1 མི་ངན་ལ་ནི་ཕྲག་དོག་མ་བྱེད༌ཅིག །དེ་དང་འགྲོགས་པའི་རེ་འདོད་སྤང་བར༌གྱིས།། 2 རྒྱུ་མཚན་དེ་དག་སེམས་ཀྱིས་གདུག་རྩུབ༌སྙེག །དེ་ཚོའི་ཁ་ནས་བསྟན་བཤིག་གཏམ་གླེང༌བྱ།། 3 ཤེས་རབ་ལ་བརྟེན་ཁང་པ་བརྩིགས་པ༌དང༌། །གོ་རྟོགས་ཀྱིས་ནི་ཁང་པ་ཚུགས་པར༌བྱེད།། 4 ཤེས་ཡོན་བརྒྱུད་ནས་ཁང་མིག་སོ་སོ༌རུ། །རིན་པོ་ཆེ་དང་ཡིད་འོང་ནོར་རྫས༌འགེངས།། 5 ཤེས་ལྡན་སྟོབས་དང་ལྡན་པ༌དང༌། །ཤེས་ཡོན་ཅན་གྱི་མཐུ་སྟོབས༌རྒྱས།། 6 ཐབས་མཁས་ཀྱིས་ནི་གཡུལ་འགྱེད༌དགོས། །གྲོས་མི་མང་ན་རྒྱལ་ཁ༌ལོན།། 7 བླུན་པོར་ཤེས་རབ་ཆེས་འཕགས༌པས། །མཁར་སྒོར་དེ་ཡིས་ཁ་མི༌གྲགས།། 8 ཐབས་བཀོད་ངན་པ་འཐེན་མཁན༌ལ། །ངན་ཤོམ་བྱེད་པོ་ཞེས་སུ༌འབོད།། 9 བླུན་པོའི་གཡོ་ཇུས་སྡིག་པ་ཡིན་པ༌དང༌། །འཕྱ་སྨོད་མཁན་ལ་མི་རྣམས་ཞེན་པ༌ལོག། 10 སྡུག་བསྔལ་ཉིན་མོར་ཡིད་ཕམ༌ན། །ཁྱོད་ཀྱི་སྟོབས་ཤུགས་ཆུང་བ༌ཡིན།། 11 གསོད་དུ་འདྲུད་རྣམས་སྐྱོབ་པར༌གྱིས། །འཆི་ཁར་འཁྱོར་བ་ཕྱིར་འཐེན༌བྱོས།། 12 བདག་གིས་མ་ཤེས་ཞེས་སྨྲ༌ན། །མི་སེམས་སྲང་ལ་འཇལ་མཁན༌གྱིས། །དེ་ནི་རྟོགས་པ་མ་ཡིན༌ནམ། །ཁྱོད་ཀྱི་ཚེ་སྲོག་སྲུང་མཁན༌གྱིས། །དེ་ནི་མཁྱེན་པ་མ་ཡིན༌ནམ། །ཁོང་གིས་རེ་རེའི་བྱ་སྤྱོད༌བཞིན། །རེ་རེར་ལན་ཞིག་མི་གནང༌ངམ།། 13 ངའི་བུ་སྦྲང་རྩི་བཟང་བས་དེ་ཟོ༌ཞིག །སྦྲང་ཚང་ཁ་ཡི་སྦྲང་རྩི་ཁ་ལ༌མངར།། 14 ཤེས་རབ་ཁྱོད་ཀྱི་ཡིད༌ལ་ཡང་། །དེ་བཞིན་ཡིན་པ་ཤེས་པར༌གྱིས། །གལ་སྲིད་ཤེས་རབ་ཐོབ་ན༌ནི། །ཁྱོད་ལ་མཇུག་འབྲས་ལེགས་པོ༌འབྱུང༌། །རེ་ལྟོས་ཀྱང་ནི་ཟད་མི༌འགྱུར།། 15 ངན་པ་ཁྱོད་ནི་དྲང་པོ༌ཡི། །ཁྱིམ་ལ་རྒོལ་བར་མ་འཇབ༌ཅིག །དེ་ཡི་སྡོད་གནས་མ་བརླག༌ཅིག། 16 གང་ལ་ཞེ་ན་དྲང་པོ༌ནི། །ལན་བདུན་འགྱེལ་ཡང་སླར་འགྲེང༌ནུས། །ངན་པ་བར་ཆད་ནང་དུ༌ལྟུང༌།། 17 དགྲ་བོ་འགྱེལ་དུས་ཁྱོད་མ༌དགའ། །དེ་ཁ་རྡབ་དུས་སེམས་མ༌སྤྲོ།། 18 དེ་ནས་ཡ་ཝཱེས་གཟིགས་ན༌ནི། །ཁོང་ཉིད་ཁྱོད་ལ་ཐུགས་མི༌དགྱེས། །ཁོང་གི་ཐུགས་ཁྲོ་དགྲ་ལས༌འཐེན།། 19 ངན་པའི་ཕྱིར་དུ་སེམས་མ༌འབར། །དེ་ལ་ཕྲག་དོག་ཀྱང་མ༌བསྐྱེད།། 20 གང་ལ་ཞེ་ན་མི་ངན༌ལ། །མཇུག་འབྲས་ལེགས་པོ་ཡོད་མ༌ཡིན། །ངན་པའི་སྒྲོན་མེ་ཞི་བར༌འགྱུར།། 21 ངའི་བུ་ཁྱོད་ཀྱིས་ཡ་ཝཱེ༌ལ། །གུས་ཤིང་འཇིགས་པར་གྱིས་ཤིག༌ཨང༌། །རྒྱལ་པོ་ལ་ཡང་བཀུར་བར༌གྱིས། །ངོ་ལོག་ཅན་དང་མ་འགྲོགས༌ཤིག། 22 ཅིའི་ཕྱིར་ཞེ་ན་དེ་དག༌ལ། །གློ་བུར་ཉེས་ཆད་འབྱུང་བར༌འགྱུར། །ཡ་ཝཱེ་དང་ནི་རྒྱལ་པོ༌ལས། །བར་ཆད་ཅི་འབྱུང་སུ་ཡིས༌རྟོགས།།

23 གཤམ་གྱི་ཚིག་འདི་རྣམས་ཀྱང་ཤེས་ལྡན༌གསུང༌། །ཁྲིམས་ཐག་གཅོད་དུས་ཕྱོགས་རིས་འཛིན་པ༌ཐན།། 24 ངན་པར་ཁྱོད་ནི་མི་བཟང་རེད་ཅེས༌ན། །མི་སྡེ་ཀུན་གྱིས་དེ་ལ་དམོད་མོ༌འདེབས། །མི་རིགས་ཡོངས་ཀུན་དེ་ལ་ཞེ་སྡང༌སྐྱེ།། 25 ངན་པར་གཤེ་གཤེ་གཏོང་བར་དགའ་མོས༌འབྱུང༌། །བྱིན་རླབས་ཆེན་པོ་དེ་རྣམས་ལ་འཐོབ༌བོ།། 26 ཚིག་ལན་དྲང་པོར་སྨྲ་བ༌ནི། །མཆུ་སྒྲོས་སྟེང་ལ་འོ་སྐྱེལ༌བཞིན།། 27 ཕྱི་ཡི་ལས་ཀ་འགྲུབ་པར༌གྱིས། །ས་ཞིང་གྲ་སྒྲིག་ལེགས་པོ༌བྱོས། །དེ་ནས་ཁང་པ་བརྩིག་པར༌གྱིས།། 28 དོན་མེད་རང་གི་ཁྱིམ་མཚེས༌ལ། །གནོད་པའི་དཔང་པོར་མ་གྱུར༌ཅིག །མཆུ་སྒྲོས་མགོ་སྐོར་གཏོང་མི༌རུང༌།། 29 མི་ཡིས་ང་ལ་ཅི་བྱས༌ན། །ངས་ཀྱང་ཁོ་ལ་དེ་བཞིན༌བྱ། །མི་དེའི་ལས་ལ་འོས་པའི༌ལན། །འཇལ་བར་བྱ་འོ་མ་ཟེར༌ཞིག། 30 ང་རང་ལེ་ལོ་ཅན་གྱི་ཞིང་ཁ༌དང༌། །བླུན་པོའི་རྒུན་ཚལ་བརྒྱུད་ནས་འགྲོ་དུས༌སུ།། 31 གང་ས་གང་ལ་ཚེར་མ་སྐྱེས་པ༌དང༌། །ས་ངོས་ཡོངས་ལ་རྩྭ་ལྡུམ་གྱིས་ཁེབས༌ཤིང༌། །རྡོ་ཡི་ལྕགས་རི་ཞིག་རལ་གྱུར་པ༌མཐོང༌།། 32 བདག་གིས་ཅི་ཞིག་མཐོང་བར་བསམ་བློ༌བཏང༌། །ཞིབ་པར་བལྟས་ནས་བསླབ་བྱ་ཐོབ་པ༌འོ།། 33 ད་དུང་ཡུད་ཙམ་གཉིད་ཅིག་དང༌། །སྐད་ཅིག་ཙམ་ལ་གཉིད་དུ༌ཡུར། །ལག་པ་འཁུམས་ལ་ཨེན་ཙམ༌སྡོད།། 34 དེ་ནས་ཁྱོད་ཀྱི་དབུལ་ཕོངས༌ནི། །ཆོམ་པོ་བཞིན་དུ་བསླེབ་ཡོང༌ཞིང༌། །དཀོན་པོ་མཚོན་ཐོགས་ཚུལ་དུ༌བསླེབ།།