Ungbòta-Ɔwʉ́tá Tɔ́ Bhǔkù 1 Tɛ̀sàlɔ̀nɨkà 1

Tɛ̀sàlɔ̀nɨkà

ɔ̌ Kànɨsà tɔ̀ Pɔlɔ̀ andí wɛmbɛrɛ̀ tɨ́ bhàrʉwà

Yàrɨ́ bhàrʉwà ɔ̀ ɨ̀ nòtù ádrɔ̀drɔ̌ dhu tɨ́ dhu

Yàrɨ́ nɨ́ wɛmbɛrɛ̀ tɨ́ Pɔlɔ̀ andí Tɛ̀sàlɔ̀nɨkà tɔ́ kɨgɔ̀ ɔ̌ pbàkrɨ́stɔ̀ tɔ̀ bhàrʉwà. Kǎndí ka mbɛ̀mbɛ̀ imbò kumì dɔ̀ná atdí nà atɔ ʉ́dà Yěsù ka kʉ́gʉ̀ dhu-dzidɔ̌ rɔ́rɔ̀. Obhó tɨ́, Pɔlɔ̀ mà, Sílà nà náawù ùvò ndɨ kɨgɔ̀ ɔ̀, Pɔlɔ̀ ràdʉ̀ Yěsù Krɨ́stɔ̀ bhà Ídzì Màkʉ̌rʉ̀ nʉ́nɔ̀ abádhí tɔ̀ (Kas 17.1-10). Tɛ̀sàlɔ̀nɨkà tɔ́ kɨgɔ̀ ɔ̌ kànɨsà ɔ̌, ɨ̀nzɨ̌ nɨ́ Pbàyàhúdí nɨ́ɨ’ɨ̀ abhɔ nyʉ́, pbɛ́tʉ̀ Pbàyàhúdí nyʉ́ ràdʉ̀ ɨ̀’ɨ̀ ngúfe. Ngúfe ɨdhɔ dzidɔ̌, Pbàyàhúdí nzínzì ɔ̌ atdídhená alɛ náadʉ̀ dhu ʉ̀ya ìndrǔ tɔ̀, ɨ̀nzɨ̌ Pɔlɔ̀ mà, Sílà nà rʉ̌nɔna dhu nɨrɨ tɨ́.

Ɔ́yɔ̌ atɔ dzidɔ̌, Pɔlɔ̀ avì Tìmɔ̀tɛwʉ̀ ràrà Tɛ̀sàlɔ̀nɨkà arɨ́ Yěsù ná’ù alɛ arɨ́ òko tɨ́ dhu andà. Nɨ́ ányɨ̀ Tìmɔ̀tɛwʉ̀ àrà àhʉ, ndàdʉ̀ ndàdu rɔ̀, kǐtsi àtɨ̀nà Pɔlɔ̀ nɨ̌ ìnè abádhí ràrɨ̌’ɨ̀ fɨ̀yɔ́ a’uta nɔ́dɔ ɨ̀ arɨ́ rɔ́. Kǎtɨ átɔ̀ abádhí nzínzì ɔ̌ atdídhená alɛ tɔ́ ɨrɛ̀ta nɨ́nza dhu ràrɨ̌ abáya mà, ayíya mà, ndɨrɔ̀ ɔdhɨ́ya mànà nʉ́vɛ ɨnzá Yěsù àpɛ̀ ìngo rɔ́rɔ̀ dhu. Nɨ́ abádhí ràrǒwu dhu ɔ̀ngʉ̀ rɔ̌ tsʉ̀yá kɔ̌kɔ̀ ʉ̀vʉ̌vɛ alɛ ralaya tɨ́ tdʉ̌ Yěsù-ngbɔ̀. Ndɨ dhu-okú dɔ̀ rɔ̀ nɨ́ ndɨ, Pɔlɔ̀ náandí bhàrʉwà abádhí tɔ̀, ndɨ́nɨ̌ abádhí-afí otsi tɨ́ ɔbɨ nɨ̌, abádhí ʉnɨ tɨ́ Yěsù Krɨ́stɔ̀ rǐngo dhu nɨ́ɨ’ɨya tɨ́ dhu, ndɨrɔ̀ ndɨ̀ ná’ù alɛ kɔ̌nzɨya tɨ́ dhu. Ndɨ dhu bhěyi nɨ́ ndɨ, abádhí rɨ̌ dhu à’u ìnè ɨ̀ rɨ’ɨya atdíkpá ndɨ Ádrʉ̀ngbǎlɛ mànà dhòdhódhónganà.

Bhàrʉwà-nyɨ̀tɨ̀ ka kóhù tɨ́ dhu

- Pɔlɔ̀ mà rɨ̌ Tɛ̀sàlɔ̀nɨkà ɔ̌ Kànɨsà nóvì dhu mà abádhí rɨ̌ ɔ̀tsɔ̀ àbhʉ̌ Kàgàwà tɔ̀ abádhí-okú dɔ̀ rɔ̀ dhu mànà dhu (1.1-10).

- Pɔlɔ̀ mà anzɨ̀ kasʉ tɨ́ Tɛ̀sàlɔ̀nɨkà ɔ̌ kànɨsà ɔ̌ dhu (2.1-16).

- Pɔlɔ̀ rɨ̌ Tɛ̀sàlɔ̀nɨkà ɔ̌ bhà nózè ndàla dhu mà kǎvì Tìmɔ̀tɛwʉ̀ ràrà abádhí-afí òpè dhu mànà dhu (2.17–3.13).

- Pɔlɔ̀ rɨ̌ Yěsù ná’ù alɛ ònzi ròkò Kàgàwà-nyɨ̀kpɔ́ nɔ̀fɔ̀ dhu bhěyi dhu (4.1-12).

- Yěsù ɨ̀ a’u rɔ́rɔ̀ ʉvɛ̀ alɛ nʉ́ʉngbɛya ɨ̀ dhu (4.13-18).

- Ádrʉ̀ngbǎlɛ Yěsù ná’ù alɛ àkǎ ’òkò tɨ́ kà rǐngo ɔ̀ná ɨdhɔ ɔ̀dɔ ɨ̀ ɨ́ ɔ̀nanǎ dhu (5.1-22).

- Pɔlɔ̀ rɨ̌ pbàkrɨ́stɔ̀ òvì dhu (5.23-28).

Pɔlɔ̀ mà rɨ̌ Tɛ̀sàlɔ̀nɨkà ɔ̌ Kànɨsà nóvì dhu

1 Ɨma Pɔlɔ̀, Sɨ̀lɨ̀vanʉ̀, Tìmɔ̀tɛwʉ̀ mànà, mǎ màndǐ yàrɨ́ bhàrʉwà fʉ̌kʉ̀, Tɛ̀sàlɔ̀nɨkà tɔ́ kɨgɔ̀ ɔ̌ kànɨsà tɨ́rɔ̀. Nyɨ̌ nɨ́ Àba Kàgàwà bhà alɛ, ndɨrɔ̀ nyɨ̌ nɨ́ Ádrʉ̀ngbǎlɛ Yěsù Krɨ́stɔ̀ bhà alɛ. Nɨ́, Kàgàwà àkǎ ndàso nyɨ̌, ndàdʉ̀ nyǎbhʉ nyǒkò màrʉ̀ngà ɔ̌.

2 Mǎ márɨ́ ɔ̀tsɔ̀ nábhʉ̌ bìlǐnganà Kàgàwà tɔ̀ okúkʉ dɔ̀ rɔ̀, mǎdʉ̀ àmbɛ nyɨ̌rɛ̀ dɔ̌ fàká ɨtsɔ̀ta ɔ̌. 3 Ndɨrɔ̀, mɨ̌tsɔ̀ mǎ mɨ́ àlɛ̌ t’Ábanà Kàgàwà-ɔ̀nzɨ̌ rɔ̀, mǎ máróngo ɨ̀rɛ̀nà ɨ̀nzɨ̌ mǎ mʉ́bhana rɔ́rɔ̀ dhu nɨ́, fʉ̀kʉ́ a’uta-kàsʉ̌ mà, fʉ̀kʉ́ àzè arɨ́ nyǎbhʉ nyɔ̌nzɨ̀ kasʉ tɨ́ dhu mà, ndɨrɔ̀ nɨ́, nyɨ̌ nyá’ù dhu ɔbɨ nyʉ́ nà ìngo àlɛ̌ tɔ́ Ádrʉ̀ngbǎlɛ Yěsù Krɨ́stɔ̀ ringoya dhu. 4 Adɔ́dǔ, yà atdídɔ̌ ma mózè nyɨ̌ rɔ̀, mǎ mʉ̀nɨ dhu Kàgàwà rózè wà nyɨ̌, ndɨrɔ̀ kà róvò wà nyɨ̌, nyɨ̌’ɨ̀ pbɨ̀ndà alɛ tɨ́. 5 Obhó tɨ́, yà fʉ̌kʉ̀ mǎ mɔ́vɔ̀ fàká Ídzì Màkʉ̌rʉ̀ nɨ́ mǎ mɔ́vɔ̀ nzá ɔtɛ ɔ̌ tɨ́. Pbɛ́tʉ̀, mǎ mɔ́vɔ̀ ka Ɨ̀lɨ̌lǎ-Alafí bhà ádrʉ̀ngbǎnga tɔ́ ɔbɨ mà, kàbhà mʉ̀dzʉ̀nà mànà nɨ̌, mǎdʉ̀ dhu à’ù wɔ̀ mǎ mɔ́vɔ̀ fʉ̌kʉ̀ dhu ràrɨ̌ obhó dhu nyʉ́. Ndɨrɔ̀, nyɨ̌ nyʉ̀nɨ wà ɨ̀ngbà dhu bhěyi màtɨ́ nzínzìkʉ ɔ̌ mǎ mókò dhu nábhʉ ídzìnga fʉ̌kʉ̀ dhu. 6 Ndɨ dhu bhěyi nɨ́ ndɨ, fʉ̀kʉ́ okota nɔ́fɔ̀ ndɨ̀ fàká okota nà, ndàdʉ̀ ndɔ̀fɔ̀ Ádrʉ̀ngbǎlɛ Yěsù bhà adɨta nà. Ndɨrɔ̀, ábhɔ̌ àpbɛ̀ nyʉ́ ɔ̌ rɔ̀, nyɨ̌ nyádʉ̀ Kàgàwà bhà ɔtɛ nákɔ, Ɨ̀lɨ̌lǎ-Alafí nɨ́rǎ nyɨ̌ nɨ̌ dhɛ̀dhɛ nyʉ́ nà. 7 Ndɨ dhu bhěyi nɨ́ ndɨ, yà nyɨ̌ nyɔ́nzɨna dhu nádɨ wà ídzì ɔ́fɔ̀ tɨ́ Màkɛ̀dɔ̀nɨyà mà Àkayà mànà tɔ́ pbìrì ɔ̌ Yěsù ná’ù alɛ tɔ̀. 8 Obhó tɨ́, fʉ̌rábvʉ̌ rɔ̀ nga nɨ́ ndɨ, Ádrʉ̀ngbǎlɛ Yěsù dɔ̌ rɔ́tɛ Ídzì Màkʉ̌rʉ̀ nʉ́ndɔ̀ ndɨ̀ nɨ̌. Kʉ̌ndɔ̀ nzá ndɨ̀ Màkɛ̀dɔ̀nɨyà mà Àkayà mànà ɔ̌ tɨ́, pbɛ́tʉ̀, nyɨ̌ nyá’ù Kàgàwà tɨ́ dhu-ɔ̀yɨ̌ nákǎ ábhɔ̌ ngari nyʉ́ ɔ̌. Nɨ́, wɔ̀ dhu dɔ̌ mǎ mʉ́nɔna tdɨ́tdɔ̌ dhu rɨ̌’ɨ̀ mbǎ. 9 Ndɨrɔ̀, ìndrǔ rǒwu àwɛnà rɔ̌ dhu nɨ́, fʉ̌rábvʉ̌ mǎ mówù ùvò tɨ́ dhu. Ndɨrɔ̀, abádhí rǒwu àwɛnà rɔ̌ dhu nɨ́, nyɨ̌ nyʉ́gɛ̀rɛ̀ nyɨ̌ nyǎ’ù Kàgàwà, nyǎdʉ̀ sànamʉ̀ nʉ́bhà dhu. Ndɨ dhu bhěyi nɨ́ ndɨ, nyɨ̌ nyárɨ́ ípìrɔ̌nga mà obhónga mànà tɔ́ Kàgàwà-kàsʉ̌ nɔ́nzɨ. 10 Ndɨrɔ̀, nyɨ̌ nyárɨ́ Kàgàwà t’Ídhùnà, Yěsù rǐngo ɔ̀rʉ̀-akpà ɔ̀ rɔ̀ dhu nɔ́dɔ. Ndɨ Yěsù nɨ́ ndɨ Kàgàwà ábhʉ rɨ̀ngbɛ̀ ndɨ̀ ibhu ɔ̀ rɔ̀, ndɨ́nɨ̌ àlɛ̌ nʉwʉ̀ tɨ́ yà rɨ́rà ìndrǔ-ànyǎ t’ɨ́tdɨ̀ta tɔ́ pbɨ̀ndà nàwí ɔ̌ rɔ̀.