel kuu san, chi ndikin tata maa Benjamín kuu san, chi tee hebreo kuu san, chi yua siꞌi san ka kuu hebreo. Te fariseo ni okuu san, chi ni yinduu san nuu ka skuaꞌa guaguaꞌa naxa kei kaꞌan Ley Moisés. 6 Te vi ja kukuiñu ndevaꞌa san jin ia Dios, yun guaa ni osondikin san ñayiu ka skuaꞌa ja saꞌa san jin in jakueꞌe. Te ni in ñayiu ma kuu kaꞌan kuechi siki san, chi teyii ndaa kuu san ja skunkuu ndaa kuiti san nuu Ley. 7 Su ndiꞌi ja ni ondakani ini san ama ka ja kuu in jaguaꞌa ndevaꞌa nuu ia Dios, te vitna jini san ja tu nagua jiniuꞌu saꞌun ka nuu san ja jaꞌa Kristu. 8 Te ja ndaa ndija ja tu kukanu ini ka san ndiꞌi yun, chi in jaguaꞌa ka kuu ja jini guaguaꞌa san Jitoꞌo san Jesukristu. Te ja jaꞌa maa ya kuu ja tu ndiꞌni ka san ndiꞌi yun, te ndiaꞌa san na kuinio in miꞌi, nagua ja kundee san ja koo san jin Kristu. 9 Te oo san jin ya, su masu ja kuu maa san in tee ndaa nuu ya ja skunkuu san Ley, chi ja kandija san Kristu kuu ja kuu san in tee ndaa nuu ia Dios jin maꞌñu sagua ja kandija san ya. 10 Te kuini san ja kuni guaꞌa ka san Kristu, te koo san jin jakaꞌnu ia Dios ja ni ndaxteku ña jin Kristu. Te suni kuini san tnaꞌa san tnundoꞌo nagua ni ndoꞌo ya, te na koo san nagua ni oo ya nuu ni jiꞌi ya, 11 te ndetu kaꞌnu san ja kenta san ja ndateku san neꞌu ndiyi.

12 Su masu kaꞌan san ja ja ni niꞌi san ndiꞌi ja ni kaꞌan san yaꞌa. Te ni masu ja kuu san tee ndaa ja tu na yika kuechi san, chi suaꞌa nduku ndee san kuaꞌan san guaa ndee na kenta san ja na koo san nagua kuini maa Jesukristu nuu ni nukuꞌun xtnañuꞌu ka ña ya jin san. 13 Ñani, kuaꞌa, kaꞌan maa san ja kuini ka ja kenta san niꞌi san ndiꞌi yaꞌa, su ja saꞌa san kuu ja ndunaa ndija ini san ja ni kendoo ichi yata san, te nduku ndee san ja niꞌi san ja oo ichi kuaꞌon suaꞌa, 14 nagua ja na kenta san ja niꞌi san, in ja skutaꞌu ña ia Dios nuu ni kana ña ya ndee andivi jin maꞌñu sagua Jesukristu.

15 Te yun guaa ndiꞌi yoon ja ka kaꞌon ja ka oo yutnuo jin tnoꞌo ka kandijao, kuini ja inuu vi ndakani inio. Su nuu ja siin ka ndakani ini ni, te suni maa ia Dios na kaxtnoꞌo kaji ya naxa vi jinkuiꞌnu ini ni. 16 Su visi ni saa, te nini kuu ja inuu vi kondikion ja vi saꞌo nagua kaxtnoꞌo ya nuo.

17 Ñani, kuaꞌa, vi saꞌa ni nagua saꞌa maa san, te vi kondiaꞌa ni naxa ka oo sava ka ñayiu ka ndikin taniñu nagua ni ka kutuaꞌa ni nuu san. 18 Chi ja ni kuu kuaꞌa jichi kaꞌan san, te vi jaku san jin tenuu san kaꞌan tuku san vitna, ja ka oo kuaꞌa ñayiu ka skexiko nagua ni saꞌa Jesukristu ja ni jiꞌi ya ja jaꞌo nuu cruz. 19 Te nuu kentakuei ñayiu yun kuu ja vi nai, chi ka chiñuꞌu ñayiu yun ja ndioo ini yiki kuñui, te ka saꞌa teyii mai nuu tniuu ja vi kukanoi, te maa ni ja oo ñuyiu yaꞌa ka ndakani ini. 20 Su yoon, chi ñayiu ñuu andivi ka kuo, te ka ndetu kaꞌnuo ja ndee andivi yun ndii Jitoꞌo Jesukristu, ia skaku niꞌnu ña jion, 21 te ndasama ya yiki kuñu ndaꞌu ja ka nevaꞌo, nagua ja vi nduo nagua vii kaa yiki kuñu maa ya nuu ni ndateku ya. Te jin jakaꞌnu nevaꞌa ya tatnuni ya nuu ndiꞌi yun.