Su Guna nek Sulat ni
San Juan
Pesi'una
Su Guna nek Sulat ni Juan duunid duwa' ne gembagel nek tuyu'en: suk pegulikseg ri se ngang membebasaan sek pedleketubu' neng misalabuuk duma sed Diwata bu' seg Bata'en, ne si Jesus Christ, bu' sek pekpenegul ri senilan ne ndi' meksunud sek sayep nek penendu'an neng migbengkag sek peksalabuuk keni duma sed Diwata. Keni nek penendu'an pisingkal sek pektu'u ne su kelaatan giin su kelebu'an sek pedleketubu' ta seg benwa keni, bu' si Jesus, sug Bata' ned Diwata, gena' gaid mbaal ne getaw neng maa' senita. Su ngang mentetendu' ketu mikpetu'u ne arun meluwas su nga getaw kina'enlan liyawan nilan su nga kegules se ketubu' seg benwa keni, bu' miktendu' ilan rema ne su keluwasan nda'i dlabeten ri seng metareng nek pedleketubu' awas pekpetail sed duma.
Gisip peksupak sek penendu'an keni, sung menenulat migasuy se kelaru ne si Jesus Christ getaw gaid neng metuud bu' pisabuten tumbay ne su dlaun neng miktu'u riin ni Jesus bu' mikpetail sed Diwata kina'enlan rema neng mekpinetailay ri sek salasala.
Ngang Misulat ri sek Sulat keni
I. Pesi'una 1.1-4
II. Delaag sud Diwata 1.5—2.29
III. Nga Gembata' ned Diwata 3.1-24
IV. Sung Metuud ne Gispiritu bu' sug Balus ne gispiritu 4.1-6
V. Sud Diwata Petail 4.7-21
VI. Su Keddaagan ta Kuntra seg Benwa 5.1-21
1
Suk Talu' neng Megbegay ne Ketubu'
1 Miksulat ami ri seniyu metendeng sek Talu' neng megbegay ne ketubu', ned diin na se genda'irun pai isan landun. Mirengeg ini nami, bu' mi'ita' se ngang mata nami; wa'a, mi'ita' ini nami, bu' mi'ikap se nga gemeg nami. 2 ✡ 1.2: San Juan 1.14. Pirayag na su ketubu' ketu bu' mi'ita' ini nami; aas minintigus ami run nini bu' inasuy nami ri seniyu su ketubu' ne genda'iruni gekteben ned diin se Gama' bu' pirayag na ri senita. 3 Landuning mi'ita' bu' mirengeg nami, pisuun rema nami ri seniyu, arun mesalabuuk amu riin senami bu' riin se Gama' bu' seg Bata'en ne si Jesus Christ. 4 Sinulat ini nami arun telu'an amu, arun su dleliyag ta metileng.
Delaag sud Diwata
5 Na, giin nini sung minsahi neng mirengeg nami buwat seg Bata'en bu' inasuy nami ri seniyu ne sud Diwata delaag bu' riin seniin nda'irun gairi kerelem. 6 Bu' mektalu' ita ned duunik peksalabuuk ta duma seniin, ma'ad midleketubu' ita gusay riin se kerelem, migbalus ita bu' nda' ita pedleketubu' riin se kemetuuran. 7 Ma'ad bu' midleketubu' ita riin se kerelaag maa' ned Diwata neng midleketubu' ri se kerelaag, duun rayunik peksalabuuk suk salasala ri senita, bu' sud dugu' ni Jesus, neg Bata'en, midlimpiyu buwat se kada nek sala' ta.
8 Bu' mektalu' ita ne nda'irunik sala' ta, linimbungan ta su gegulingen ta, bu' nda'iruni kemetuuran riin senita. 9 Ma'ad bu' telu'en ta bu' engkenen ta su ngak sala' ta riin sed Diwata, tumanenen suk saaren bu' baalen landun su ginsaktu tendeng ay pasayluun ita ri se ngak sala' ta bu' limpiyuun ita buwat sek sayep nek pimbaal ta. 10 Bu' mektalu' ita ne nda' ita mekesala', binaal ta neg belusen sud Diwata, bu' suk talu'en nda' riin senita.