1 ༼དཱ་བིད་ཀྱི་མགུར༌མ།༽ བདག་གིས་སྔར་ནས་སྤྱོད་པ་དྲང་པོར༌སྤྱད། །གཡོ་བ་མེད་པར་ཁྱེད་ལ་བློ་གཏད༌པས། །ཀྱེ་ཀྱེ་ཡ་ཝཱེ་ང་ལ་དཀར་འདོན༌མཛོད།། 2 བདག་ལ་ཚོད་ལྟ་དང་ནི་བརྟག་པར༌མཛོད། །སེམས་ * འདིར་སེམས་ཞེས་པར་མ་ཕྱི་ལས་མཁལ་མ་ཞེས༌མཐོང༌།དང་སྙིང་ཁོང་རུས་པའི་གཏིང་ལ༌དཔྱོད།། 3 ཁྱེད་ཀྱི་བྱམས་བརྩེ་ནམ་རྒྱུན་མིག་མདུན༌དུ། །ཁྱེད་ཀྱི་བདེན་པའི་ལམ་ནང་འགྲུལ་བར༌བྱ།། 4 གཡོ་སྒྱུ་ཅན་གྱི་གྲལ་དུ་ང་མི༌འདུག །ཚུལ་འཆོས་ཅན་དང་འགྲོ་འོང་ངས་མི༌བྱེད།། 5 ངན་པའི་ཚོགས་ལ་ང་རང་སྡང་བ༌དང༌། །ངན་སྤྱོད་མཉམ་དུ་ང་རང་སྡོད་པ༌མིན།། 6 ཡ་ཝཱེ་བདག་གིས་ཉེས་མེད་མཚོན་ཕྱིར༌དུ། །ལག་ཟུང་བཀྲུས་ † ལག་ཟུང་བཀྲུ་བ་ཞེས་པ་ནི་ཡ་ཧུ་དཱའི་མི་རིགས་ཀྱི་གོམས་སྲོལ་ཞིག་ཡིན་པ༌སྟེ། བློ་སེམས་དཀར་བ་དང་ཉེས་པ་མེད་པའི་མཚོན་རྟགས་ཡིན། ནས་ཁྱེད་ཀྱི་མཆོད་ཁྲིར༌སྐོར།། 7 གཏང་རག་འབུལ་བའི་འབོད་སྒྲ་བསྒྲག་པ༌དང༌། །ངོ་མཚར་མཛད་པ་ཐམས་ཅད་བརྗོད་ཕྱིར༌རོ།། 8 ཡ་ཝཱེ་ཁྱེད་ཉིད་བཞུགས་སའི་གནས༌མཆོག་དང༌། །ཁྱེད་ཀྱི་གཟི་བརྗིད་གདན་སར་ང༌རང་དགའ།། 9 སྡིག་ཅན་ཁོངས་སུ་བདག་སེམས་མི་འཁྱེར༌ཞིང་། །ལག་དམར་ཁོངས་སུ་བདག་སྲོག་མི་ལེན༌རོགས།། 10 དེ་རྣམས་ལག་ཏུ་གཡོ་འཕྲུལ་ཡོད་པ༌དང༌། །གཡས་ལག་རྣམས་སུ་ལྐོག་རྔན་གྱིས་གང༌ངོ༌།། 11 འོན་ཀྱང་ང་རང་དྲང་པོར་འགྲུལ་བར༌བྱ། །ང་རང་བསྐྱབས་ནས་དྲིན་གྱིས་སྐྱོང་བར༌མཛོད།། 12 བདག་གི་རྐང་པ་བདེ་སྙོམས་ས་རུ༌ཚུགས། །ང་ཡིས་ཚོགས་ནང་ཡ་ཝཱེར་བསྟོད་པར༌བྱ།།