1 Kitci minodee kidjiki8enan Pebe (Phébé) ka ijinikazodj. Aa ik8e oteb8eta8an Kije Manidon tabickotc kekina8it, acitc okitci 8idjian ini8e ka teb8etamindjin ka ma8adjiidindjin kidji aiamiendjin 8edi Senkania (Cenchrées) odenag. 2 8e8enda todaok, ke8in mega otibenimigon ka Tibendjigendjin. 8e8enda kiga toda8a8a, tabickotc Kije Manido odanicinabeman enendagozindjin kidji mino todadindjin kakina pepejig e tacindjin. Minik kakina kegoni ke nodeseg8en. Ogi kitci 8idjian mega mane a8iagon, acitc kenin nigi kitci 8idjiig.

3 Nidanamika8ag Parisila (Priscille) acitc Akilas (Aquilas). Ma8asag nigi mikimomin, e anokita8agidj Jesos Christ. 4 Meg8adj ka taji kitci nanizaniziaban, ki ick8ata8ag kidji nibo8adj e pi nda 8idjiiji8adj. Kitci mig8etc dac nidinag, acitc ka8in nin eta ii ka inag8a, mig8etc acitc odigo8an kakina ega ka Coda8inni8indjin egi ani teb8etamindjin, pepakan ka ma8adjiidindjin kidji aiamiendjin.

5 Nidanamika8ag acitc igi8e ka teb8etamo8adj ka ma8adjiidi8adj kidji aiamie8adj 8edi Parisilan acitc Akilasan omigi8aminikag.

Nidanamika8a Epinetas (Épaïnète) ka kitci sagiag. 8intam ogi madji teb8eta8agoban Jesos Christan Eja (Asie) akikag.

6 Nidanamika8a Mani, kagi kitci nak8idj kidji 8idjiigo8eg.

7 Nidanamika8ag nitcina8emaganag Andaronikos (Andronicus) acitc Jonias (Junias). Nigi 8idji tajikemidimin kibaodimigi8amikag. Kitci inenimagani8i8ag igi nabeg, acitc Jesos Odanodaganan inagimagani8i8ag. 8intami8a ogi teb8eta8a8an Jesos Christan ab8amaci nin.

8 Nidanamika8a ni8idji8agan Ampliatos. Nikitci sagia, nimama8inomin mega e teb8eta8agidj ka Tibendjigedj.

9 Nidanamika8a Oben (Urbain). Nigi 8idji mikimomanan, ma8asag e anokita8agidj Jesos Christ.

Nidanamika8a acitc ni8idji8agan Stakis (Stachys) ka kitci sagiag.

10 Nidanamika8a Apelles. Ki kitci kodagito osa egi teb8eta8adjin Jesos Christan, acitc ki 8abadai8e adi epitci sogi teb8etag.

Nidanamika8ag igi8e ka tajike8adj Aristobolan (Aristobule) omigi8aminikag.

11 Nidanamika8a nitcina8emagan Herodion.

Nidanamika8ag igi8e ka teb8eta8a8adjin ka Tibendjigendjin ka tajike8adj Narasisan (Narcisse) omigi8aminikag.

12 Nidanamika8ag igi ik8e8ag Taripen (Tryphène) acitc Taripos (Tryphose), ka anokita8a8adjin ka Tibendjigendjin.

Nidanamika8a Perside, ni8idji8agan ka kitci sagiag. Ki kitci nak8i aa ik8e, e anokita8adjin ka Tibendjigendjin.

13 Nidanamika8a Ropos (Rufus), aa nabe maiagotc ka kitci mino anokita8adjin ka Tibendjigendjin. Nidanamikaoman acitc odjodjoman, kenin maiagotc pejig8an nidjodjom ka apitenimag.

14 Nidanamika8ag Asinkaritas (Asyncrite), Panegon (Phlégon), Emes (Hermès), Patrobas, Emas (Hermas), acitc igi8e kodagiag ka teb8etamo8adj ka 8idji8a8adjin.

15 Nidanamika8ag Pilologas (Philologue), Joli (Julie), Olimpas, Nere, acitc Nere omisezan, acitc kakina Kije Manido odanicinabeman ka 8idjiogo8adjin.

16 Anamikodadiok kakina pepejig ka tacieg, kidji 8abadaidieg e sagiidieg, kina8a Kije Manidokag ka iji tibendagozieg.

Kidanamikago8ag kakina ka teb8eta8a8adjin Jesos Christan, pepakan ka taji ma8adjiidi8adj kidji aiamie8adj.

17 Nidjiki8eg! Ki8idamonom dac kidji iag8amieg igi a8iagog ka iji kikinoamage8adj pakan kina8a kagi pi iji kikendameg. O8i nenicikebina8an ka teb8etamindjin, acitc o8i pakebina8an. 8imackaokog igi! 18 Ka8in odanokita8asi8a8an ka Tibendjigendjin Jesos Christan igi a8iagog. Tiegodj 8ina8a tibina8e adi eji mosa8endamo8adj otodana8a. Kitci minotagozi8ag, acitc omin8adjima8an a8iagon. Midac iidi eji 8agackibina8adjin ini8e ega ka nisida8inago8adjin ega k8aiak e kikinoamage8adj. 19 Kina8a dac, kakina a8iagog okikendana8a adi epitci ndota8eg ka Tibendjigedj. Nikitci modjigendan dac kina8a odji. Anic dac kinada8eniminom kidji nisida8inameg 8egonen men8acig, kidji gi odji mino ijitcigeieg, ega dac kidji gi pabamendameg madji kegon. 20 Kije Manido, ka minigo8ak ako pekadendamo8ini, aja pecodj oga cagodjian madji manidon kina8a odji, kidji gi tebieg.

8egona ca8enimigo8eg ka Tibeniminak Jesos Christ.

21 Timote (Timothée) ka 8idji mikimomag kidanamikago8a. Nitcina8emaganag Losios (Lucius), Jason acitc Sosipaten (Sosipatros) kidanamikago8ag ke8ina8a.

22 Nin Tenitios (Tertius) kagi ojibiaman oo8e Pon ka 8i igo8egoban. Kenin kidanamikonom, kimama8inomin mega e teb8eta8aiak ka Tibeniminak.

23 Kaios (Gaïus) kidanamikago8a. Nin Pon, nitajike ooma Kaios omigi8amikag, acitc kakina ka teb8etamo8adj ooma ma8adjiidi8ag omigi8aminikag e pi nda aiamie8adj. Enastos (Éraste), ka mikimadjin odena conian, acitc kidjiki8enan Koritos (Quartus), ke8ina8a kidanamikago8ag.

24 [8egona ca8enimigo8eg ka Tibeniminak Jesos Christ kina8a kakina.]

25 Icpenimadan Kije Manido! 8in okackiton kidji sogigaba8iigo8eg kiteb8etamo8ini8akag, kiteb8etana8a mega ii min8adjimo8in ka paba tibadjimo8an, e paba mikomag Jesos Christ. Nogom ki kikendamoni8e Kije Manido ii min8adjimo8ini, odakanag ako ka kadamago8akoban. 26 Nogom dac aja kigi kikendamonigomin ii min8adjimo8in. Kije Manido mega, 8in kagige ka tedj, ogi anonan mane oniganadjimo8inniman kidji mikodamindjin ii min8adjimo8ini omazinaigani8akag, kakina ka inakanezi8adj kidji gi teb8eta8a8adjin acitc kidji gi ndota8a8adjin Kije Manidon.

27 Kagi pi todag dac Jesos Christ odji, apanigotc mojag icpenimadan Kije Manido, 8in eta ka kagita8endag! Amen.