74
देशया रक्षाया निंतिं प्रार्थना
आसापया मश्किल
1 हे परमेश्वर,
छिं छाय् थथे
जिमित सदांया निंतिं
मयय्कादीयागु?
छि थथे छाय् छिकपिनि मनू,
छिकपिनि फैतय्गु बथां लिसे
तंम्वयादीगु?
2 छिं तःदँ न्ह्यः
थः सर्बय् यायेत ल्ययादीपिन्त
लुमंकादिसँ।
अले थःगु जाति यायेत मू पुलाः
त्वःतकादीपिं मनूतय्त
लुमंकादिसँ।
छि थः च्वनादीगु सियोन पर्वत
व यरूशलेमयात नं
लुमंकादिसँ।
3 शत्रुतय्सं देगलय् च्वंगु फुक्कं
नाश यानाबिल।
थुखेपाखे नं
थःगु पलाः न्ह्याकादिसँ।
4 छिं जिमित नापलानादीगु थासय्
वयाः शत्रुतय्सं सः
थ्वय्कूगु दु।
थःपिं त्याःगु चिं कथं
इमिसं अन थःपिनिगु ध्वाँय्
ब्वय्काथकूगु दु।
5 जंगलय् सिँ पालिपिन्सं थें
इमिसं स्यंकाथकल।
6 बुट्टा कियातःगु फुक्क सिँपौयात
इमिसं थःपिनिगु पा व मुगलं
कुचाकुचा थलाबिल।
7 छिगु देगःयात स्यंकाः
मि तयाबिल।
छिगु पवित्र थाय्यात
अशुद्ध यानाथकल।
8 इमिसं पाच्चुक हे
न्हंकाछ्वयेगु
मतिइ तःगु खः।
देशय् दक्व पवित्र थाय्यात
इमिसं च्याकाबिल।
9 आः अजूचायापुगु चिं
नं खने मन्त
अगमवक्तात
नं छम्ह हे मन्त।
थथे गुबलय् तक
जुयाच्वनी जिपिं सुनानं मस्यू।
10 हे परमेश्वर,
शत्रुतय्त गुबलय् तक
न्हीकातयेगु?
इमित सदां छिगु नांयात
क्वह्यंके बियातयेगु ला?
11 छाय् छिं थःगु
बल्लाःगु जव ल्हाः
प्वः चिनाच्वनादियागु?
थःगु ल्हाः फ्यनाः
इमित नाश यानादिसँ।
12 सुरुंनिसें छि जिमि जुजु खः।
छिं तःकःमछि हे
जिमित बचय् यानादीगु दु।
13 छिं थःगु शक्तिं
समुद्रयात ब्वथलादिल।
छिं समुद्रया राक्षसतय्गु छ्यं
नच्चुक तछ्यानादिल।* ७४:१३ प्रस १४:२१
14 छिं लिव्यातन नांयाम्ह
समुद्रया राक्षसया छ्यं
तछ्यानाः
वयागु ला
मरुभूमिया जनावरतय्त
नकेबियादिल।* ७४:१४ अयू ४१:१; भज १०४:२६; यशै २७:१
15 छिं हे लःया मूल तछ्यानाः
खुसि व झ्वाला हाय्कादिल।
छिं ततःधंगु खुसित
गंकादिल।
16 छिं न्हि व चा सृष्टि यानादिल
छिं सूर्य व तिमिलायात दय्काः
इमिगु थासय् तयादिल।
17 छिं हे पृथ्वीया लागा चिनादिल
छिं हे ताल्ला व चिकुला
सृष्टि यानादिल।
18 हे परमप्रभु,
छकः लुमंकादिसँ,
छिकपिनि शत्रुत
छि खनाः गथे न्हिल।
मूर्ख मनूतय्सं छिगु नांयात
गुकथं क्वह्यंका जुल।
19 छिं थः बमलाःपिं
मनूतय्गु ज्यान
इमि शत्रुतय्गु ल्हातिइ
लःल्हानादी मते
दुःख सियाच्वंपिं थः मनूतय्त
सदांया निंतिं
ल्वःमंकादी मते।
20 छिं जिपिंलिसे चिनादीगु
बाचा लुमंकादिसँ
देशया फुक्क खिउँगु थासय्
ल्वापुख्यापु जुयाच्वंगु दु।
21 क्वत्यय्काच्वनेमाःपिं मनूत
मछालापुकाच्वने म्वाःलेमा
चीमिपिं व मगाःमचाःपिन्सं
छिगु नांयात तःधंकेमा।
22 हे परमेश्वर, दनादिसँ,
थःगु खँयात कयाः
नवानादिसँ
छकः लुमंकादिसँ,
मूर्खतय्सं छितः न्हिन्हिं
हेस्यानाच्वंगु दु।
23 छिकपिनि शत्रुतय्सं
तसलं हाःगु सःयात
ल्वःमंकादी मते।
इमिगु सः झन् झन् तस्सः
जुयावयाच्वंगु दु।