मत्तीं च्‍वःगु सुसमाचारय्‌ येशू ख्रीष्‍ट हे लिपा वइतिनि धकाः अगमवाणी याना तःम्‍ह मुक्ति बीम्‍ह ख्रीष्‍ट खः धकाः क्यनातःगु दु। परमेश्वरं न्‍हापा पुलांगु नियमय्‌ द्वलंद्वः दँ न्‍ह्यः थः मनूतय्‌त अगमवक्तापाखें बियादीगु यक्‍व बचं थ्‍व हे मुक्ति बीम्‍ह ख्रीष्‍टपाखें पूवंकादिल। सफूया सुरुया अध्‍यायलय्‌ च्‍वयातःगु दु - अब्राहामया सन्‍तान, दाऊदया सन्‍तान, येशू ख्रीष्‍टया वंशावली। इस्राएलय्‌ शासन याइम्‍ह दाऊदया वंशं वये माःगु जुयाः थन येशू ख्रीष्‍टयात दाऊदया सन्‍तान धकाः क्‍यनातःगु दु। थ्‍व सफूया न्‍ययगु (५०) थासय्‌ पुलांगु नियमया खँ तप्‍यंक न्‍ह्यथनातःगु दु, अले न्‍हयेन्‍यागु (७५) थासय्‌ चाःहिकाः पुलांगु नियमया खँ न्‍ह्यथना तःगु दु।

मत्तीं थ्‍व सफुलिइ प्रभु येशूं यानादीगु ज्‍या, वय्‌कःया अजूचायापुगु ज्‍या, वय्‌कलं स्‍यनेकने यानादीगु “परमेश्वरया राज्‍य” या खँया बारे च्‍वया तःगु दु। थ्‍व भिंगु खँ येशूया थःगु जाति यहूदीतय्‌गु निंतिं जक मखु, सारा संसारया निंतिं खः। मत्ती प्रभु येशूया झिंनिम्‍ह मध्‍ये छम्‍ह चेला खः। वयागु धात्‍थेंयागु नां लेवी खः।

मत्तीं थ्व सुसमाचारयात बांलाक मिलय्‌ यानाः च्‍वयातःगु दु। थ्‍व सफुलिइ हेरोद जुजुं बेथलेहेमय्‌ मचाम्‍ह येशूयात स्‍यायेत स्‍वःगुलिं व पाखें बचय्‌ जुइत योसेफ मचा व वया मां ज्‍वनाः मिश्रय्‌ बिस्‍युं वंगु खँ नं न्‍ह्यथना तःगु दु। लिपा येशूं बप्‍तिस्‍मा कयादीगु, वय्‌कःयागु मन स्‍वःगु, वय्‌कलं गालीलय्‌ स्‍यनेकने यानादीगु व ल्‍वय्‌ लाय्‌कादीगु खँ दु। अले येशू गालीलं यरूशलेमय्‌ झाःगु, अन दकलय्‌ लिपायागु हप्‍ताय्‌ जूगु खँ व वय्‌कःयात क्रूसय्‌ यख्‍खाःगु, वय्‌कः हानं म्‍वानावःगु व चेलातय्‌त नापलाःगु खँ दु।

थ्‍व सुसमाचारय्‌ येशू परमेश्वरया व्‍यवस्‍था ध्‍वाथुइकाबीगु अधिकार दुम्‍ह छम्‍ह तःधंम्‍ह गुरू खः धकाः क्‍यनातःगु दु। मत्तीं थःम्‍हं च्‍वःगु सुसमाचारय्‌ यहूदीमखुपिन्‍त नं दुथ्‍याकूगु दु, गथे कि - येशूयात दर्शन यायेत पुर्बं वःपिं ज्‍योतिषीत, (मत्ती २:१-१२) प्रभु येशूयात तसकं विश्वास याःम्‍ह कप्‍तान, (८:५-१३) व तसकं तःधंगु विश्वास दुम्‍ह कनानी मिसा। (१५:२२-२८) दकलय्‌ तःधंगु थ्‍व आज्ञा नापं सफू क्‍वचाइ “सारा संसारय्‌ वनाः छिमिसं चेला दय्‌की।” (२८:१९)

थ्‍व सफू ई.सं. ६५ निसें ८० तकया दथुइ च्‍वःगु जुइफु।