9
पृथ्वीइ व स्वर्गय् जुइगु सेवा
1 न्हापायागु बाचाय् नं परमेश्वरयात गथे यानाः सेवा यायेगु धयागु खँ च्वया तःगु खः। अबलय् इमिसं पृथ्वीइ हे सेवा यायेगु थाय् दय्कूगु खः। 2 इमिसं पाल ग्वयाः निकू क्वथा दय्कल। न्हापांगु क्वथाय् त्वाःदेवा, तेबिल व छायेहःगु मरि तयातःगु दइ। व थाय्यात पवित्रगु थाय् धाइ।* ९:२ प्रस २६:१-३०; २५:२३-३०,३१-४० 3 निगूगु धकिंया दुने च्वंगु थाय्यात महा पवित्रगु थाय् धाइ।* ९:३ प्रस २६:३१-३३ 4 थन लुँयागु गुंगू थनेगु वेदी व लुं भुना तःगु बाचा चिनादीगु सनू दु। व सनू दुने लुँयागु थलय् मन्न तया तःगु दु, अले चुलि ह्वया च्वंगु हारूनयागु तुतां छपु, व व्यवस्था च्वया तःगु ल्वहंपौ निपाः तयातःगु दु।* ९:४ प्रस ३०:१-६; २५:१०-१६; १६:३३; गन्ती १७:८-१०; प्रस २५:१६; व्य १०:३-५ 5 थ्व सनूया द्यःने परमेश्वर च्वनादीगु थाय्यात किकाः करूबतय्गु पपू चक्कंकाः तसकं बांलाक तया तःगु दु। थ्व फुक्क खँ छता छता दतले आः कना च्वनेत मलाः।* ९:५ प्रस २५:१८-२२
6 थ्व फुक्क थुकथं दय्काः पुजाहारीत न्हिं न्हिं पवित्रगु थासय् सेवा यायेत वनी।* ९:६ गन्ती १८:२-६ 7 दुने च्वंगु महा पवित्रगु थासय् दँय् छकः दकलय् तःधंम्ह पुजाहारी जक थःगु व मेपिनिगु मसिकं याःगु पापयागु निंतिं हि छायेत दुहां वनी।* ९:७ लेवी १६:२-३४ 8 न्हापांगु पाल दयाच्वंतले महा पवित्रगु थासय् दुहां वनेगु लँ चाइ मखु धकाः पवित्र आत्मां क्यनादीगु दु।
9 थ्व ला आःयागु ईयात क्यनादीगु छगू नमुना जक खः। थुकिं थथे धाइ -- परमेश्वरयात छाये हःगुलिं व बलि बीगुलिं सुयागुं नुगः यचुका बी फइ मखु। 10 थथे नयेगु त्वनेगु व थी थीकथं म्वःल्हुइगु ला पिने क्यनेत जक खः। थज्याःगु थितिकुति न्हूगु बाचा चिना मदीतलेयात जक खः।
ख्रीष्टयागु हि
11 ख्रीष्ट ला थन दुगु फुक्क भिंगु खँया दकलय् तःधंम्ह पुजाहारी जुयाः झायादीगु दु। वय्कः झन तःधंगु व सिद्धगु थासय् दुहां झायादीगु दु। थ्व मनूतय्सं दय्कूगु मखु, अले सृष्टि याना तःगु थ्व संसारयागु नं मखु। 12 वय्कः दुगुचा व द्वहंचातय्गु हि हाय्का मखु, बरु थःगु हे हि हाय्काः उद्धार बीम्ह जुयाः छकलं हे सदांयात महा पवित्रगु थासय् दुहां झाःगु खः।
13 दुगुचा व द्वहंयागु हि, अले होमबलिइ छाःम्ह छसु हे मब्याःनिम्ह सायागु नौ ह्वलाः ला शुद्ध मजूम्ह मनूयात शुद्ध याइ धाःसा* ९:१३ लेवी १६:१५-१६; गन्ती १९:९,१७-१९ 14 म्वाःम्ह परमेश्वरयागु सेवा यायेत ख्रीष्टयागु हिं झन गुलि जक झीगु नुगः यचुक हुया बीगु जुइ? ख्रीष्टं पवित्र आत्मां जायाः खुन मदुम्ह बां जुयाः थःत हे परमेश्वरयात छायादिल।
15 परमेश्वरं बी धकाः धयादीगु सदां दयाच्वनिगु आशिष वय्कःया ल्यया तःपिं मनूतय्सं काये दयेमा धकाः थथे न्हूगु बाचा चिनाः ख्रीष्ट परमेश्वर व मनूतय्गु दथुइ च्वनादीगु खः। न्हापांगु बाचाय् मनूतय्सं याःगु अपराधं आः छुत्कारा दइ, छाय्धाःसा थ्व हे ज्याया लागि वय्कः सिनादी धुंकल।
16 इच्छापत्रय् च्वया तःथें याये न्ह्यः इच्छापत्र च्वया ब्यूम्ह मनू सी धुंकल धकाः दसि क्यने माः। 17 इच्छापत्र च्वया ब्यूम्ह मनू म्वाना च्वँतले इच्छापत्र ज्यालगय् जुइ मखु। च्वया ब्यूम्ह मनू सी धुंकाः तिनि ज्यालगय् जुइ।
18 अय्जूगुलिं न्हापायागु बाचा नं हि छ्वाकाः हे चिनातःगु खः। 19 मोशां व्यवस्थाय् च्वया तःगु फुक्क आज्ञा ब्वना न्यंकूबलय् दुगुचा व द्वहंचायागु हि ल्वाकछ्याना तःगु लः, हिसप घाँय् व ह्याउँगु उनं व्यवस्थायागु सफुलिइ व मनूतय्त थथे धकाः हा यात -- 20 “परमेश्वरं छिमित आज्ञा बियादीगु बाचायागु हि थ्व हे खः।”* ९:१९-२० प्रस २४:६-८ 21 थथे हे मोशां पाल व सेवा यायेत छ्यले माःगु फुक्क थलबलय् नं हिं हाहा यात।* ९:२१ लेवी ८:१५ 22 धात्थें हे व्यवस्थायाकथं हिं फुक्कयात शुद्ध याइ, अले हि महाय्कं पाप क्षमा जुइ मखु।* ९:२२ लेवी १७:११
ख्रीष्ट सिनादीगुलिं पाप हुया वनी
23 स्वर्गयागु किपालु थें जक यानाः दय्का तःगु थ्व फुक्कयात थथे हिं शुद्ध याये हे माः। अथे हे स्वर्गय् च्वंगुयात ला थ्व स्वयाः भिंगु बलिदानं शुद्ध याये माः।
24 ख्रीष्ट मनूतय्सं स्वर्गयागु किपालु थें जक यानाः दय्का तःगु महा पवित्रगु थाय् दुने मखु, बरु झीगु निंतिं स्वर्गय् हे परमेश्वरया न्ह्यःने झायादीगु दु। 25 दकलय् तःधंम्ह पुजाहारी दँय्दसं थःगु हि छायेत मखु, बलि बियाः हि छायेत परमेश्वरयागु न्ह्यःने वनी। ख्रीष्ट ला झाः झाः पतिं अथे थःगु हि छायेत झाया मदी। 26 थथे झाः झाः पतिं झाये माःगु जूसा ला ख्रीष्टं संसारयागु सृष्टि जूसानिसें तःकः मछि दुःख सी मालिगु खः। तर वय्कः संसारयागु अन्त जुइ त्यय्काः आः सदांयात छकलं झायाः मनूतय्गु पाप हुया छ्वयेत थः हे बलिदान जुयादिल।
27 मनू छकः सी, अले सी धुंकाः वयागु न्याय जुइ। 28 अथे हे तःम्हय्सिगु पाप हुया छ्वयेत ख्रीष्ट नं छकः सिनादिल। वय्कः निक्वः खुसि नं झाइ तिनि। उबलय् वय्कः पाप हुया छ्वयेत मखु, बरु वय्कःयागु लँ स्वया च्वंपिन्त बचय् यायेत झाइ।* ९:२८ यशै ५३:१२
*9:2 ९:२ प्रस २६:१-३०; २५:२३-३०,३१-४०
*9:3 ९:३ प्रस २६:३१-३३
*9:4 ९:४ प्रस ३०:१-६; २५:१०-१६; १६:३३; गन्ती १७:८-१०; प्रस २५:१६; व्य १०:३-५
*9:5 ९:५ प्रस २५:१८-२२
*9:6 ९:६ गन्ती १८:२-६
*9:7 ९:७ लेवी १६:२-३४
*9:13 ९:१३ लेवी १६:१५-१६; गन्ती १९:९,१७-१९
*9:20 ९:१९-२० प्रस २४:६-८
*9:21 ९:२१ लेवी ८:१५
*9:22 ९:२२ लेवी १७:११
*9:28 ९:२८ यशै ५३:१२