15
Ɩbwaarɛ nbɔɔ asunɔ ba
maa igyerebi asunɔ
maa igyerebi asunɔ
1 Ɩnɩmʋ kamaa mʋ, n bɩla wu sɩnkaala yɛ asɩn kyinkyinsa kʋ sʋsʋ. Ɩbwaarɛ nbɔɔ nsunɔ, nɩɩ ba sʋ laalaalʋwɛ igyerebi nsunɔ bɛɛ ba. Ɩnɩmʋ ɩ gyɛ igyerebi laalaalʋwɛ mʋ, lɩɩ fɛɛ ɩnɩmʋ kamaa mʋ Ɩbwaarɛ agbʋ mʋ ɩ fʋʋ ɔkaa. 2 Nɩɩ n wu kʋtɔ kʋ fɛɛ ɔpʋ nkyu mʋ nɩɩ ki du fɛɛ digi nɩɩ kɩ bʋga yɛ fʋlɔn. Nɩɩ n wu bamʋ nɩɩ ba kɔ lɩɩ kadʋnbwɛ mʋ, yɛ mʋ apɔyɩtɔ ɔdakpa mʋ, yɛ mʋ kɩtɩɩ akaragɛ‐bi mʋ. N wu ba maa yɩlɛ ɔpʋ mʋ kɔnɔ, yɛgɛ ba sʋ adʋnlɛ mʋ nɩɩ Ɩbwaarɛ sa bamʋ mʋ. 3 Nɩɩ ba bɩɩ Ɩbwaarɛ kɩyaafɔlɛ Mosesi yɛ Kabʋlʋpʋ mʋ ɔlʋn yɛ,
Ɔnyɩrɩpɛ Ɔlʋnpʋ Ɩbwaarɛ,
fʋ awaasa kparɛ mʋ ɩ kyɔ nɩɩ ii kyinkyin.
Fʋ ɩ gyɛ kasɛ sʋ kpini owura,
fʋ ɩkpa i kyiigi nɩɩ ɩ gyɛ kesintin.
4 O Ɔnyɩrɩpɛ, anɩmʋ ɩ mɛɛ yɛ ɔ sɩlɛ fʋ,
nɩɩ anɩmʋ ɩ mɛɛ yɛ ɔ taa bʋnyaa sa fʋ kɩtɩɩ?
Lɩɩ fɛɛ fʋ nkʋn ii du kyɩrɛkyɩrɛ kasɛ sʋ.
Kasɛ sʋ asa kpini bee biti ba be muŋa fu ansi tɔ.
Lɩɩ fɛɛ fʋ ɩkpa kyiigisa mʋ ɩ lɩɩ ifuli.
5 Ɩnɩmʋ kamaa mʋ, n kɩɩ nɩɩ n wu ba maa tigi opula kyɩrɛkyɩrɛkpa kɩkyɩrɛkyɩrɛ mʋ nɩɩ kɩ bʋ tantɩ kubuu mʋ nɩɩ kɩ bʋ sʋsʋ mʋ tɔ yɩla. 6 Tantɩ kubuu maŋa tɔ nɩɩ nbɔɔ asunɔ mʋ nɩɩ ba sʋ igyerebi asunɔ mʋ ba lɩɩ, yɛgɛ ba bun ɩkaalɛ fufuli parɛparɛ yɛgɛ ɩɩ ŋalɩgɛ sʋ, nɩɩ ba taa suwa ɩkɩrɩsʋ ŋmina bamʋ nkɔlɔ tɔ. 7 Nɩɩ atɔ kɩɩsa ana mʋ tɔ ɔkʋ sa Ɩbwaarɛ nbɔɔ nsunɔ mʋ, suwa ɩlapɛ isunɔ nɩɩ Ɩbwaarɛ mʋ nɩɩ ɔ tɛ nkpa tɔ kakpaa mʋ agbʋ a bɔla ɩmʋ tɔ. 8 Nɩɩ Ɩbwaarɛ bʋnyaa yɛ mʋ ɔlʋn ɩ yɛgɛ nɩɩ idiisii ɩ ba bɔla tantɩ kubuu mʋ tɔ. Nɩɩ ɔkʋ mɛɛ taalɛ loo tʋtɔ, amɔɔ Ɩbwaarɛ nbɔɔ nsunɔ mʋ ba lʋwɛ igyerebi isunʋ mʋ pɔyɩ.