13
Lof pesaɗ mbée húl
1 Wahtii baaha, i ow ayute woni Yéesú biti Pilaat hawrohte i ow di ɓëy Galile húl, ɗeef wa na hawru Koope sarah. 2 Yéesú won wa tih : « Ɗon habuu biti bëemëdë bëemú ɓëy Galile yi ƴaa ra teeɓaˈ biti wa luku ɓëewí kayya Galile ɓos aa yih ? 3 Mi won ɗon ti ëe-ëeˈ ! Te ɗon lofuy pesaɗ, ɗon ɓéeɓ ay saŋku ɓal. 4 A ɓëewí sabboo a peeye yi ƴaa ɗakaƴaˈ taahi uda Silowe na bëp ɗí rë, ɗon habuu biti daa wa luku ɓëewí kayya Yerusalem ɓos aa yih ? 5 Mi won ɗon ti ëe-ëeˈ ! Te ɗon lofuy pesaɗ, ɗon ɓéeɓ ay saŋku ɓal. »
Léehí tal eena na líméh rë
6 Yéesú antee waa ñeyaˈ léeh won wa tih : « Lahte ɓëyí húmú lahaˈ tal een meeyi. Ɗi acce na saam koy een ndaa ri olay. 7 Tígí daaha, ɗi won súrgëe në lín meeya ra tih : “Ole ! Kíil éeyë aƴee ɓéeɓ, mi ac saam koy een tal eeni beh, te mi na oleh. Ɗi ay homee naafi feey fa te ri lahay njiriñ a ? Hawe ri !”
8 « Ndaa súrgëe won ɗi tih : “Ɓahaa, yeɗɗe ri kíilí beh, may júkët tala mi toh ri. 9 Henu ɗaaha raa, heeƴce ɗi lím kíirkí ; ɗi límëy rëe fu hawroh ri.” »
Ɓelaa goŋ ra paƴu bisa na hílsúu rë
10 Bisa na hílsúu yëwúɗɗë rë ín, Yéesú hompe na yëeddëˈ filiɓ tígë na ɗaguu yëwúɗɗë Koope ra. 11 Ow ɓeleɓ misikiɗ húmú në : ɗi lahaˈ yébítëh fí daa gogil ri ; hente kíil sabboo a kíil peeye (18), ɗi na mínéh caŋ níi júɓ dalaa sah. 12 Olaˈ Yéesú ɓelaa, ɗi dëekké rí, won ɗi tih : « Yaa ow ! Misigu wocce ! » 13 Ɗi tíkké yaˈ yi sun fi ɓelaa, ɓelaa yíppée júɓ, yampe na kañ Koope.
14 Ndaa paƴa paƴ Yéesú ɓelaa bisa na hílsúu rë neɓaay njíidí tígë na ɗaguu Koope ra. Tígí daaha, ɗi won ɓëewë tih : « Lahte waalli pëenë yí ɓëewë waɗti légéyún në ; lah ëyí paƴoh na, ndaa bisa na hílsúu rë neh ! » 15 Ɗi fi Yíkëe loffe ri unni ƴeh won ɗi tih : « Wonnon teem ɓúkkën ! Bisa na hílsúu rë, ow fi ow ɗon na ɓéeɓ na pay yugiin, pëkís fanfi mbée mbaam fi, pay hënndí neh a ? 16 A ɓelii bee sédí Abraham bee ra, Seytaane antee rii pokalsaˈ yii hente kíil sabboo a kíil peeye (18) bee ra, ɗi waruyti sëmlúu pokki bisa na hílsúu rë ë ? » 17 Yee won Yéesú baa ra sëpíɗté kaaˈoh yi ɓéeɓ ; ndaa keeññi ɓëewí kayya ɓéeɓ sosse di iñi wunna na paŋ ri ra.
Léehí pebi tisoh ki ƴutuuda a bi lëwíirë
(Saame Maccëe 13.31-32 ; Marka 4.30-32)
18 Yéesú ɓaatte won tih : « Nguur ki Koope madaˈ a yih ? May rii mëllée a yih ? 19 Ɗi madaˈ a pebi ƴutuudi baa* 13.19 pebi ƴutuudi baa :Di gerek, bíníyú ɗeh : tisoh mutarda. Pep mutarda non peppa lukki ƴin ra, ndaa tala non tal gañcah ya lukki gaan di meeyya ra. ɓeɓ ow, sohte ri meeyi ra nen : ɗi paalte, ooɗte níi hente tal kilik ; ƴakka ayute túfúté yaˈ ya. »
20 Yéesú wonil tih : « May mëllée Nguur ki Koope a yih ? 21 Ɗi madaˈ a lëwíirë ɓeɓ ow ɓeleɓ, boollaˈte wa a mún caak, íƴíɗté wë níi wa ɓéeɓ fuuɗte ra nen. »
Ílí ƴutuuda
(Saame Maccëe 7.13-14, 21-23)
22 Yéesú hom waali Yerusalem fa, ñeete ginna na yëeddëˈ. 23 Lahte ɓëyí meelte ri won tih : « Ɓahaa, ɓëewë nay múcé rë ac ƴutuuɗ a ? » Yéesú won ɓëewë maasuu ra tih : 24 « Pëgí ɓéeɓ níi ɗon haalaˈ ílí ƴutuuda ; daa mi won ɗon ɗi ee : ow caak ay étíɗ haal te wa ii rii mín. 25 Yiin kolaa yíkíi faam fa níi won ílë ɗeefa ɗon hëelíh rë, ɗon ay home ëssë, ɗon laɓe ílë, ɗon wone tih : “Ɓahaa, kúnsíɗ fun !” Ɗi ay ron lofe tih : “Mi yéeh rën !” 26 Ɗon ay rii wone tígí daaha tih : “Yen bokuy ñam a han, te fu yëeddëˈté këemmë gin fun a ?” 27 Ɗi ay ɓaat won ɗon tih : “Mi yéeh rën ! Wúlíi sëˈ, ɗon fa paguu yin ɓos ra ɓéeɓ !” 28 Ɗon ot Abraham, Isaak, Yakop a yonente ya ɓéeɓ filiɓ Nguur ki Koope, ɗon anti líkú ɗon saañ ëssín rëe, ɗon ay looyee daaha, ɗon ŋafoh níi tíññën lec. 29 Bín fë, ay lah ɓëewí kolaˈ tígí hom ow feey fa ɓéeɓ, ac ñami ndaje ma cëgíɗ Koope Nguur ki ra. 30 Di ɓëewë míllúu woteh ƴee ra, lahte na ƴi ay këllëh yiin fa, te di ƴee këllúu woteh ƴee ra, lahte na ƴi ay míllëˈ yiin fa. »
Yéesú a ɓëy Yerusalem
(Saame Maccëe 23.37-39)
31 I fariseŋ leɓuute Yéesú wahtii baaha, wonu ri tih : « Kolee dee fu saañ ílíƴ kay ! Erot ee saam hawrohu húl rë. » 32 Yéesú won wa tih : « Pëyí ɗon woniɗ soˈ tisoh ki gúmfí baa biti woteh a kéy mí lík yébítëh mi na paƴ jéríɗ, nah mi ɗúmël légéyí sëˈ. 33 Woteh, kéy a nah ɓéeɓ mi waɗti homa waali Yerusalem fi soˈ, ndée yonente waruy hawuu húl ílíƴ kay henay dín fë.
34 « Ɗon fi ɓëy Yerusalem daal, ɗon fa na bëemú yonente ya ra, ɗon fa na tawu ɓëewë Koope wol wa ɗon na laˈ níi wa húl rë, hente waal ɗíh ma na fahaˈ négírëˈí rën hëbís sëˈ ti di na négírëˈ paan ƴiilli paɓɓi nen ? Ndaa ɗon fahuuy ! 35 Kon Koope yeɗɗaˈte ron ginon† 13.35 Koope yeɗɗaˈte ron ginon :Di gerek, bíníyú ɗeh : Koope yeɗɗaˈte ron faamon. Mín hen Faam Koope ɓal. ! Mee ron won ra ee : ɗon ii soo olil níi wahtaa nay ron wonee bitih : “Koo-Yíkëe barkela ɓëeˈ ɗi wol ri ra !”✡ 13.35 Saame Kañaa ya 118.26 »
*13:19 13.19 pebi ƴutuudi baa :Di gerek, bíníyú ɗeh : tisoh mutarda. Pep mutarda non peppa lukki ƴin ra, ndaa tala non tal gañcah ya lukki gaan di meeyya ra.
†13:35 13.35 Koope yeɗɗaˈte ron ginon :Di gerek, bíníyú ɗeh : Koope yeɗɗaˈte ron faamon. Mín hen Faam Koope ɓal.
✡13:35 13.35 Saame Kañaa ya 118.26