Ngurra Kalkuntjalakutu-ya Ngamurringkutja
Yitjurayilku tjamupirti-ya pitjalayirnu ngurra kalkuntjalakutu ngamurrinyangka Mawutjalu-tjananya Mama Kuurrku wangka puru watjara-wanarayintja ngurrpa-ya nyinarratjakutarra. Tjiinyamarntu yarnangu pirninya-ya Yiitjipulanguru pakantjanya mirrirringu wiyarringu. Nyangka-ya palunyaku katja yurntalpirti ngurra kalkuntjala tjarrpakitja kuwarripa nyinarranytja.
34
Mawutjalu Purlingurulu Ngurra Kalkuntjanya Nyakulalpi Mirrirringu
1-3 Nyangka Mawutjanya yapu katu tatirnu ngaralanytja tjiinya Mama Kuurrtu-lu watjannyangka. Nyangka Mama Kuurrtu-lu nintitjunu ngurra lipi purlkanya kayili, yapurra yuru purlkanyakutu puru yurlparirra ngaralanyangka. 4 Palunyatjanulu Mama Kuurrtu-lu watjarnu, “Ngurra ngaanyan nyakula, palunyanya-rna kutjulpirtulpi Yayipuramanya Yayitjikinya puru Tjayikapanya kalkurnu palunyaku tjamu kaparlipirtiku-tjanamparna nintilkitjalu. Yuwa, kutjuwarra nyawa. Tjiinya-rnanta katingu nyakutjakun. Nyangkan tjarrparra nyinakitjamunu. Ngaangurun nyakulalpi wiyarriku.”
5 Nyangka Mama Kuurrku waarka palyalpayi Mawutjanya mirrirringu ngurra nyarra Mawupala Mama Kuurrtu watjarnu wantinyangka. 6 Nyangka Mama Kuurrtu-lu tjurnutjunu karru-karrungka ngurra nyarra Mawupala warli yini Patjupiyula yitipi. Nyangka-ya yarnangu pirninya tjuulpa palunyaku ngurrpa. Kuwarritarrartu-ya ngurrpa tirtu nyinarra, ngayulu-rna tjukurrpa ngaanya walkatjuranyangka. 7 Tjiinya Mawutjanya kurli 120-nguru mirrirringu. Tjiinya patata-patatamaalpa kuurti wanka nyinarranytja. Puru kuru walykumunu tirtu nyinarranytja pawulypa wiyartu. 8 Nyangka-ya Yitjurayilku tjamupirti ngurra nyarra Mawupala nyinarra Mawutjaku yularrayirnu tjirntu 30-tjanu wiyarringu.
9 Nyangka Tjatjuwanya wati nintipuka nyinarranytja. Tjiinyamarntu-lu Mawutjalu mirrirrikitjalu kata pampurnu liita nyinatjaku. Nyangka Mama Kuurrtu-lu ngalya yarlarnu tjiinya kuliltjarralu-tjananya yarnangu pirninya kanyiratjaku. Nyangka-ya Yitjurayilku tjamupirtilu Tjatjuwaku wangka wangarnarralu kulira palyaranytja. Palunyalu-ya Mama Kuurrku wangka nyarra Mawutjalu watjarnu wantitjanya wangarnarralu kulira palyaranytja.
10 Yuwa, Mama Kuurrnga Mawutjala lurrtjurringkula wangkapayi. Nyangka kutjupa Mawutjanyapirinypa nyinanytjamunurtu wiyartu. Ngarna wati palunyangka Mama Kuurrnga yamatjingkapirinypa lurrtjurringkula wangkapayi. 11 Nyangka kutjupalu palyaranytjamunu nyarra Mawutjalu Yiitjipula palyaranytja palunyapirinypa. Tjiinya Mama Kuurrtu-lu witunnyangka yanu yayirninytjulu kutjupa-kutjupa palyaranytja puurrpa Piirulu nyakulanyangka. Puru palunyaku puurrpa pirnilu-ya puru yarnangu Yiitjipunyamartatji pirnilutarrartu-ya nyakulanytja. 12 Yuwa, Mawutjalu yayirninytjulu kutjupa-kutjupa palyaranytja. Nyangka-ya Yitjurayilku tjamupirtilu nyakulalpi ngurlurringkupayi. Nyangka kutjupalu palunyapirinypa palyaranytjamunurtu.
Yuwa, palunya.