1 काय्‌म्‍ह्याय्‌पिन्‍सं थः मांबौनं धाःगु खँ न्‍यने माः। परमेश्वरयात थथे याइगु यः।* ६:१ कल ३:२० 2 “काय्‌म्‍ह्याय्‌पिन्‍सं थः मांबौयात हनाबना तये माः” -- परमेश्वरं बचं नापं तुं बियादीगु थ्‍व न्‍हापांगु आज्ञा खः।* ६:२-३ प्रस २०:१२; व्‍य ५:१६ 3 “अथे याना च्‍वंसा जक छिमिगु भिं जुइ, अले छिपिं यक्‍व दँ म्‍वाना च्‍वने दइ।”

4 बौपिन्‍सं थः मस्‍तय्‌त तं चाय्‌केगु याये मते, बरु इमित प्रभुयागु खँ स्‍यनेकने यानाः वय्‌कःया अनुशासनय्‌ ब्‍वलंकी।* ६:४ कल ३:२१

5 दासतय्‌सं थः मालिकयागु आज्ञायात मनय्‌ ग्‍याःभय तयाः ख्रीष्‍टयागु आज्ञा थें ताय्‌काः मानय्‌ यायेगु या।* ६:५-८ कल ३:२२-२५ 6 मालिकतय्‌त लय्‌ताय्‌केत इमिगु न्‍ह्यःने जक ज्‍या याना क्‍यनेगु याये मते, बरु परमेश्वरया इच्‍छा कथं ख्रीष्‍टया हे दास थें जुयाः दुनुगलंनिसें ज्‍या यायेगु या। 7 मनूतय्‌गु मखु, बरु प्रभुयागु ज्‍या यानाच्‍वना धकाः मतिइ तयाः लय्‌लय्‌तातां ज्‍या या। 8 दास जूसां मजूसां भिंगु ज्‍या याःपिं न्‍ह्याम्‍हय्‌सित नं परमेश्वरं सिरपाः बियादी धकाः ला छिमिसं सि हे स्‍यू।

9 अथे हे मालिकतय्‌सं नं दासयात ख्‍याच्‍वः बीगु याये मते, छाय्‌धाःसा दासत व इमि मालिकत फुक्‍कसियां मालिक स्‍वर्गय्‌ दी धयागु खँ सीका ति। वय्‌कलं ख्‍वाः स्‍वयाः न्‍याय यानादी मखु।* ६:९ व्‍य १०:१७; कल ३:२५; ४:१

10 पौ क्‍वचाय्‌के न्‍ह्यः जिं छिमित धाये -- प्रभुयात विश्वास यानाः छिपिं वय्‌कःयागु शक्तिं बल्‍लाना च्‍वँ। 11 परमेश्वरं बियादीगु फुक्‍क ल्‍वाभः ज्‍वँ। अले छिमित शैतानं छुं यानाः नं स्‍यंके फइ मखु। 12 झीगु ल्‍वापु मनूत लिसे मखु। बरु आकाशय्‌ च्‍वंगु दुष्ट आत्‍माया शक्ति, थ्‍व खिउँगु संसारया शक्ति अले थ्‍व संसारया शासकत व अधिकार दुपिनिगु फौज लिसे खः।

13 अय्‌जूगुलिं परमेश्वरं बियादीगु फुक्‍क ल्‍वाभः ज्‍वँ। अले मभिंगु इलय्‌ शैतानं हय्‌क्‍काः वःसां छिपिं व नाप ल्‍वाये फइ। अले लिपा तकं छिपिं त्‍याना हे च्‍वनी। 14 उकिं न्‍ह्यचिला च्‍वँ। सत्‍ययागु जनी क्‍वातुक्‍क चिना च्‍वँ, धार्मिकताया छाती पाता घानाः तयार जु।* ६:१४ यशै ११:५; ५९:१७ 15 शान्‍ति बीगु भिंगु खँ न्‍यंकः वनेत लाकां न्‍ह्यानाः तयार जु।* ६:१५ यशै ५२:७ 16 विश्वास हे छिमित बचय्‌ याना तइगु ढाल खः। थुकिं छिमिसं शैतानयागु न्‍ह्याथेंज्‍याःगु मियागु बाण नं स्‍याये फइ। 17 मुक्ति हे छिमिगु तपुलि खः। अले आत्‍मां बियादीगु परमेश्वरयागु वचन तरवार खः।* ६:१७ यशै ५९:१७

18 न्ह्याबलें छिमिसं पवित्र आत्‍मायागु शक्ति कयाः प्रार्थना या, अले परमेश्वरयागु ग्‍वाहालि फ्‍वँ। होशियार जु, अले न्ह्याथासय्‌ च्‍वंपिं विश्वासीतय्‌गु निंतिं मदिक्‍क प्रार्थना या।

19 जिगु निंतिं नं छिमिसं प्रार्थना याना ब्‍यु। जिं नवाइबलय्‌ परमेश्वरं जितः वचन व नवायेत साहस बिया दीमा, अले जिं वय्‌कःयागु भिंगु खँ नं मेपिन्‍त बांलाक ध्‍वाथुइका बी फयेमा धकाः प्रार्थना या। 20 थ्‍व हे भिंगु खँ न्‍यंकेत जितः परमेश्वरं छ्वया हयादीगु खः। कुंका च्‍वनेमाःसां जिं गुकथं नवाये माःगु खः उकथं हे मग्‍यासे नवाये फयेमा धकाः नं छिमिसं प्रार्थना या।

21 प्रभुयागु ज्‍या याना च्‍वंम्‍ह विश्वास याये बहःम्‍ह झी यःम्‍ह किजा तुखिकसं छिमित जिगु खँ फुक्‍कं कनी।* ६:२१ प्रे २०:४; २ तिमो ४:१२ 22 जिमिसं छु याना च्‍वना धयागु खँ न्‍यनाः छिमित नं साहस दयेमा धकाः जिं वयात छ्वया हयागु खः।* ६:२१-२२ कल ४:७-८

23 दाजुकिजापिं, फुक्‍कसितं परमेश्वर बाः व प्रभु येशू ख्रीष्‍टपाखें शान्‍ति, दया माया व विश्वास दयाच्‍वने मा। 24 झी प्रभु येशू ख्रीष्‍टयात दुनुगलंनिसें माया याइपिं फुक्‍कसितं परमेश्वरयागु दया माया दयाच्‍वने मा।