3
UYeesu ghwi Songo ukukinda uMoose
1 Mwe bhiitiki bhanyiitu, mwe uChaala abhasalite ukubha bhandu bhaake, inongʼonagha ngaani ukuti uYeesu mutumighwa ughwa Chaala soona Mupuuti uSongo yuuyo tukumwitika. 2 UYeesu uyo akabha musubhaalilighwa kwa Chaala yuuyo akamusala isa muumwo uMoose* 3:2 Bhelenga ingamu iya UMoose ku Mashu aMaheesha. ghwepe akabha mulongoshi umusubhaalilighwa ughwa bhandu abha nyumba iya Chaala, aBhaisilaeli.✡ 3:2 Mbelengelo 12:7 3 Umusengi akupeeliighwa ulughindiko ukukinda inyumba yiiyo asengite, bhubhuubhwo uYeesu ghwepe akulondighwa ukughindikighwa ngaani ukukinda uMoose. 4 Paapo yooshi inyumba yikusengighwa nu musengi yumo, loole uChaala ghwe yuuyo Musengi uSongo ughwa tundu twoshi.
5 UMoose akabha mubhombi umusubhaalilighwa pakati pa bhandu abha nyumba iya Chaala. Imbombo yaake yikabha ya kubhabhuula abhandu abho shila shooshi shiisho uChaala akabhaatika ukuyugha mundaashi. 6 Loole uKilisiti umwene Mwana umusubhaalilighwa yuuyo mwimilili ughwa bhandu abha Chaala. Nuutwe tuli bhandu bhaake linga tukwendelela ukwikasha nu kwifunila ku shila shiisho tukusubhaalila.
Isoki ku sha kushita kwitika
7 Iyi yo yiiyo nongwa tukulondighwa ukupulikisha shiisho uMbepo uMwelu akayugha ukuti,
“Umuusughu, linga mwapulika ishu ilya Chaala,
8 manye mushibhiikaghe indumbula shiinyu ukubha ngafu
isa muumwo abhosekulu bhiinyu bhakakaanagha ukulongoshighwa nuune
mu kabhalilo kala kaako bhakaangelagha mu lungalangala.
9 Paapo ku lungalangala ukwo kwo kuukwo abhosekulu bhiinyu bhakaangelagha
pamupeene nu kuti ingabhabhombela ifyika ifyingi ku fyinja amalongo manna (40).
10 Ku nongwa iyo ingabhakalalila abhandu abho nu kuyugha
ingati, ‘Abhandu abha bhabhiibhi amashiku ghooshi,
bhandu bhaabho bhatakulonda ukukonga isila shangu.’
11 Po ingakalala nu kuloolika, ingati,
‘Indaaingabhiitikishe naalumo abhandu abho
ukwingila pabhuyo ubhwa kutuusha,
paapo indendekeshiishe ku nongwa yaabho.’ ”✡ 3:7-11 Sabhuli 95:7-11; Bhufumilo 17:1-7
12 Mwe bhiitiki bhanyiitu, mubhange maaso ukuti manye abheepo umundu naayumo pakati papiinyu yuuyo ali ni ndumbula imbiibhi, yuuyo atakwitika, soona akukaana ukumukonga uChaala yuuyo mwumi. 13 Loole kasanianga mwibheene-bheene lyoshi ishiku liilyo tukulyitisha ukuti, “Muusughu,” ukuti manye mukaanaghe ukumwitika uChaala ku nongwa iya kushimbulighwa ni mbiibhi. 14 Linga tukwikaakila ukumusubhaalila uChaala isa muumwo tukiitikila ukufuma kubhwandilo ukufika kubhumalilo ubhwa bhwumi bhwitu, tuli pamupeene nu Kilisiti. 15 Kumbukagha shiisho shisimbiighwe mu Masimbo aMeelu ukuti,
“Umuusughu, linga mwapulika ishu ilya Chaala,
manye mushibhiikaghe indumbula shiinyu ukubha ngafu
isa muumwo abhosekulu bhiinyu bhakakaanagha ukulongoshighwa nuune.”✡ 3:15 Sabhuli 95:7-8
16 Kali, bhandu bhaki bhala bhaabho bhwo bhaapulika ishu ilya Chaala bhakakaana ukulongoshighwa naghwe? Kali, bhataa bho bhala bhooshi bhaabho bhakalongoshighwanga nu Moose ukufuma mu chiisu icha Miisili? 17 Soona, kali, bhandu bhaki bhala bhaabho uChaala akabhakalalila ku fyinja amalongo manna? Kali, bhataa bho bhala bhooshi bhaabho bhakabhomba imbiibhi nu kufwa mu lungalangala? 18 Soona, kali, bhandu bhaki bhala bhaabho uChaala akaloolika ukuti ataaakabhiitikishe naalumo ukwingila pabhuyo ubhwa kutuusha paapo atendekeshiishe ku nongwa yaabho? Kali, bhataa bho bhala bhooshi bhaabho bhakakaana ukumupulika? 19 Po tumeenye ukuti abhandu abho bhakapootwa ukwingila pabhuyo ubhwo ku nongwa iya kuti bhakakaana ukumwitika uChaala.