1 Te kiuu yun ni ka kututu kuaꞌa ndevaꞌa ñayiu, te tu saꞌun nagua ka nevaꞌi ja vi kai. Yun te ni ndakana Jesús tee ka skuaꞌa jin ya, te jiñaꞌa ya:

2 ―Kundaꞌu ini san ñayiu yaꞌa, chi ja ni kuu uni kiuu ka oi jion, te tu nagua ka nevaꞌi ja vi kai. 3 Te nuu ja na ndatetniuu ndite san jin ja noꞌokuei veꞌi, te vatuni vi kuitai ichi kuanoꞌokuei, chi savai, chi jika vajikuei ―jiñaꞌa ya.

4 Su ka jiñaꞌa tee ka skuaꞌa jin ya:

―Su ¿ndenu vi niꞌo xtaa ja vi kaa ñayiu kuaꞌa yaꞌa, te tu na veꞌe oo nuu ka oo yaꞌa? ―ka jiñaꞌa de.

5 Te ni jikan tnoꞌo ña ya:

―¿Nasaa xtaa ka nevaꞌa ni?

Te ka jiñaꞌa de:

―Uja.

6 Yun te ni kaꞌan ya jin ñayiu kuaꞌa yun ja ni ka jinkoi nuu ñuꞌu yun, te ni tnii ya ndi uja xtaa yun, te ni ndakuantaꞌu ya nuu ia Dios. Yun te ni jaꞌnde ya, te ni jiñaꞌa ya nuu tee ka skuaꞌa jin ya, nagua ja na vi skaka de nuu ñayiu kuaꞌa yun. Te ni ka skaka de nuu ñayiu yun. 7 Te suni ka nevaꞌa de ndee saa chiaka kueli. Te jikantaꞌu ya, te ni tetniuu ya ja suni na vi skaka de nuu ñayiu yun. 8 Te ni ka jaa ñayiu vi ndee ni ka ndutu chii. Te ni ka ndaxtutu de yuꞌu xtaa ja ni ndoo, te ni ndachitu uja chika. 9 Te tee ja ni ka jaa yun, chi ka kuu vaa ndee kuun mil de. Te ni ndaxtute ña ya ja kuanoꞌokuei. 10 Yun te ni ndekuei ya nuu barco jin tee ka skuaꞌa jin ya, te kuaꞌankuei ya ñuu ja tnii Dalmanuta.

11 Yun te ni jinokuei tee ka kuu fariseo, te ni ka jinkondee de ka tee tnaꞌa de jin Jesús. Te ka kuini de ja vi koto tnuni ña de. Te ni ka jikan de ja na saꞌa ya in tniuu kaꞌnu ja vaji ndee andivi. 12 Te ndandaꞌu ni jaka ini Jesús, te jiñaꞌa ya:

―¿Nau ja ka jikan ñayiu yaꞌa in tniuu kaꞌnu nuu san? Te kaꞌan ndaa san ja ni in tniuu kaꞌnu ma xneꞌe san nuu ñayiu yaꞌa ―jiñaꞌa ya.

13 Saa te ni xndoo ña ya, te ni ndee ya nuu barco, te kuaꞌan ya inka jioo yuꞌu ndute mar.

14 Te ni ka naa ini tee ka skuaꞌa jin ya ja vi kindaꞌa de xtaa vixin, chi invaa ni xtaa vixin inee nuu barco yun kuaꞌankuei de jin ya. 15 Te ni xtaku Jesús nuu de, te jiñaꞌa ya:

―Vi koto vaꞌa ni maa ni jin levadura tee ka kuu fariseo vi levadura Herodes ―jiñaꞌa ya.

16 Te ni ka jinkondee de ka ndatnoꞌo tnaꞌa de, te ka kachi de:

―Yun kaꞌan de, chi chia tu ni ka yindaꞌo xtaa vixin.

17 Te ni jini Jesús ja siun ka ndatnoꞌo de, te jiñaꞌa ya:

―¿Nau ja ka kaꞌan ni ja tu na xtaa vixin ka nee ni? ¿A vi chiaꞌan ka vi jinkuiꞌnu ini ni ja vi kuni ni tnoꞌo kaꞌan san? ¡Nase ndeꞌe inu ndee ini anu ni! 18 ¿A vi ka oo nduchi nuu ni, te tu ka ndiaꞌa ni? Te ka oo soꞌo ni, te tu ka nini ni. Te ¿a tu ka naꞌa ni 19 na ni jaꞌnde san uꞌun xtaa ja ni ka jaa uꞌun mil teyii? Te ¿nasaa chika ni ka ndachitu yuꞌu xtaa ja ni ka ndaxtutu ni? ―jiñaꞌa ya.

―Uxi uu ―ka jiñaꞌa de.

20 ―Te na ni jaꞌnde san uja xtaa ja ni ka jaa kuun mil ñayiu, ¿nasaa chika chitu yuꞌu xtaa ni ka ndaxtutu ni? ―jiñaꞌa ya.

―Uja ―ka jiñaꞌa de.

21 Te jiñaꞌa ya:

―Te ¿nau ja vini saa, te tu ka jinkuiꞌnu ini ni? ―jiñaꞌa ya.

22 Yun te ni kentakuei ya ñuu Betsaida. Te ni ka jinsiaꞌa ñayiu in tee kuꞌu nuu, te ni ka jikantaꞌui nuu ya ja na tetuu ya ndaꞌa ya nuu de ja na nduvaꞌa de. 23 Yun te ni tnii ya ndaꞌa tee kuꞌu nuu yun, te ni keneꞌe ña ya ndee yuꞌu ñuu yun. Te ni skanuu ya teyuꞌu ya nduchi nuu de, te ni tetuu ya ndaꞌa ya. Te ni jikan tnoꞌo ña ya a kuu ndiaꞌa de joo. 24 Te ni ndiaꞌa de, te jiñaꞌa de:

―Jini san ñayiu ja na ka ndaa yutnu ka ndai, su jini san ja ka jikai ―jiñaꞌa de.

25 Yun te ni tetuu tuku ya ndaꞌa ya nduchi nuu de, te ni ndakondiaꞌa guaꞌa de, te ni nduvaꞌa nduchi nuu de, chi ni jini kaji de ndiꞌi ja oo ndee jika. 26 Te ni ndatetniuu ña ya kuanoꞌo de veꞌe de, te jiñaꞌa ya:

―Ma noꞌo ni ñuu luluu yun, te ni ma kokaꞌan saꞌun ni nuu ni in ñayiu ñuu yun ―jiñaꞌa ya.

27 Yun te kuaꞌankuei Jesús jin tee ka skuaꞌa jin ya taka ñuu ka oo Cesarea Filipo. Te ichi yun ni jikan tnoꞌo ya tee ka skuaꞌa jin ya, te jiñaꞌa ya:

―¿Naxa ka kaꞌan ñayiu na in kuu san?

28 Te ka jiñaꞌa de:

―Sava ñayiu ka kaꞌan ja Juan tee ni oskuandute, te savai chi Elías, te savai ka kaꞌan ja ndee in tee ni ondakani tnoꞌo ia Dios ndee janaꞌa kuu ni ―ka jiñaꞌa de.

29 Yun te jiñaꞌa ya:

―Te maa ni, ¿naxa ka kaꞌan ni na in kuu san?

Te jiñaꞌa Pedro:

―Maa ni kuu Kristu, ia ni tetniuu Dios ―jiñaꞌa de.

30 Su ni tatnuni Jesús ja ma vi kokaꞌan de tnoꞌo yaꞌa nuu ni in ñayiu.

31 Yun te jinkondee ya kaxtnoꞌo ya nuu tee ka skuaꞌa jin ya ja maa ya ja kuu ya Seꞌe Teyii, chi nini kuu ja tnaꞌa ya kuaꞌa ndevaꞌa tnundoꞌo. Te vi skexiko ña tee nijaꞌnu vi sutu ka kuu nijaꞌnu vi tee ka kaxtnoꞌo Ley Moisés, te vi kaꞌni ña de jin ya, su nuu uni kiuu te ndateku ya. 32 Te vi ni kaꞌan kaji kuiti ya tnoꞌo yaꞌa. Yun te ni keneꞌe siin ña Pedro, te ni jinkondee de kuxeen de nuu ya. 33 Su ni ndajiokuiin Jesús, te ni ndakoto ya nuu ka oo tee ka skuaꞌa jin ya, te ni kuxeen ya nuu Pedro, te jiñaꞌa ya:

―Kujioo ni nuu san, vi Tachi, chi tu ndakani ini ni nagua ndakani ini ia Dios, chi nagua ka ndakani ini ñayiu ñuyiu yaꞌa ndakani ini ni ―jiñaꞌa ya.

34 Yun te ni ndakana ya tee ka skuaꞌa jin ya jin sava ka ñayiu, te jiñaꞌa ya:

―Nuu na in kuini ja kondikin ña jin san, te na skunai mai, te kuiso siki cruz visi na kui, te na kondikin ñai jin san. 35 Chi na in kaꞌan ja skaku niꞌnui mai, te junai. Te na in skunai mai ja jaꞌa sein vi ja jaꞌa tnoꞌo vaꞌa ia Dios, te kaku niꞌnui. 36 Chi ¿nagua niꞌi ñayiu visi na kundei niꞌi ndiꞌi ja oo ñuyiu yaꞌa konevaꞌi, te skunai mai? 37 Chi ma niꞌi ñayiu nagua tniuyaꞌui nuu ia Dios ja skaku niꞌnui mai. 38 Chi na in kukanoo jin sein vi jin tnoꞌo san nuu ñayiu ñuyiu yaꞌa ja inu kueꞌi vi ka saꞌi yika kuechi, te maa san ja kuu san Seꞌe Teyii, suni kukanoo san jin, nuu ndii san jin jayeꞌe tajan maa tata san jin ia ja ka jinokuechi nuu ya ―jiñaꞌa ya.