23
Kúrí Yéesú fíi Pilaat
(Saame Maccëe 27.1-2, 11-14 ; Marka 15.1-5 ; Saŋ 18.28-38)
1 Ɓëewë ɓéeɓ koluute, kúrúté Yéesú Pilaat gëernëerë në, 2 na yabu ri iñƴee wonu tih : « Ɗi homaˈ daaha ɓeke ɓëy gina nuf, kaddee wa yeraˈ túm, te ri tík afi Buura Koo fal ri ra. » 3 Pilaat meelte Yéesú won ɗi tih : « Daa fu buuri yëwúɗɗë ë ? » Yéesú won ɗi tih : « Fu wonte ri, daa mi ! » 4 Pilaat won kélfë yí seeƴoh ya a ɓëewí kayya húmú në rë ɓéeɓ tih : « Mi olay yii mín tah ow keen sun fi ɓëyí beh. » 5 Ndaa ɓëewë ɓaatutee ɓéyíɗ unni wa sun na wonu tih : « Ɗi ñeyaˈ yëeddëˈ yí, yahe nuffi ɓëewë. Ɗi dalaˈ Galile, ñeete Yúdée ɓéeɓ níi rí lahte dee woteh. »
6 Kelaˈ Pilaat unni ƴaa ra, ɗi meelaˈte won tih : « Ɗi ɓëy Galile woo ? » 7 Ɓëewë wonu ri tih : « Ɗi dék në kay ! » Pilaat yúhté biti Erot daa ílíf Galile fi baaha, te ɗi fi Erot húmú Yerusalem waalli ƴaaha, ɗi yeeltee yeñ ɓëewë kúɗ Yéesú ɗii na.
8 Olaˈ Erot Yéesú rë, keeña sosse níi sos, ndah ri húmú kelohte ban fi, te ri maañcee fahaˈ oli. Ɗi fahaˈte rii ot page kimtaan. 9 Ɗi meelte ri yin caak, ndaa Yéesú tahay ɓúkí ɗii na. 10 Kélfë yí seeƴoh ya a yëeddëh yí kootii Mëyíis digirute unni wa na yabu Yéesú yin caak. 11 Erot a soldaarri ɓal na ñaawlu Yéesú, ɓekute ri búubí wunte na këekkëlíyú rí. Filoon fi baaha, Erot yejaatte ri Pilaat na. 12 Erot a Pilaat na húmú tëfrëntíih kíi, ndaa dalaˈte yiin fin fa wa henute kooƴ.
Tígí Yéesú húl
(Saame Maccëe 27.15-26 ; Marka 15.6-15 ; Saŋ 18.39 níi 19.16)
13 Pilaat dëekrëhté kélfë yí seeƴoh ya, ɓaha ya a ɓëy gina, 14 won wa tih : « Ɗon wonu ti ɓëeˈ komu ron soˈ bee ra yahaˈ nuffi ɓëy gina yahoo. Mi meelaˈ ri fíiyën, ndaa mi olay yin di iña yabu ron ɗi ra. 15 Erot ɓal ɗaaha, daa tah ɗi yeñ ri soo na. Ɓëyí bee pagay yii cal ɗi hawu húl. 16 Cëe mi laɓiroh ri laraw, mi yeris ri. » [ 17 * 23.17 Ɓëewë húmú ñeyaatu unni ƴee bín fë woraˈi wa ɓëewë rë, lahte na ƴi húmú bíníyú yii beh : Lahaa feedi Paak ɓéeɓ, Pilaat waɗtee ɗúhríɗ ɓëy gina ow yínë kasu, yeris ri.] 18 Ndaa wa ɓéeɓ na ɗaañnjuu wonu tih : « Hawe ri húl, fu ɗúhríɗ fun Barabaas. » 19 Ɗi fi Barabaas húmú non ɓëewë na haaˈuu njíittí gina ra, te ri húmú happe ow húl ɓal, daa tah ri téƴú kasu.
20 Bi fahaˈ Pilaat yeɗɗi Yéesú, ɗi ɓeyaatte una, woni biti Yéesú pagay yin ɓos. 21 Ndaa ɓëewë ɓaatutee ɗaañnjoh na wonu tih : « Daaƴe ri kurwah ɓal ! Daaƴe ri kurwah ! » 22 Pilaat ɓeyaatte una waali éeyë fë won wa tih : « A ri paŋ yii ɓosi bih ? Mi ollay ri yii cal hawaa húl. Cëe mi laɓiroh ri laraw, mi yeris ri. » 23 Ndaa wa na ɓaatuu ɗaañnjoh na wonu tih : « Daaƴe ri kurwah ɓal ! Daaƴe ri kurwah ! » Ɗaañnjohi misiga kúrëelëhté Pilaat 24 níi ri tahte pagri wa yee fahuu wa ra. 25 Tígí daaha, Pilaat ɗúhíɗté Barabaas fa fahuu wa biti daa yeɗɗun ra, ɗi fa yahi nuffi ɓëewë a hap ow húl daa húmú tah ri téƴú rë, yeɗɗaˈte wa Yéesú.
Kúrí Yéesú tígë nay rii hawuu húl rë
(Saame Maccëe 27.32 ; Marka 15.21)
26 Na kúrú soldaarra Yéesú tígë nay rii hawuu húl rë, wa teeˈuute a ɓëyí dék Siren, hínú Simoŋ, ɗeef ɗi kolaˈ meey. Wa habute ri, enute ri kurwaha, ñéyrúté rí filoon Yéesú. 27 Ow caak ñeyute filoon Yéesú. Ɓeleɓ caak húmú filiɓ fi wa, na fogu ri na hawuu. 28 Yéesú yíssëhté waa na, won wa tih : « Ɗon fi ɓeleɓɓi ɓëy Yerusalem, ngënë lëeyí sëˈ, lëeyí affon a koyyon ! 29 Jamanu ay lah, ɓëewë won tih : “Lahute sos-keeñ, ɓeleɓɓa míníh pok loo ra, ƴee mësúy lah koy, ƴee mësúy kúu rë !” 30 Tígí daaha, ɓëewë ay nah daŋŋa keen sun fi wa, won dúŋŋë súuƴ wë.✡ 23.30 Saame Oose 10.8 31 Kilik hilsiɗ daa míntí henu ɗee raa, mas kilik súhíɗ ! »
32 Soldaarra kúrëelúuté banndi ana ɓal, ƴi ay hawu húl a Yéesú.
Daaƴi Yéesú kurwah
(Saame Maccëe 27.33-44 ; Marka 15.22-32)
33 Lahuu wa tígë në wonuu Këeŋ-af ra, wa daaƴute Yéesú kurwah. Wa daaƴaaluute banndi yi ana ya ɓal : ɓëyí yínëe paaˈte Yéesú yaˈ ñamaa, yínëe paaˈte ri yaˈ sugu. 34 Yéesú won tígí daaha tih : « Baap, baale wa, ndée wa yíih yee na pagu wa bee ra. » Soldaarra púlúfúté búuɓɓí Yéesú, woruute wa hanndal ki wa. 35 Ɓëewë cagute na olsuu. Kélfë yí yëwúɗɗë na ñaawlu Yéesú wonu tih : « Ɗi sëmlëey i ow kay woo ? Ɗi sëmlëe afi ɓal hena biti daa ri Buura Koo fal ri ra kaah ! » 36 Soldaarra na ñaawlu ri ɓal. Wa ɓeyute bineegar, leɓuute ri na fahuu hënndí, 37 wonu ri tih : « Hena biti daa fu buuri yëwúɗɗë rëe, sëmlée afu ! » 38 Wa bíníyúté unni ƴee yeeddaˈ ki afa sun : « Ɓëyí bee daa buuri yëwúɗɗë. »
39 Banndii yínëe hom sun fi kurwahi, na sol Yéesú won ɗi tih : « Fu won neh daa fu Buura Koo fal ri ra a ? Sëmlée afu, fu sëmlëˈ fun na ɓal ! » 40 Ndaa banndii yínëe na won afa tih : « Ɗo fu kaañce Koope déˈ ! Ɗoni ɓëyí bee daa boku daan ee. 41 Bi yen waɗte : yen yínlú iña pagu yen ɗa kat ! Ndaa ɗi fi bee pagay yin ɓos. » 42 Ɗi antee won tih : « Yéesú, lah hele nuf soo na biti fu took Nguur ku. » 43 Yéesú won ɗi tih : « Mee roo won kaaf ka ra ee : woteh fee Koo beh, fay home soo na Aljana. »
Húlí Yéesú
(Saame Maccëe 27.45-56 ; Marka 15.33-41 ; Saŋ 19.28-30)
44-45 Lahaˈ naˈ leelu af ra, gina ɓéeɓ ñúussé túɗ níi mitte wahtu éeyë. Rídíi ɓídí Faam fi gaani Koope ɗap tígí selaa níi sela ra, ɗaɗte dalaˈte sun níi feey, ɓísëlsëˈté ana. 46 Yéesú ɗaasse foŋ tígí daaha won tih : « Baap, mi tíkké coonaa fi soˈ yaˈu. » Wonaˈ ri unni ƴaa níi wocce ra, ɗi yeɗɗohte lússé. 47 Olaˈ kélfíi soldaara yee lah ra, ɗi kañce Koope won tih : « Ɓëyí bee ɓëyí júɓpé kaah ! » 48 Oluu ɓëewë maasuu ra yee lah ra, wa tíkúté yaˈ yi wa affi wa na looyu na nimilu faam. 49 Kooƴƴi Yéesú ɓéeɓ cagu hanndal na olsuu yee lah ra. Ɓeleɓɓa húmú ñéerúu a Yéesú dalaˈte Galile ra húmú filiɓ fi wa.
Haji Yéesú
(Saame Maccëe 27.57-61 ; Marka 15.42-47 ; Saŋ 19.38-42)
50-51 Lahte ɓëyí dék Arimate di Yúdée, hínú Suseef, ɗi non ɓaha yi ɓëy këemí gaani yëwúɗɗë. Ɗi ɓëyí baahte te júɓpé, te ri na húmú sehaaloh ayi Nguur ki Koope. Húlë tíkú ɓaha ya Yéesú rë, ɗi ñéerëey në. 52 Ɗi payte Pilaat na meelte ri ɓúudé fí Yéesú. 53 Tahraˈ ri Pilaat ra, ɗi nuuliɗte ɓúudé fë kurwaha, líiwté rí perkal, kúɗté rí ɗappe ri kolom ki yotu loo laˈ, bi yéŋké biti ɓúudé hëcɗúy në. 54 Wahtu ya tas balaa bisa na hílsúu yëwúɗɗë rë lah caaklilay. 55 Ɓeleɓɓa na húmú ñéerúu a Yéesú dalaˈte Galile ra, ñeyute tal Suseef, wa olsuute nuŋa, olute ɗee fënɗúu ɓúudé fí Yéesú rë. 56 Wa nimilute faam, waaƴute i yin heeñlaa a laakkoloñ, yugusii ɓúudé fë. Lahaˈ bisi hílsëe rë, wa hílsúuté ti di túuƴúu rí nen.