Su Guna nek Sulat ni San Pablo para se ngak taga
Tesalonica
Pesi'una
Suk Tesalonica giin su kapital nek siyudad se nga getaw Roma sek probinsiya seng Macedonia. Mibaal ni Pablo suk simbaan ritu se genda' pa giin peritu sek Filipos. Se genda' mpayat, duuni ngag Judeo ritu neng miksupak ri seniin bu' mingimbegu se kelampusan sek pegwali ni Pablo se Christian neng minsahi tu se gena' Judeo neg intirisadu ri sek tinu'uwan se ngag Judeo. Mipeges si Pablo sek pegawa' sek Tesalonica arun meritu seg Berea. Nda' santa', dluwat giin merepet se Corinto, mikerawat si Pablo nek pesuun buwat sek samentaunen mekterbahu ne si Timoteo metendeng se kebetang ri sek simbaan sek Tesalonica.
Su Guna nek Sulat ni Pablo para se ngak taga Tesalonica sinulat arun sek peddasig bu' pedligen se nga Christian ritu. Mikpesalamat giin seg balita' metendeng ri sek pektu'u bu' pekpetail nilan. Pi'ena'ena'en ri senilan su kelasi nek pedleketubu' neng mipe'ita'en saanay duma pa giin senilan bu' rayun sinembagen su ngak saak neng mirepet sek simbaan metendeng sek pekpuli' ni Christ: Mekuuwan ba se ketubu' ne genda'iruni ketapusan su ngang mektetu'u neng minatay se gendi' pa mpuli' si Christ? Nanu ba mpuli' si Christ? Ginamit ni Pablo higayun keni sek pektuntul ri senilan ne kina'enlan mekpeddayun ilan sek pegbaal se gendawendaw nilan nek terbahu saanay megelat neng medderama sek pekpuli' ni Christ.
Ngang Misulat ri sek Sulat keni
I. Pesi'una 1.1
II. Suk Pedleketubu' bu' suk Pektu'u nu ngang Mektetu'u sek Tesalonica 1.2-10
III. Suk Terbahu ni Pablo riin sek Tesalonica 2.1-16
IV. Su Gangut ni Pablo neng Meritu sek Tesalonica 2.17—3.13
V. Su Ketubu' neng Mekegbegay ne Dleliyag ri sed Diwata 4.1-12
VI. Metendeng sek Pekpuli' ne Ginu'u ne si Jesus 4.13-18
VII. Pengandam Amu sek Pekpuli' se Ginu'u 5.1-11
VIII. Ketapusan ne ngak Pemandu' bu' Pengumusta 5.12-28
1
1 ✡ 1.1: Su Ngak Pimbaal 17.1. Seniyu ne ngang miktipung ne ngang mektetu'u riin sek simbaan sek Tesalonica, gamu neng misakup riin sed Diwata ne Gama' bu' riin se Ginu'u ne si Jesus Christ.
Sulat keni buwat ni Pablo, ni Silas,* 1.1 Silas: awas Silvano. Enlengay niyu Su Ngak Pimbaal 15.22-18.5. bu' ni Timoteo.
Pegampu' nami neg begayan amu siya ne kepiya bu' kelinaw.
Suk Pedleketubu' bu' suk Pektu'u nu ngang Mektetu'u sek Tesalonica
2-3 Kanunay ami mikpesalamat ri sed Diwata para se dlaun niyu bu' mikpeddayun ami rema sek pegampu' ri seniyu. Ay nda' nami pedlingaway riin sed Diwata ta ne Gama' suk pegisgut sek pektu'u nek pinita' niyu, bu' su ketuges niyu ned dinasig sek pekpetail, bu' maa' run rema, sung meligen nek pedderama niyu riin ni Jesus Christ ne Ginu'u. 4 Nga kepeteran, misuunan nami nek pinetail amu ned Diwata bu' pimili'en arun mbaal neng niin. 5 Ay migwali ami seng Melengas ne Gesuyen, gena' sek talu' na run bu' ndi' se ga'em se Gispiritu Santu. Meletek suk pektu'u nami ne keni metuud gaid. Misuunan niyu pikendun nami pedleketubu' saanay duma ami riin seniyu para ma'aray se kelengasan niyu. 6 ✡ 1.6: Su Ngak Pimbaal 17.5-9. Sinunud niyu ami bu' su Ginu'u; isan pa neng migantus amu, dinawat niyu sung minsahi ned duunik pedleliyag neg buwat se Gispiritu Santu. 7 Aas mibaal amu ne dlendasan se dlaun neng mektetu'u seng Macedonia bu' seg Acaya. 8 Ay buwat riin seniyu, sung minsahi metendeng se Ginu'u midlelaup seng Macedonia bu' Acaya. Midlelaup rema se dlaun ne dlugar su gesuyan metendeng sek pektu'u niyu ri sed Diwata, aas ndi' na kina'enlan neng megasuy ami pa. 9 Ay gilan na mismu sung minuntul bu' pigendun ami niyu run sek pegatiman sek pegbisita nami riin seniyu. Bu' pinuntul nilan neg bineleng niyu su ngad diwata niyu arun mekepenibeli amu ri seng metuud bu' tetubu' ned Diwata. 10 Pinuntul rema nilan neng migelat amu sek pekpuli' seg Bata'en ne si Jesus buwat ritu se dlangit. Pitubu' giin puli' ned Diwata bu' giin sung medluwas senita buwat seng mateng ne dlanget ned Diwata.