थ्‍व प्रेरिततय्‌गु ज्‍याया सफू लूकां च्‍वःगु भिंगु खँया हे कथहं वयाच्‍वंगु खँ खः। थुकी पवित्र आत्‍मायागु शक्तिं ख्रीष्‍टया दकलय्‌ न्‍हापांयापिं चेलातय्‌सं वय्‌कःयागु भिंगु खँ यरूशलेम, यहूदिया व सामरियांनिसें सारा संसारय्‌ प्रचार याःगु खँ दु। थ्‍व यहूदीतय्‌ पाखें सुरु जुयाः सारा संसारय्‌ ख्रीष्‍टियन आस्थाया खँ प्रचार जूगु इतिहास खः। लूकां थ्‍व सफुलिइ ख्रीष्‍टियनत उबलय्‌या रोमी साम्राज्‍यया विरोधीत मखु, बरु ख्रीष्‍टियन विश्वास यहूदी धर्म पूवंकेत वःगु खः धकाः क्‍यनातःगु दु।

थ्व सफूयात थुकथं ब्वथलातःगु दु।

“प्रेरितय्‌” छगू मू खँ पवित्र आत्‍मायागु ज्‍या खः। पेन्‍तिकोस नखःबलय्‌ यरूशलेमय्‌ विश्वासीत पवित्र आत्‍मां जाःगु व उबलय्‌निसें पवित्र आत्‍मां विश्वासीत व मण्‍डलीया नायःतय्‌त आत्‍माय्‌ बल्‍लाकूगु व ग्‍वाहालि ब्‍यूगु खँ थुकी दु। ख्रीष्‍टयागु भिंगु खँयात थुकी उपदेश कथं नं न्‍ह्यथनातःगु दु। भिंगु खँयागु शक्ति फुक्‍क विश्वासीतय्‌के व मण्‍डलीयाके दु धकाः नं थुकी क्‍यनातःगु दु।