1  ✡ 3.1: Su Ngak Pimbaal 17.15. Aas se gendi' nami me'antusi kegules nami ri seniyu, mikegukum ami neng maneg pa neng mekpebilin ami na ma'ad seg Athens 2 bu' peperiinen nami seniyu si Timoteo. Pated ta giin bu' sementaun nami neng mig'alagad ri sed Diwata pebiyan sek pegwali seng Melengas ne Gesuyen metendeng riin ni Christ. Piperiin nami giin seniyu arun meddasig amu bu' meksiligen suk pektu'u niyu, 3 arun nda'iruni isan sala ri seniyu ne mpareg tendeng se ngak pedlutus keni. Gamu mismu mikesuun ne su ngak pedlutus neng maa' niin keliyag ned Diwata para senita. 4 Ay sed diin ami pa se gupid niyu, minegul ami na daan ne dlutusen ita gaid. Bu' sumala' ri seng misuunan niyu, ne giin gaid ini sung mihitabu'. 5 Aas se gembagel'u ne kegules, piperiin'u si Timoteo arun pektipet bu' mikendun na suk pektu'u niyu ay migulesu neng mitintal amu ni Satanas bu' mbuus ndi' mekpalu su dlaun nek pekhagu' nami.

6  ✡ 3.6: Su Ngak Pimbaal 18.5. Ma'ad nemuun mipuli' na rini si Timoteo bu' mpiya su ginasuyen metendeng sek pektu'u niyu bu' pekpetail. Laungen kanunay amu migena'ena' ri senami bu' gangut niyu ne kumita' ri senami maa' sek pigangut nami ne kumita' ri seniyu. 7 Aas nga kepeteran, isan melauni nga keliseran bu' pegantus nami, middasig ami tendeng sek pektu'u niyu. 8 Ay meksilengas gaid su ketubu' nami bu' mengmeligen amu ri se Ginu'u. 9 Nandaw mekegbegay ami nek pekpesalamat ri sed Diwata ta para seniyu, se dlaun ne nga dleliyag neg binatik nami ri seng metungenga'an ned Diwata tendeng seniyu. 10 Gendaw bu' gebii migampu' ami gaid riin seniin nek peperiinen ami siya riin seniyu arun mbegay nami su dlaun ne kina'enlan sek pedligen ri sek pektu'u niyu.

11 Na, megbegay siya ri senami neg higayun sud Diwata ne Gama' ta bu' su Ginu'u ta ne si Jesus neng mekeriin ami seniyu. 12 Bu' ebangan amu siya ne Ginu'u neng meddugang pa gaid suk pekpetail niyu ri sek salasala ri seniyu bu' se dlaun ne getawan maa' sek pekpetail nami ri seniyu. 13 Seng maa' nini nek pebiyan, ligenen amu ne Ginu'u bu' nda'i gempemura ri seniyu bu' melimpiyu amu ri seng metungenga'an ned Diwata ta bu' Gama' ri se gendaw ne si Jesus ne Ginu'u ta mpuli' duma se dlaun ne nga getaw.