10
1 Su Kesugu'an ni Moses maa' dlingaw para ri seng melengas ne ngag betang neng mateng pa. Su dlingaw gena' pa melengas tendeng ay suk sama ne ngad dulang kanunay dinulang kada taun. Aas pegendun ma se Kesugu'an sek pektileng pa se nga getaw neng mekpegaud ri sed Diwata pebiyan run nini ne ngad dulang? 2 Bu' metuud neng milimpiyuwan se ngak sala' su ngang miksimba ri sed Diwata, ndi' na siya nilan betiken neng mikesala' ilan bu' nda'irun na siyaik pengilak neg baalen pa. 3 Ma'ad su ngak pekpengilak ketu, mikpe'ena'ena' pa tumu' se nga getaw se kada taun se ngak sala' nilan. 4 Tendeng ay sud dugu' ne ngak turu neg baka bu' se nga kanding ned dinulang nilan ndi' gaid mekaawa' se ngak sala' nilan.
5 ✡ 10.5-7: Ngak Salmo 40.6-8 (LXX). Aas sek peddini ni Christ seg benwa, miktalu' giin tu sed Diwata,
“Nda' mu kina'enlanay su ngad dulang bu' ngag halad,
tumu' binegayan mau dlawas.
6 Nda'a pedleliyagay se ngang menanap nek tibuuk sinereng tu sek pengilakan
awas se ngad dulang sek pegawa' ri se ngak sala'.
7 Rayun miktalu'u, ‘Enlengay mu, miriniu,
sek pektuman se keliyag mu, Uu Diwata,
maa' seng misulat metendeng ri senaan ri se dlinukut neg besaan.’ ”
8 Bekna miktalu' giin, “Nda' mu kina'enlanay awas liyagay su ngad dulang bu' ngag halad bu' ngak petubu'en nek tibuuk sinereng ri sek pengilakan bu' su ngag halad para pegawa' tu se ngak sala'.” Tinalu'en nini isan su dlaun ne ngad dulang dinulang sumala' ri se Kesugu'an. 9 Rayun, miktalu' giin, “Na, miriniu arun pektuman se keliyag mu.” Pebiyan run nini, inawa' na ned Diwata sud daan ne ngak peddulang arun metelesan ri sek peddulang ni Christ. 10 Tendeng ay tinuman ni Jesus Christ su keliyag ned Diwata, dlaunan ta milimpiyuwan na buwat ri se ngak sala' ta pebiyan sek peddulangen ri se gegulingenen ne dlawas minsan ra bu' nda' na esebay.
11 ✡ 10.11 Exodo 29.38. Su kada nek pari' neng megbaal seg baalenen kada gendaw bu' sigi meddulang seng maa' ra run ne ngad dulang ne ndi' gaid mekaawa' ri se ngak sala' ne nga getaw. 12 ✡ 10.12-13 Ngak Salmo 110.1. Ma'ad ri se dlain neg bahin, si Christ dinulangeni gegulingenen para ri se ngak sala' minsan ra bu' nda' na esebay, bu' migingkud rayun giin ritu sed dapit dlintu* 10.12 dapit dlintu: Enlengay niyu suk talu' ri se 1.3 ned Diwata. 13 Gatad sek panahun keni, migelat giin ritu tampan mperiyalem ned Diwata su nga kuntranen ri se ga'emen. 14 Ay tendeng sek salabuuk dulang, se genda'i gekteben, bineluyen su nga getaw buwat ri se ngak sala' bu' inuwiten ilan tu sed Diwata.
15 Bu' su Gispiritu Santu mismu mikpemetuud ri senita ay miktalu' su Ginu'u,
16 ✡ 10.16: Jeremias 31.33. “Giin nini su keligenan neg baalen'u duma ri senilan
se nga gendaw neng mateng, miktalu' sud Diwata:
Sulaten'u su ngag bala'ud'u,
bu' betangen'u ini ri se ngak pusung bu' gena'ena' nilan.”
17 ✡ 10.17: Jeremias 31.34. Bu' rayun miktalu' giin, “Ndi'u na gaid pegena'ena'en su ngak sala' nilan bu' sung melaat ne ngak terbahu nilan.”
18 Na, seng mipasaylu na su ngak sala', ndi' na kina'enlan mengilak pa gusay neg halad.
Mekpegaud Ita sed Diwata
19 Aas nga kepeteran, duun nai kegewasan ta nek sumeled ritu se Dlabi neg Bala'an ne Dlugar tendeng sed dugu'† 10.19 dugu': awas kemetain ni Jesus. 20 Pinukaan para senita suk sala neg begu ned dalan neng megunut tu se ketubu' ne dlumahus tu se kurtina, ne senita pa, pebiyan ri se dlawasen. 21 Bu' tendeng ay duuni dlabaw geseg nek Pari' ta neng miguwit ri seg balay ned Diwata, 22 ✡ 10.22: Levitico 8.30; Ezekiel 36.25. mekpegaud ita tu sed Diwata duma seng metinuuren ne gena'ena' bu' meligen nek pektu'u. Milimpiyuwan na su nga gena'ena' ta buwat seng melaat ne kunsinsiya bu' mi'ugasan rema ri se dlimpiyu nek tubig su nga dlawas ta. 23 Mekpebilin ita neng meligen ri sek tinalu' ta neng mekegbegay nek pedderama bu' ndi' menduwa'ruwa', ay mekesalig ita ri sed Diwata nek tumanenen suk sinaaren. 24 Bu' pegena'ena'en ta reli' pegendunen ta run peginebangay sek pekpe'ita' sek petail bu' sek pegbaal ne gempiya. 25 Ndi' ta gaid peleliyan sung mibetasan ta nek peksalabuuk, maa' neg binaal ned duma. Bu' ndi', meddinesigay ita, labi na gaid numuun neng me'ita' niyu neng megaud na su Gendaw sek pekpuli' ne Ginu'u.
26 Ay bu' mekpeddayun ita gusay sek pekpekesala', dluwat ita mekesuun se kemetuuran, nda'irun naig halad ne kina'enlan ilaken arun mpasaylu su ngak sala' ta. 27 ✡ 10.27: Isaias 26.11 (LXX). Tumu' su getaw neng mikpekesala' mekperateng ra run seng mekelelisang nek pegukum bu' minit gupiya ne gapuy neng mekepedlaat tu se kumuntra ri sed Diwata. 28 ✡ 10.28: Deuteronomio 17.6; 19.15. Su getaw ne gendi' mektuman ri se Kesugu'an ni Moses petain se genda'iruni dlelaat bu' mpemetuuran sed duwa' awas melaun ne getaw ne giin mikesala'. 29 ✡ 10.29: Exodo 24.8. Gendun kebegat suk silut, sek pegena'ena' niyu, su gembaya' tu se getaw neng memura tu seg Bata' ned Diwata? tu se getaw ne nda' pegbegay ne dlaga' sed dugu' neng mikpeligen se keligenan ned Diwata bu' midlimpiyu ri senilan buwat sek sala'? tu se getaw nek tumampela' tu se Gispiritu Santu neng melilelaaten? 30 ✡ 10.30: a Deuteronomio 32.35-36. Ay mi'ilala ta suk sala neng miktalu', “Gaku' suk sumuli' bu' pebiyaren'u ilan.” Bu' mi'ilala ta rema sung miktalu', “Gaku' su Ginu'u, suk sala neng megukum tu se nga getawan'u.”
31 Bu' mekeendekendek gaid bu' sud Diwata neng miktetubu' giining meksilut.
32 Pegena'ena' niyu sung mihitabu' ri seniyu nud diin. Se nga gendaw ketu, dluwat amu relaagay ned Diwata, migantus amu seng melaun ne ngag betang ma'ad nda' amu pekperaag riin sek panahun se keliseran. 33 Taangdun, pingumpiid amu bu' piddaagdaag amu ri seng metungenga'an ne nga getaw; bu' se dlain nek panahun, isan gena' gamu sug binaalan run nini, miruma amu se ngak pegantus nilan. 34 Mikebahin amu se ngak pegantus se ngak pimerisu. Se ginawi' su dlaun ne ngag betang niyu, pidleliyag amu ned dinumawat isan neng mirela'an amu, ay misuunan niyu ned duun paing mi'angken niyu neng melengas kampuun ne ngag betang neng mekpayat se genda'i gekteben. 35 Aas ndi' niyu dela'ay suk peksalig niyu ay duuni gembagel ne ganti run nini. 36 Kina'enlan mengme'inentusen amu arun baalen niyu su keliyag ned Diwata bu' merawat niyu suk sinaaren. 37 ✡ 10.37-38: Habakuk 2.3-4 (LXX). Ay sumala' sek tinalu' se Kesulatan,
“Ay se gendi' na mekpayat,
suk sala neng merini mateng;
bu' ndi' na giin medlangan.
38 Ma'ad su getawan'u neng metareng medleketubu' pebiyan sek pektu'u nilan,
bu' ta'ing megawa' ri sek pektu'u nilan
ndi'u pedleliyagen ri senilan.”
39 Gena' ita neng maa' ne nga getaw neng migawa' ri sek pektu'u bu' mbuwag ri sed Diwata se genda'i gekteben. Tumu' duunik pektu'u ta bu' miluwas ita.
✡10:5 10.5-7: Ngak Salmo 40.6-8 (LXX).
✡10:11 10.11 Exodo 29.38.
✡10:12 10.12-13 Ngak Salmo 110.1.
*10:12 10.12 dapit dlintu: Enlengay niyu suk talu' ri se 1.3
✡10:16 10.16: Jeremias 31.33.
✡10:17 10.17: Jeremias 31.34.
†10:19 10.19 dugu': awas kemetain
✡10:22 10.22: Levitico 8.30; Ezekiel 36.25.
✡10:27 10.27: Isaias 26.11 (LXX).
✡10:28 10.28: Deuteronomio 17.6; 19.15.
✡10:29 10.29: Exodo 24.8.
✡10:30 10.30: a Deuteronomio 32.35-36.
✡10:37 10.37-38: Habakuk 2.3-4 (LXX).