1 आइकोनियनय्‌ थ्‍यंकाः नं इपिं निम्‍हं धर्मशास्‍त्र स्‍यनिगु छेँय्‌ वन। अन इमिसं तसकं बांलाक नवाःगुलिं यक्‍व हे यहूदीतय्‌सं व यहूदीमखुपिन्‍सं नं विश्वास यात। 2 विश्वास मयाःपिं यहूदीतय्‌सं यहूदीमखुपिन्‍त ग्‍वाकाः विश्वासीतय्‌त मयय्‌कल। 3 अय्‌नं इपिं मग्‍यासे प्रभुयागु वचन स्‍यँस्‍यं तःन्‍हु तक अन च्‍वनाच्‍वन। इमिसं नवाःगु प्रभुयागु वचन खः धकाः दसि बीत इमिसं यक्‍व अजूचायापुगु चिं व ज्‍या यानाक्‍यन। 4 अन शहरय्‌ च्‍वंपिं मनूत निगू पुचः जुयाः बाया वन। छपुचः मनूतय्‌सं यहूदीतय्‌गु पँ लित, अले मेपिन्‍सं प्रेरिततय्‌गु पँ लित।

5 हाकिमत नाप मिलय्‌ जुयाः यहूदीत व यहूदीमखुपिन्‍सं इमित ल्‍वहँतं कय्‌काः स्‍यायेत 6 स्‍वयाच्‍वंगु दु धकाः सीकाः इपिं लुकोनियाय्‌ च्‍वंगु लुस्‍त्रा व डर्बी धाःगु शहर व इमिगु जःखः च्‍वंगु जिल्‍ला जुयाः बिस्‍युं वन। 7 अन नं इमिसं भिंगु खँ न्‍यंका जुल।

8 अबलय्‌ लुस्‍त्राय्‌ छम्‍ह लंग्राम्‍ह मनू दु। बूसांनिसें लंग्रा जूगुलिं गुबलें न्‍यासि वने मलंनि। 9 पावलं न्‍यंकाच्‍वंगु खँ वं नं न्‍यन। पावलं वयात मिखा हे लिमकासे स्‍वयाच्‍वन। वयाके थःगु ल्‍वय्‌ लाय्‌का बी धयागु विश्वास दु धकाः सीकाः पावलं वयात 10 तःसलं थथे धाल -- “दनादिसँ।” थुलि धायेवं हे व जुरुक्‍क दनाः न्‍यासि जुल।

11 पावलं थथे लाय्‌कूगु खनाः यक्‍व मनूतय्‌सं ततःसलं हालाः लुकोनियायागु भासं थथे धाल -- “द्यः हे मनू जुयाः झीथाय्‌ वयाच्‍वंगु खः।” 12 पावल न्‍ह्यलुवाः नवाःम्‍ह जूगुलिं इमिसं वयात हर्मेस द्यः अले बारनाबासयात जिउस द्यः धकाः नां तल। 13 शहरया पिनेसं जिउसयागु देगः दु। देगया द्यःपाःलाः स्‍वांमाः व द्वहं ज्‍वनाः शहरयागु ध्‍वाखाय्‌ वल। वं व अन मुना च्‍वंपिं मनूतय्‌सं बारनाबास व पावलयात पुजा यायेत स्‍वल।

14 थ्‍व खँ इमिसं सियाः थःथःगु लं खुनाः मनूतय्‌गु हुलय्‌ दुहां वनाः तःसलं हालाः थथे धाल -- 15 “दाजुकिजापिं, छिकपिन्‍सं थ्‍व छु याना दियागु? जिपिं नं ला छिकपिं थें हे थ्‍व संसारयापिं मनूत खः नि। जिमिसं ला छिकपिन्‍त भिंगु खँ कनाः थथे म्‍वाः मदुगु ज्‍यां त्‍वःतकाः स्‍वर्ग, पृथ्‍वी, समुद्र व अन च्‍वंगु दक्‍व फुक्‍कं सृष्‍टि यानादीम्‍ह म्‍वाःम्‍ह परमेश्वरपाखे लिफः स्‍वकेत जक स्‍वयाच्‍वनागु खः।* १४:१५ प्रस २०:११; भज १४६:६ 16 न्‍हापा न्‍हापायापिं मनूतय्‌त परमेश्वरं इमि यःथें याके बियादिल। 17 अथेसां वय्‌कलं भिंगु भिंगु ज्‍या यानाः थः सु खः धकाः क्‍यना मदीगु मखु। वय्‌कलं छिकपिन्‍त स्‍वर्गं इलय्‌ ब्‍यलय्‌ वा वय्‌काः फलफुल व अन्‍न सय्‌कादिल। अले छिकपिन्‍त नयेगुत्‍वनेगु बियाः लय्‌ ताय्‌का तःम्‍ह नं थ्‍व हे परमेश्वर खः।” 18 प्रेरिततय्‌सं बल्‍लं थथे धयाःतिनि थःपिन्‍त पुजा यायेत्‍यंपिन्‍त पने फत।

19 छन्‍हु यहूदीत एन्‍टिओखिया व आइकोनियनं निसें अन वयाः अन च्‍वंपिं मनूतय्‌त ल्‍हातय्‌ कयाः पावलयात ल्‍वहँतं कय्‌कल। अले सित जुइ धकाः शहरं पिने सालाः वांछ्वय्‌ यंकल। 20 अन च्‍वंपिं विश्वासीत वयात वांछ्वया तःथाय्‌ स्‍वः वन। अले पावल दनाः शहरय्‌ वन। कन्‍हय्‌ खुन्‍हु हे पावल बारनाबास नाप डर्बिइ वन।

21 अन नं इमिसं भिंगु खँ न्‍यंकूगुलिं विश्वासीत यक्‍व दत। लिपा इपिं लुस्‍त्रा, आइकोनियन जुयाः एन्‍टिओखियाय्‌ लिहां वल। 22 इमिसं विश्वासीतय्‌त विश्वासय्‌ बल्‍लाना च्‍वनेत साहस बिल। अले थथे धकाः नं स्‍यन -- “परमेश्वरया राज्‍यय्‌ दुहां वनेत झीसं थज्‍याःगु दुःखकष्‍ट सह याये माः।” 23 इमिसं मण्‍डली पतिकं थकालि ल्‍ययाः अपसं च्‍वनाः प्रार्थना यानाः इमित विश्वास याःम्‍ह प्रभुयागु ल्‍हातय्‌ लः ल्‍हाना थकल। 24 अन लिपा इपिं पिसिदिया पुलाः पामफिलियाय्‌ थ्‍यंकः वल। 25 पर्गाय्‌ नं भिंगु खँ न्‍यंकाः इपिं अटालिया क्‍वहां वन।

26 अटालियां इपिं लः जहाजय्‌ च्‍वनाः सिरियाया एन्‍टिओखियाय्‌ लिहां वन। अन हे इमिसं पूवंका वःगु ज्‍याया निंतिं इमित परमेश्वरया दया मायाय्‌ लःल्‍हाःगु खः। 27 एन्‍टिओखियाय्‌ थ्‍यंकाः इमिसं मण्‍डलीइ च्‍वंपिं विश्वासीत मुंकाः परमेश्वरं इपिं नाप च्‍वनादियाः गुलि ज्‍या यानादिल, अले यहूदीमखुपिन्‍त नं विश्वास यायेगु लँ क्‍यनादिल धकाः फुक्‍क खँ कन। 28 इपिं अन तःन्‍हु चेलात नापं च्‍वन।