1 “हारुन व वया काय्‌पिन्‍त जिगु सेवा यायेत पलिस्‍था यायेबलय्‌ छं यायेमाःगु ज्‍या थ्‍व हे खः - छम्‍ह खुन मदुम्‍ह द्वहंचा व निम्‍ह खुन मदुपिं फै हजि।* 29:1-37 लेवी ८:१-३६ 2 सोडा मतःगु भिंगु छुचुं कयाः चिकं ल्‍वाकछ्याना तःगु मरि व चिकनं बुलातःगु सालुगु मरि दय्‌कि। 3 थ्‍व मरि छगः दालाचाय्‌ तयाः द्वहंचा व निम्‍हं फै नापं हजि, 4 अनंलि हारुन व वया काय्‌पिन्‍त नापलायेगु पालया ध्‍वाखा लिक्‍क हयाः म्‍वःल्‍हुकि। 5 वसः हयाः हारूनयात जामालं, पुजाहारीया लं, एपोद व छातिपाता फिकाः बांलाक थानातःगु जँनी एपोदया द्यःने चिना ब्‍यु। 6 अले वयागु छेनय्‌ बेतालि चिनाः बेतालिया न्‍ह्यःने लुँबाला तयाब्‍यु। 7 अनंलिपा अभिषेक याइगु चिकं कयाः वयागु छेनय्‌ प्‍वंका अभिषेक या। 8 अले वया काय्‌पिन्‍त हयाः इमित जामालं फिका ब्‍यु। 9 अले जँनि चिकाः इमित बेतालि हिनाब्‍यु। थुगु ज्‍या पाखें हारुनया सन्‍तानतय्‌सं पुजाहारीया सेवा न्‍ह्‍याबलें यायेमाः। थुकथं छं हारुन व वया काय्‌पिन्‍त अभिषेक या।

10 “अनंलिपा व द्वहंचा हजि, अले हारुन व वया काय्‌पिन्‍सं द्वहंचाया छेनय्‌ थःथःगु ल्‍हाः तयेमाः। 11 अले व द्वहंचायात परमप्रभुया न्‍ह्यःने नापलायेगु पालया ध्‍वाखाय्‌ बां ब्‍यु। 12 द्वहंचाया हि भतिचा थःगु पतिंचां कयाः वेदीया नेकुलिइ तिकाब्‍यु। ल्‍यं दुगु हि धाःसा वेदीया तःलय्‌ प्‍वंका ब्‍यु। 13 अले छं आतापति भ्‍वरि त्‍वपुइगु फुक्‍क दाः, सेँ त्‍वपुइगु पिलि व दाःनापया निगलं जलासेँ कयाः वेदीइ छ्वय्‌की। 14 द्वहंचाया ला, छेंगू व सउ धाःसा छाउनी पिने मिइ छ्वय्‌का छ्व। व पाप बलि खः।

15 “छं छम्‍ह फैचा नं का, अले हारुन व वया काय्‌पिन्‍सं फैयागु छेनय्‌ थःथःगु ल्‍हाः तयेमाः। 16 व फैयात स्‍यानाः वयागु हि वेदीया जःखः छ्वाका ब्‍यु। 17 व फैया ला कुचा कुचा यानाः छ्यं अले आतापति भ्‍वरि व तुति लखं सिलाः ला कुचात व छ्यं नापं वेदीइ तया ब्‍यु। 18 फैया म्‍ह छम्‍हं वेदीइ छ्वय्‌का छ्व। थ्‍व परमप्रभुया निंतिं मिं छाःगु नस्‍वाःगु होमबलि खः।* 29:18 एफि ५:२; फिलि ४:१८

19 “छं मेम्‍ह छम्‍ह फै का, अले हारुन व वया काय्‌पिन्‍सं फैयागु छेनय्‌ थःथःगु ल्‍हाः तयेमाः। 20 वयात स्‍यानाः भतिचा हि कयाः हारुन व वया काय्‌पिनिगु जव जव न्‍हाय्‌पंया ज्‍वालय्‌, जव जव ल्‍हाःया बुह्रा-पतिंचाय्‌ व जव जव तुतिया बुह्रा-पतिंचाय्‌ तिका ब्‍यु। अले हि वेदीया जःखः छ्वाका ब्‍यु। 21 अले वेदीइ च्‍वंगु हि व अभिषेकया भतिचा चिकं कयाः हारुन व वया वसतय्‌ अले वया काय्‌पिं व इमिगु वसतय्‌ नं छ्वाका ब्‍यु। थथे हारुन, वया काय्‌पिं व इमिगु वसः शुद्ध जुइ।

22 “छं फैयागु दाः, दाःखाःगु न्‍हिप्‍यं, आतापुति-भ्‍वरी त्‍वपुइगु फुक्‍क दाः, सेँ त्‍वपुइगु पिलि, दाः नापंया निगलं जलासेँ व जव खम्‍पा का। थ्‍व अभिषेकयाम्‍ह फैचा खः। 23 परमप्रभुया न्‍ह्यःने दुगु दालां सोडा मतःगु छपा मरि, छगः ग्‍वारमरि व चिकनं बुला तःगु मरि कयाः 24 व फुक्‍कं हारुन व वया काय्‌पिनिगु ल्‍हातय्‌ तया ब्‍यु। अले परमप्रभुया न्‍ह्यःने संकाबीगु बलि कथं देछा। 25 अनंलि व फुक्‍कयात इमिगु ल्‍हातं कयाः परमप्रभुयात यःगु नस्‍वाः कथं वय्‌कःयात मिं छाःगु होमबलिया वेदीइ छ्वय्‌का ब्‍यु। थ्‍व परमप्रभुयात मिं छाःगु बलि खः। 26 हारुनया अभिषेकयाम्‍ह फैचायागु ह्याकुला कयाः परमप्रभुया न्‍ह्यःने संकि। थ्‍व छंगु हे ब्‍व जुइ।

27 “लिपतय्‌ हारुनया अभिषेकयाम्‍ह फैया ह्याकुला व खम्‍पा कयाः परमप्रभुया न्‍ह्यःने संकाबीगु बलिकथं संकि, थ्‍व छिमिगु हे ब्‍व जुइ। 28 अले इस्राएलयापिं मनूतय्‌सं थ्‍व ब्‍वःयात हारुन व वया काय्‌पिन्‍त बी। इस्राएलयापिं मनूतय्‌सं परमप्रभुयात मेलबलि छाइबलय्‌ थ्‍व ब्‍व न्‍ह्‍याबलें पुजाहारीतय्‌गु जुइ। थ्‍व ब्‍व पुजाहारीतय्‌त बीबलय्‌ परमप्रभुयात ब्‍यूगु थें हे जुइ। 29-30 हारुन सी धुंकाः वयागु पुजाहारीया वसः वया लिपा पुजाहारी जुइम्‍ह वया सन्‍तानयात बीमा:। अले अभिषेकया ज्‍याझ्‍वलय्‌ न्‍हय्‌न्‍हु तक वं व वसः फिना: च्‍वनेमाः

31 “अले अभिषेक यायेत हःम्‍ह फैयागु ला कयाः चुकय्‌ छथाय्‌ दय्‌कि। 32 इमिसं व फैयागु ला व दालाय्‌ दुगु मरि नापलाय्‌गु पालया ध्‍वाखा लिक्‍क च्‍वनाः नयेमाः। 33 इमिसं पलिस्‍था यायेत व प्रायश्‍चित यायेत देछाःगु इमिसं नयेज्‍यू। व पवित्र जूगुलिं मेपिन्‍सं नयेमज्‍यू। 34 अभिषेक यायेत हःम्‍ह फैयागु ला व मरि छुं सुथय्‌तक ल्‍यन धाःसा व ल्‍यं दुगु मिइ छ्वय्‌का छ्व। व नयेमज्‍यू छाय्‌धाःसा व पवित्र खः।

35 “न्‍हय्‌न्‍हु तक जिं छन्‍त बियागु फुक्‍कं आज्ञाकथं हारुन व वया काय्‌पिन्‍त पलिस्‍था या। 36 छं न्‍हिया न्‍हिथं प्रायश्‍चित यायेत पाप बलियाम्‍ह द्वहंचा बां बीमाः। थुकिया हि कयाः वेदीयात शुद्ध या, अले वेदीयात पवित्र यायेत जैतूनया चिकनं अभिषेक या। 37 न्‍हय्‌न्‍हुतक छं वेदीया निंतिं प्रायश्‍चित यानाः उकिं व शुद्ध जुइ। अले वेदी तच्‍वकं पवित्र जुइ। व उकियात थ्‍यूगु न्‍ह्यागु नं पवित्र जुइ।

38 “अले छं वेदीइ न्‍हिया न्‍हिथं मदिक्‍क छायेमाःगु खँ थुपिं हे खः- दछि दुपिं निम्‍ह भ्‍याःचा।* 29:38-46 गन्‍ती २८:१-८ 39 छम्‍ह सुथय्‌ अले मेम्‍ह सन्‍ध्‍याकाः इलय्‌ छा। 40 भ्‍याःचा नापं भिंगु छगू लिटर जैतूनया चिकनय्‌ न्‍हायातःगु निगू किलोग्राम भिंगु छुचुं अले त्‍वँसा बलिया निंतिं छगू लिटर दाखमद्य छा। 41 मेम्‍ह भ्‍याःचा सन्‍ध्‍याकाः इलय्‌ छा। सुथय्‌ थें अन्‍नबलि व त्‍वँसा बलि नापं छायेमाः। थ्‍व परमप्रभुया निंतिं नस्‍वाःगु मिं छाःगु बलि जुइ।

42 “छिमि पुस्‍तां पुस्‍ता तक नापलायेगु पालया ध्‍वाखाया लिक्‍क परमप्रभुया न्‍ह्यःने मदिक्‍क होमबलि छाना च्‍वनेमाः। नापलायेगु पालय्‌ जि छ नापं खँ ल्‍हायेत नापला वय्‌। 43 इस्राएलीत नापं जि व हे थासय्‌ नापला वये। अले व थाय्‌ जिगु महिमां पवित्र जुइ।

44 “थुकथं जिं नापलायेगु पालयात व वेदीयात पवित्र याये। अले हारुन व वया काय्‌पिन्‍त जिगु निंतिं पुजाहारी जुयाः सेवा याकेत अभिषेक याये। 45 जि इस्राएलीतय्‌गु दथुइ बाय्‌ च्‍वने, अले जि इमि परमेश्वर जुइ। 46 जि इमि दथुइ बाय्‌ च्‍वनेत इमित मिश्र देसं पित हयाम्‍ह परमप्रभु इमि परमेश्वर खः धकाः इमिसं सी। जि परमप्रभु इमि परमेश्वर खः।”