1 Israendeccu pan cupana'cco mechoa fiesta pan napiji. Tsaja Chiga panshaen'cho injienge'cho a'ta'su fiesta. 2 Chigama afa'su nasundeccu, Chiga Tevaen'jema atesu'chondeccu'qque Jesúsma fi'ttive in'jamba tta'tta'fa ma'caen a'tutsse fi'ttiya'chove. A'i bo'fa'choma dyopa tise'pama qquejeccoeñe in'jan'fambi.

3 Fa'e Jesúsma shondo'suja, Judas Iscariote tsu. Cocoya na'su, Satana, tise injama'choma in'jaensi 4 Judasja japa Chigama afa'su nasundeccui'ccu sundaro capitándeccui'ccu condasecco ma'caen Jesúsma tise'panga afeya'chove. 5 Tsendeccuja avujapa Judasnga corifin'dima afeye su'fa. 6 Tsonsi Judasja afeye qquen supa japa tta'tta maqui a'i bo'fambi'te Jesúsma afeye cuintsu indi'faye.

7 Pan cupana'cco mechoama aña'cho a'ta napi. Tsequi a'ta tsu Chiga panshaen'cho injienge'cho ovejama'qque fi'ttiya'cho. 8 Tsa'cansi Jesúsja Juani'ccu Pedroma moen qquen supa:

—Japa ñoña'faja Chiga panshaen'cho injienge'cho aña'choma aña'chove.

9 Tise'paja su'fa:

—¿Mani qui in'jan ingi ñoña'faye?

10 Jesúsja tise'pama su:

—Que can'faja. Canqquenga ca'nimba qui a'i tsa'ccu tsoripama angaji'choma cachui'faya. Tisema omboemba ja'faja. Mani tise ca'ni'ninda que'i'qque ca'nimba 11 tsa tsa'o na'sunga conda'faja: “Atesian'su Jesús tsu quema iñajampaña: ¿Mani tsu queni pasiasundeccu cuarto? Tseni gi ñajan ñama shondosundeccui'ccu Chiga panshaen'cho injienge'cho aña'choma aña.” 12 Sefani'su ppappacco rande cuartoma tsu tiseja que'inga canjaeña. Tseni tsu osha'cho jin que'i sho'ccoemba ñoña'faya'cho ingi añe. Tseni japa ñoña'faja.

13 Tise'paja japa osha'choma Jesús suqquia'caen attepa Chiga panshaen'cho injienge'cho aña'choma sho'ccoen'fa.

14 Añe bopa Jesúsja tisema shondosundeccui'ccu an'jen'cho mesa jin'tti piyive ccuipa 15 tise'pama su:

—Ñoa'me gi va injienge'cho aña'choma que'i'ccu añe in'jan ña vanaña'cho toya napimbi'te. 16 Ccase añambi gi va panshaen'cho injienge'cho aña'choma Chiga a'i egae tsincon'choma panshaemba joqquitssiaña'gae. Tsequi a'ta gi poiyi'cco Chiga aindeccui'ccu fae'ngae bopa ccase an'faya.

17 Tsomba tasama isupa tsane Chigama ñotsse afapa tisema shondosundeccuma su:

—Vama isupa poiyi'cco fae'ngae re'riccoe cu'i'faja. 18 Ñoa'me gi su ja'ño cu'ipa gi ccase va o'fa tsaja tsa'ccuma cu'iya'bi Chigai'ccu poiyi'cco Tise aindeccu fae'ngae bo'faya'ngae.

19 Tsomba Jesús panma isupa tsane'qque Chigama ñotsse afapa doñamba tise'panga attufaen qquen supa:

—Vaja ña ai'vo tsu. Que'ine gi ña ai'voma afe. Tsa'cansi va panma an'da ña que'ine afe'choma injan'jen'faja.

20 Omboe pa'ccoma an nanimba tasama'qque isupa afe. Tasama afepa qquen tsu su:

—Chiga Quitsa aindeccui'ccu cuname injancco'fa'choma condasesi ña anjampa tsu tsane tssaña'cho. Que'ine gi ña anjampama tssañaña. Va o'fa tsaja tasa tsu ña anjampa tssamba ccushaen'choma canjaen.

21 Tsa'ma que can'faja ñama chi'gapa afe'su tsu fae'ngae va mesani ñai'ccu an'jen. 22 Ñajan Sefaccone Ji'cho A'i gi Chiga mandaqquia'caen paya. Tsa'ma va'cha tsu ñama chi'gapa afe'su.

23 Jesús qquen susi tisema shondosundeccu tisupaporai'ccu condasecco'fa majan tsu tsa'caen Jesúsma chi'gapa afeya'cho.

24 Toya'caen tsu afacco'fa majan tise'pa'su ti'tsse joccapitssia. 25 Tsonsi Jesús tise'pama su:

—Israembindeqquia nasundeccuja tise'pa a'ima manda'fa. A'ima fuiteye tsa'caen manda'fa qquen tsu su'fa. 26 Tsa'ma que'inejan tsa'cambi tsu. Que'inejan majan ti'tsse'tssia tsu utu'ccoe daya'cho. Manda'su tsu shondo'sia'caen daya'cho. 27 ¿Majan tsu ñoa'me ti'tsse'tssia? ¿Mesani an dyai'su? Tsambi'ta ¿semamba o'fian'su? Ju, mesani an dyai'su tsu ti'tsse'tssia. Tsa'ma ñajan tsa sema'sia'caen que'i'ccu can'jen.

28 Que'ija ñai'ccu fae'ngae jacamba qui ñai'ccu fae'ngae vana'jen'fa. 29 Chiga ña Quitsaja tayo tsu ñama na'suve manda. Tsonsi tsa'caen gi ña'qque que'ima na'suve manda cuintsu 30 ña na'suve dasi que'i'qque ñai'ccu ña an'jen'cho mesanga fae'ngae amba cu'i'faye. Que'ija na'su dyaipa'chonga dyaipa qui poiyi'cco israendeccumbe injama'choma somboeñe manda'faya.

Toya'caen tsu Na'suja su:

31 —Simón, Simón, vama canjan. Satanajan poiyi'cco que'ima in'jamba iñajan trigoma qque'shoqquia'caen que'ima vanaeñe. 32 Tsa'ma ñajan quene gi Chigama iñajan que ñame in'jan'choma qquesa'ne. Vana'jen'cho panshansi ccushapa que faengasundeccuma'qque quiñaenjan.

33 Tsama pañamba Pedro tisema su:

—Na'su, quema picco'je'ttinga picco'fa'ninda gi ña'qque quei'ccu fae'ngae piccoyeya. Quema fi'tti'fa'ninda gi ña'qque quei'ccu fae'ngae paya.

34 Jesúsja su:

—Pedro, ñoa'me gi quenga su: Arapa gayo toya ja'ño a'ta se'yombi'te queja ñane tres se a'tieña “Tisema atesumbi gi” qquen supa.

35 Tsomba Jesús poiyi'ccoma iñajampaña:

—Ña que'ima bosa ni o'va ni sapatove'qque me'ccoe manda moe'ninda ¿jongoesu tsu shaca?

Tise'paja su'fa:

—Me'i, shaca'fambi.

36 Tsonsi Jesúsja su:

—Tsa'caen tayoe mandapa gi ja'ñojan que'ima conda: Majan bosapa'ta tsama angaya'cho. O'vama'qque tsa'caen. Majan a'i sundaro matichive mechota bove ñotssi tsa tise omba'su ondiccu'jema chavaemba sundaro matichima chavaye. 37 Ñoa'me gi su: Va Chiga Tevaen'jen ñane su'choja ja'ño tsu napi: “Egae tsinconsundeccui'ccu tisema in'jan'fa.” Pa'cco ñane tevaen'cho tsu junde napiya'cho.

38 Tise'paja su'fa:

—Na'su, que canjan. Vani gi an'bian'fa dos sundaro matichima.

Jesúsja camba su:

—Nanitssi tsu.

39 Tsomba Jesúsja sombopa tise in'janqquia'caen Olivo ccotta'cconga ja. Tisema shondosundeccu'qque fae'ngae jaja'fa. 40 Tseni napipa Jesús tise'pama su:

—Chigama iñajan'jen'faja egae tsinconsa'ne.

41 Tsomba tiseja ti'tsse joccani ja –biambi'ccoe– patuma ttovaqquia'can'ccoe. Japa ccaru dyaipa Chigama iñajamba 42 su:

—Yaya, que in'jan'da va ña vanaña'choma joqquitssianjan. Tsa'ma joqquitssiañe in'jambi'ta que in'janqquia'caen tsonjan. Ña in'jan'chomajan me'i.

43 Tsonsi Chigama sefacconi'su shondo'su Jesúsnga attiamba tisema quiñaen. 44 Tsa'caen ñoa'me vana'jemba ti'tsse quia'me Chigama iñajan. Poipa'su'qque sombopa ñoa'me injan'tsse anjampa tssanqquia'caen andenga amppi'je.

45 Chigama iñajan nanimba jangipa tisema shondosundeccunga japa tise'pa ñombi'yepa ana'jen'choma atte. 46 Attepa tise'pama su:

—¿Micomba qui ana'jen'fa? Jangipa Chigama iñajan'jen'faja egae tsinconsa'ne.

47 Tise toya afa'je'ni tsain'bio a'i jiña'fa. Jesúsma shondo'su Judas tsu a'ima angacan. Tiseja Jesúsma mochaye catse. 48 Tsa'ma Jesús tisema su:

—Judas, ¿Aqquia ti qui in'janqquia'caen mochapa Sefaccone Ji'cho A'ima cca'indeccunga afeya?

49 Tsonsi Jesúsi'ccu jacansundeccuja ma'caen tsoña'chove in'jamba su'fa:

—Na'su, ¿matichi'ccu iyicco'faya'an ti gi?

50 Qquen supa fa'e tise'pa'su Chigama afa'su na'sumbe sema'suma atuipa tise tansinfa'su tsosinama qquerui ttova. 51 Tsa'ma Jesúsja su:

—¡Anttéja! Panshaen jova'caen tsinconjama.

Qquen supa sema'sumbe tsosinama pporaemba toeningatsse ccushaen. 52 Omboe Chigama afa'su nasundeccu, sundaro capitándeccu, israe'su coenzandeccu'qque tsa'caen Jesúsma indiye ji'fasi Jesúsja tise'panga su:

—¿Ccanambama indiye jiqquia'caen ti qui sundaro matichi, quini'ccoi'ccu ji'fa? 53 Ñajan Chiga ettini poi a'ta que'i'ccu can'jen'ma qui ñama pporaen'fambi. Tsa'ma va tsu que'i patsuya'cho hora. Sinttia'su na'su, Satana, tsu ja'ño patsu.

54 Tsonsi Jesúsma qquitssa indipa anga'fa. Chigama afa'su na'su ettinga angapa ca'nian'fa. Pedroja omboe biacca jacan. 55 Aindeccu tsa'o atandundunga si'ngema setsaemba sa'vuye dyai'fasi Pedro'qque fae'ngae tise'pai'ccu dyai. 56 Pedro si'nge anchanda'cho a'tatssiani dyaisi sema'su pushesu tisema attepa can'boemba su:

—Va a'i'qque tsu Jesúsi'ccu canjen'su.

57 Tsa'ma Pedroja qquen supa a'tien:

—Pushesu, ni ñajan tisema atesumbi.

58 Omboe faesu'qque Pedroma attepa su:

—Que'qque tsendeccu'su qui.

Tsa'ma Pedroja su:

—Tsandie, me'i gi.

59 Fae hora'ca'en pasasi faesuja quia'me qquen su:

—Ñoa'me tsu va tsandieja Jesúsi'ccu canjen'su. Tise'qque Galilea'su.

60 Tsa'ma Pedroja su:

—Tsandie, atesumbi gi que jongoe qquen su'choma.

Tse'faei'ccuyi arapa gayoja se'yo. 61 Se'yosi Na'su Jesúsja piyicamba Pedroma can'boen. Tsonsi Pedroja Na'su Jesús qquen su'choma in'jan: “Arapa gayo toya ja'ño a'ta se'yombi'te queja ñane tres se a'tieña.” 62 Tsa'caen in'jamba Pedroja sombopa quia'me i'na.

63 Tsonsi Jesúsma indisundeccuja tisema afasepa tsse'tsse'fa. 64 Tise tso'fema sarupai'ccu tandamba tise cambajuma tssaipa iñajampaña'fa:

—Injama'choi'ccu in'jamba condaja majan tsu quema tssai.

65 Toya'caen osha'cho egae afa'choi'ccu tisema afase'fa.

66 Cosepa a'tasi poiyi'cco israe'su coenzandeccuja bo'fa. Poiyi'cco Chigama afa'su nasundeccu, poiyi'cco Chiga Tevaen'jema atesu'chondeccu'qque bo'fa. Tsa'caen bo'fa'chonga Jesúsma angasi nasundeccuja tisema su'fa:

67 —¿Queta ti qui Chigambe Cristo? Inginga condaja.

Tsa'ma Jesúsja su:

Que'inga conda'ni'qque qui ñama paña'faya'bi. 68 Ña que'ima iñajampaña'ni'qque qui ñanga conda'faya'bi. 69 Tsa'ma Chigaja osha'choma oshacho. Ñajan Sefaccone Ji'cho A'i. Jai'ngae gi Chiga Quitsai'ccu dyaipa fae'ngae osha'choma mandaya.

70 Tsonsi tsu poiyi'cco su'fa:

—¿Tsa'caenda ti qui Chiga Dutssi'ye?

Jesúsja tise'pama su:

—Ju, que'i suqquia'can gi.

71 Tsonsi tsu su'fa:

—¿Micomba gi camba afasundeccuve ti'tsse ttatta'je'fa? Tayo gi tise aya'fai'ccu tise su'choma paña'fa.