1 अय्‌ मूर्ख गलातीत, छिमित सुनां स्‍यंकल? येशू ख्रीष्‍टयात क्रूसय्‌ यख्‍खानाः स्‍याःगु खँ छिमिगु हे न्‍ह्यःने ध्‍वाथुइक कनागु मखु ला? 2 व्‍यवस्‍था मानय्‌ यानाः परमेश्वरं छिमित पवित्र आत्‍मा बियादीगु ला कि येशू ख्रीष्‍टयागु भिंगु खँ न्‍यनाः विश्वास यानाः बियादीगु खः ला? 3 छिपिं छाय्‌ थुलिमछि मू्र्ख जुयागु? छिमिसं आत्मां सुरु यानाः आः छु छिपिं थःगु हे शक्तिं फुना वनेत्‍यनागु ला? 4 छिमिसं थुलि मछि दुःख फयागु सितिं वन ला? मखु, अथे जुइ मखु।

5 परमेश्वरं छिमित पवित्र आत्‍मा बियाः अजूचायापुगु ज्‍या याके बियादीगु छिमिसं व्‍यवस्‍था मानय्‌ याःगुलिं खः ला कि येशू ख्रीष्‍टयागु भिंगु खँ न्‍यनाः विश्वास याःगुलिं?

6 अब्राहामयात स्‍व! वं याःगु खँ धर्मशास्‍त्रय्‌ थथे च्‍वयातःगु दु -- “अब्राहामं परमेश्वरयात विश्वास याःगुलिं परमेश्वरं वयात धर्मी ठहरय्‌ यानादिल।”* ३:६ उत १५:६; रोम ४:३ 7 थथे जूगुलिं परमेश्वरयात विश्वास याइपिं मनूत हे अब्राहामया धात्‍थेंयापिं सन्‍तान खः धकाः छिमिसं थुइकि।* ३:७ रोम ४:१६

8 यहूदीमखुपिन्‍सं परमेश्वरयात विश्वास यात धाःसा परमेश्वरं इमित नं धर्मी ठहरय्‌ यानादी धकाः न्‍हापा हे धर्मशास्‍त्रय्‌ च्‍वयातःगु दु। अय्‌जूगुलिं हे अब्राहामयात परमेश्वरं “छंगु पाखें हे संसारय्‌ च्‍वंपिं फुक्‍क जात जातितय्‌त आशिष बी” धकाः धयादिल।* ३:८ उत १२:३ 9 गथे अब्राहाम परमेश्वरयात विश्वास याःगुलिं धर्मी ठहरय्‌ जुल, अथे हे वय्‌कःयात विश्वास याक्‍वसिनं आशिष काये खन।

10 व्‍यवस्‍थाय्‌ जक भलसा तया च्‍वंपिं मनूत सराः फया च्‍वंपिं खः। थ्‍व हे खँ धर्मशास्‍त्रय्‌ थथे च्‍वयातःगु दु -- “व्‍यवस्‍थाय्‌ च्‍वयातःगु फुक्‍कं सदां मानय्‌ याना च्‍वने मफुपिं मनूतय्‌सं सराः फये माली।”* ३:१० व्‍य २७:२६ 11 व्‍यवस्‍था मानय्‌ यानाः सुं नं धर्मी ठहरय्‌ जुइ फइ मखु धयागु खँ ला छिमिसं आः बांलाक थुल हे जुइ। धर्मशास्‍त्रय्‌ हानं थथे च्‍वयातःगु दु -- “परमेश्वरयात विश्वास याना जुइम्‍ह मनू सदां म्‍वानाच्‍वनी।”* ३:११ हब २:४ 12 व्‍यवस्‍था पूवंक मानय्‌ याइपिन्‍सं धाःसा परमेश्वरयात विश्वास याये म्‍वाः। “व्‍यवस्‍था मानय्‌ याइपिं व्‍यवस्‍थापाखें हे म्‍वाइ” धकाः धर्मशास्‍त्रय्‌ च्‍वयातःगु दु।* ३:१२ लेवी १८:५

13 येशू ख्रीष्‍टं व्‍यवस्‍थाया सरापं झीत मू पुलाः त्वःतकादिल। वय्‌कलं क्रूसय्‌ यग्गानाः झीगु सराः थःम्हं फयादीगु दु। व्यवस्थाय्‌ धयातःगु दु “सिमाय्‌ यख्खाइम्हय्‌सित सराः लाइ।”* ३:१३ व्‍य २१:२३ 14 यहूदीमखुपिन्त नं येशू ख्रीष्‍टपाखें परमेश्वरं अब्राहामयात बी धयादीगु आशिष बियादीगु दु। उकिं झी विश्वास याना च्वनापिन्सं नं झीगु विश्वासं यानाः बी धयातःगु पवित्र आत्‍मा काये खनी।

15 यःपिं दाजुकिजापिं, मनूतय्‌गु हे दसु काये -- निम्‍ह मिलय्‌ जुयाः च्‍वयातःगु भ्‍वंयात सुनानं स्‍यंके फइ मखु, अले हानं उकी छुं तने नं फइ मखु। 16 परमेश्वरं अब्राहामनाप व वया सन्‍ताननाप बाचा चिनादीगु खः। वय्‌कलं तःम्‍हय्‌सित “अब्राहामया मचाखचा” धकाः धया मदी, बरु “अब्राहामया सन्‍तान” जक धयादिल। थन “सन्‍तान” धयादीगु छम्‍हय्‌सित जक खः, अले थ्‍व ख्रीष्‍ट येशूया बारे धयादीगु खः।* ३:१६ उत १२:७ 17 परमेश्वरं बाचा चिनादीगु गुबलें हे ल्‍वःमंकादी मखु। थथे वय्‌कलं चिनादीगु बाचायात प्‍यसः व स्‍विदँ लिपा तिनि वःगु व्‍यवस्‍थां सितिं छ्वये फइ मखु।* ३:१७ प्रस १२:४० 18 परमेश्वरं बी धयादीगु आशिष व्यवस्था मानय्‌ यानाः दइगु खःसा ला थ्व परमेश्वरया बाचा हे मजुल। परमेश्वरं अब्राहामयात बाचा यानाः आशिष बियादीगु खः।* ३:१८ रोम ४:१४

19 अय्‌सा व्‍यवस्‍था छाय्‌ बिल लय्‌? मभिंगु ज्‍याखँ सीके बीत परमेश्वरं झीत व्‍यवस्‍था बियादीगु खः। अय्‌नं परमेश्वरं बाचा चिना तःम्‍ह ख्रीष्‍ट मझातले जक व्‍यवस्‍था दया च्‍वनी। थ्‍व व्‍यवस्‍था परमेश्वरं स्‍वर्गदूततय्‌पाखें मोशायात बीके हयादीगु खः। थुकथं मोशा मनूत व परमेश्वरया दथुइ ज्‍या याइम्‍ह जुल। 20 दथुइ च्वना ज्या याइम्‍ह निम्हया दथुइ जुइ। अय्‌नं परमेश्वर ला छम्‍ह हे जक दु।

21 अय्‌सा छु व्‍यवस्‍था परमेश्वरयागु बाचाया अःखः जुल ला? मखु, व्‍यवस्‍था परमेश्वरयागु बाचाया अःखः मजू। मनूतय्‌त जीवन दयेमा धकाः व्‍यवस्‍था बियादीगु जूसा व्‍यवस्‍थां हे मनूत परमेश्वरया न्‍ह्यःने धर्मी ठहरय्‌ जुइगु खः। 22 येशू ख्रीष्‍टयात विश्वास याक्‍वसित परमेश्वरं बियादी धकाः धयादीगु मुक्ति काये फयेमा धकाः धर्मशास्‍त्रं संसारय्‌ च्‍वंपिं फुक्‍कसितं पापय्‌ लाकातःगु दु।

23 विश्वास यायेगु ई वये न्‍ह्यः हे व्‍यवस्‍थां झीत कुना तल। थथे व्‍यवस्‍थां झीत कुनातःगु येशू ख्रीष्‍ट मझातले जक खः।

24 विश्वासं हे झीपिं परमेश्वरया न्‍ह्यःने धर्मी ठहरय्‌ जुइमा धकाः ख्रीष्‍ट झाये न्‍ह्यः व्‍यवस्‍थायात झीत स्यनिम्ह गुरू थें याना तल। 25 आः धाःसा विश्वास यायेगु ई वये धुंकल, उकिं आः झीपिं व्‍यवस्‍थां धाःथें च्‍वने म्‍वाल।

26 येशू ख्रीष्‍टयात विश्वास यानाः वय्‌कः नाप मिलय्‌ जूगुलिं छिपिं फुक्‍कं परमेश्वरया सन्तान जुल। 27 ख्रीष्‍टयात विश्वास यानाः बप्‍तिस्‍मा कयाः वय्‌कः नाप मिलय्‌ जूपिं सकसिनं पहःचहः न्हूगु वसः थें पुंगु दु। 28 अय्‌जूगुलिं आः यहूदीत व यहूदीमखुपिं छु हे मपात। दास व दास मखुपिं, अले मिजं व मिसा नं मपात। येशू ख्रीष्‍टयात विश्वास याःगुलिं छिपिं फुक्‍कं छम्‍ह हे जुल। 29 छिपिं ख्रीष्‍टया मनूत खःसा अब्राहामया सन्‍तान नं खः। अले परमेश्वरं बी धकाः बाचा चिनादीगु छिमित नं बियादी।* ३:२९ रोम ४:१३