1 Jesús tsa'caen atesian nanimba Galileane sombopa Jordán na'en jonifani isepa ja. Tsa ande'qque Judea ande. 2 Tsain'bio a'i bopa tisei'ccu ja'fa. Tseni japa can'jemba Jesús pajisundeccuma ccushaen.

3 Majan fariseondeccu Jesúsma qqueñañe in'jamba jipa iñajampaña'fa:

—¿Manda'chota ti se'pi tsandie jongoesuve in'jan'da tise pushema catiye?

4 Jesús ccane'qque tise'pama iñajampaña:

—¿Attembi ti qui Chiga Tevaen'jen qquen su'choma: “Me'ttia'ye tsu Agattoen'su Chigaja a'ima agattoen. Tsandie, pushesuve'qque tsu agattoen.”? 5 Toya'caen tsu su: “Tsa'cansi tsu tsandieja tise yayama, tise mamama'qque catipa tise pushei'ccu fae'ngae canseya'cho. Tsa'caen fae'ngae cansepa tsu dos a'i fae a'iveyi da'fa.” 6 Chiga Tevaen'jen tsa'caen susi dos a'imbipa ñoa'me fae a'iyi tsu. Chiga tise'pama fa'engayi tsonsi a'ija tsa'caen fae'ccoe da'choma attufaembe can'faya'cho.

7 Jesús qquen susi ccase tsu iñajampaña'fa:

—Chiga tsa'caen in'jan'da ¿micomba tsu Tiseja Moisésma manda cuintsu a'i tise pushema catiye in'jan'da catiya'cho tevaen'jema tevaemba tise pushenga afepa catiye?

8 Jesús pañamba su:

—Nane que'i injama'cho shacasi tsu Moisésja tsa'caen que'ima manda antte que'i pushema cati'faye. Tsa'ma tseyi me'ttia'ye ande meinte tsu tsa'caen anttembi. 9 Ñoa'me gi que'ima su: Tsandu'pa faesu tsandiei'ccu japa can'jemba egae tsincon'ninda tise tsa'ndu tevaen'jema tevaemba tise pushenga afepa catiye ñotssi. Tsa'ma osha'cho ccaningae tson'chone injanga tisema catiye oshambi. Nane tsa'caen injanga tevaemba catipa faesu pushesuma pushe'ta tsa tsandie'qque egae tsincon. Toya'caen majan tsandie tsa catiye'cho pushesuma pushe'ta tsa tsandie'qque egae tsincon.

10 Qquen susi Jesúsma shondosundeccu tisema su'fa:

—Tsandie tise pushei'ccu tsa'caen tsinconsa'ne bove ñotssi tsu tsandie pushembe'yi canseye.

11 Jesús pañamba su:

—Nane poiyi'cco a'i tsu va atesian'choma paña'ma tsa'caen tsoñe osha'fambi. Majanga Chiga anttesi tsa'caen canseye osha'fa. 12 Nane majan tsandie chuitepie ai'vo dañongepa ñotsse coembipa pusheye osha'fambi. Faesuja cca'indeccunga dañoñemba pusheye osha'fambi. Toya'caen majan a'ija Chigama na'sian'cho a'ive dapa pusheye in'jan'fambi. Tsa'cansi tsu majan osha'ta va atesian'jen'choma pañamba tsa'caen tsoña'cho.

13 Tsonsi chambanaccu tise'pa dushundeccuma Jesúsnga i'fa cuintsu Jesús dushundeccuma pporaeñe. Pporaemba tise'pane Chigama iñajañe. Tsa'ma toya jiña'fasi Jesúsma shondosundeccu Jesúsnga catseye se'pi'fa. 14 Jesús attepa su:

—Antte'faja cuintsu dushundeccu ñanga ji'faye. Se'pimbe can'faja. Nane Chigama na'sian'cho aindeccuja va dushundeqquia'caen ñame in'jamba ji'fa.

15 Qquen supa tise tivei'ccu dushundeccuma pporaemba Chigama iñajan. Iñajan nanimba ccani ja.

16 Tse'i chu'a tsandie Jesúsnga catsepa iñajampaña:

—Ñotssia atesian'su, ¿jongoesu ñotssiama gi tsoña tsangae canseye?

17 Jesús tisema su:

—¿Jongoesie qui ñamajan ñotssia qquen inisian? Fae'ccoyi tsu ñotssia. Chiga Quitsayi tsu. Tsa'ma queja tsangae canseye in'jan'da manda'choma pañamba tsoña'cho.

18 Qquen susi tsandie iñajampaña:

—¿Majan manda'choma tsu pañamba tsoña'cho?

Tsonsi Jesús su:

—Cca'ima fi'ttijama. Faesumbe pushei'ccu cansejama. Cca'najama. Afopoenjama. 19 Que yaya, que mamama ñotsse in'jamba pañajan. Tisuma in'janqquia'caen faenga'suma ñotsse in'janjan.

20 Qquen susi chu'a tsandie Jesúsnga su:

—Tsa'caen gi pañamba canse. ¿Jongoesuma tsoña'cho tsu shaca?

21 Qquen iñajampañasi Jesús su:

—Ñoa'me ño'ame daye in'jan'da japa que an'bian'choma chavaemba corifin'dima isupa va'chandeccunga attufaenjan. Tsa'caen pa'ccoma afepa qui tsain'bitsse Chiga sefacconi an'biaña. Tsa'caen tsomba ñai'ccu fae'ngae jija.

22 Tsa'ma chu'a tsandie tsama pañamba ñoquimbi'ccoe dapa ja. Nane osha'choma an'biamba ñombi'ye.

23 Tsonsi Jesús tisema shondosundeccuma su:

—Ñoa'me gi su: Aiye'pa tsu rico a'i Chigama na'sian'cho a'ive daye. 24 Ju, ccase gi que'ima su: Ti'tssecan'da tsu oshambi'ye'can rico a'i Chigama na'sian'cho a'ive daye. Nane bove aiye'pambi tsu camelloja nojan'cco chango'ye panshañe.

25 Shondosundeccu tsama pañamba asi'ttaemba su'fa:

—Tsa'caenda ¿majan tsu ccushaya?

26 Tsa'ma Jesús tise'pama camba su:

—A'ija tsa'caen osha'fambi. Tsa'ma Chigaja osha'choma oshacho.

27 Tsonsi Pedro su:

—Na'su, ingija osha'cho ingi an'bian'choma catipa gi quei'ccu fae'ngae jacan'fa. ¿Jongoesuma gi isu'faya?

28 Qquen susi Jesús su:

—Ñoa'me gi su: Jai'ngae osha'cho cuname dasi Sefaccone Ji'cho A'i tise ñotssia dyaipa'chonga dyaipa manda'nijan que'i'qque doce dyaipa'chonga dyaipa doce israendeccu'su aindeccuma manda'faya. 29 Nane poiyi'cco majan tise'pa tsa'o, tise'pa quindya, quinshin, she'she, que'tte, yaya, mama, pushe, dushundeccuma tise'pa andema'qque catipa ñame in'jan'da, tsaja cien se ti'tsse tsu isu'faya. Toya'caen tsu tsangae ñotsse canse'faya. 30 Tsa'ma tsain'bio majan ja'ño joccapitssiandeccu utu'ccoe tsu da'faya. Toya'caen tsain'bio ja'ño utu'ccoandeqquia tsequi a'ta joccapitssia've tsu da'faya.