1 Anɛ‐daa ana yɛ anɛ‐supu ana, anɛ laalaalʋwɛ asɩn mʋ ɩ gyɛ yɛ, fan kʋlɛ kabwaarɛ kʋlɛ sa anɛ kɛ Ɔnyɩrɩpɛ asɩn mʋ ɩ nyɛ yalagɛ bilen‐bilen, kɛ ɩ nyɛ bɛɛrɛɛ lala fɛɛ kanan mʋ nɩɩ ɩ nyɛ fanɛ asɛ mʋ. 2 Kɛ fan kʋlɛ kabwaarɛ kʋlɛ yɛ Ɩbwaarɛ ɔ lɛɛ anɛ lɩɩ amu tɔ ɔlʋn wuya ana yɛ asɩn libi wuya ana abaa tɔ, lɩɩ fɛɛ man gyɛ ɔkʋmaa nɩmʋ ɩɩ kɔɔlɛ Yesu gyii. 3 Amaa Ɔnyɩrɩpɛ mʋ gyɛ kesintin wuya nɩn, nɩɩ mʋ ii biti ɔ sa fanɛ ɔlʋn kɛ o kun fanɛ lɩɩ Sɩtaanɛ kɩbaa tɔ. 4 An sʋ kɩkɔɔlɛ‐gyii Ɔnyɩrɩpɛ mʋ tɔ fɛɛ ɛɛ yɛgɛ nɩɩ fɛn waa, nɩɩ fen biti fan kyaga sʋ waa atɔ mʋ nɩɩ an sa fanɛ kɔnɔ yɛ fan waa mʋ. 5 An kʋlɛ kabwaarɛ kʋlɛ yɛ, Ɔnyɩrɩpɛ o biliŋaa fanɛ nfɛɛrɛ kpee Ɩbwaarɛ kebiti mʋ tɔ yɛ Yesu Krisito kɔkɔlɔ kɩnyɛ yɩlɛ tɔ mʋ tɔ.

6 Anɛ‐daa ana yɛ anɛ‐supu ana, lɩɩ Ɔnyɩrɩpɛ Yesu Krisito kɩtɩɩ tɔ sʋ mʋ, an sa fanɛ kɔnɔ yɛ fanɛ bɩrɩsa mʋ nɩɩ o mee biti kusun kɩwaa, nɩɩ mʋ kɩbaabʋtɔ kɩ man naa yɛ kɩkaapʋ mʋ nɩɩ fan nyɛ lɩɩ anɛ asɛ mʋ, fan kɩtaa fanɛ n‐yɩɩ lɩɩ mʋ sʋ. 7 Fanɛ gbaa‐gbaa fanɛ fen nyi kanan mʋ nɩɩ ɩ dagaa fɛɛ fan buu anɛ ayaa natɛsa. Lɩɩ fɛɛ saŋa mʋ nɩɩ an bʋ fanɛ asɛ mʋ a man kyɩna waa wʋlʋgyɔ, 8 nɩɩ an man gyii ɔkʋ agyitɔ yɛgɛ a man ka ɩmʋ kʋkɔ. Amaa an payɩ ansi waa kusun yɛ kɩkpɩnɛ kakyʋwapɛ yɛ kagyanbwɛ kanan mʋ nɩɩ anɛ kɩkyɩna fanɛ asɛ mʋ ɩ man waa kasʋla sa fanɛ tɔ ɔkʋ. 9 A maa waa ɩnɩmʋ mʋ, ɩ man gyɛ nɩn yɛ a man sʋ ɔkpa kɛ a taa anɛ n‐yɩɩ tʋʋ fanɛ nkyɛtɔ sʋ, amaa an waa yɩla nɩn kɛ fan nyɛ buu anɛ ayaa natɛsa sʋ. 10 Halɩɩ saŋa mʋ nɩɩ an bʋ fanɛ asɛ mʋ an sa fanɛ kɔnɔ yɛ, “Ɔkʋmaa mʋ nɩɩ o mee biti kusun kɩwaa mʋ, ɔ man gyii.”

11 An nu yɛ akʋ ba bʋ fanɛ tɔ ba sʋ wʋlʋgyɔ. Be mee sun kusun kʋ, amɔɔ asa asɩn tɔ kɩnatɛ loo. 12 Bamʋ nɩɩ be du kanɩn mʋ, an sa bamʋ kɔnɔ nɩɩ an tɔwɛ an sa bamʋ Ɔnyɩrɩpɛ Yesu Krisito kɩtɩɩ tɔ sʋ yɛ ba biti kusun waa biti bamʋ agyitɔ gyisa. 13 Amaa fanɛ, anɛ‐daa ana yɛ anɛ‐supu ana bɩrɛ, fan man yɛgɛ kɩdanbɩrasa kɩwaa i fii fanɛ.

14 Nɩɩ fanɛ tɔ ɔkʋ kan kina anɛ asɩn mʋ nɩɩ an kyʋrɔɔ waa ɔwʋlɛ nɩmʋ tɔ falɛ mʋ, fan baa fan da mʋ sʋ. Fanaa mʋ fan man bɩla bʋga waa sɛhn, kɛ ipeeli ɩ kɩtaa mʋ. 15 Fan man taa mʋ waa fɛɛ fanɛ dʋn, amaa fan tɔwɛ waa mʋ fɛɛ fanɛ‐nyi mu‐bii ana tɔ ɔkʋ.

16 Anɛ kabwaarɛ kʋlɛ ɩ gyɛ yɛ anɛ‐Nyɩrɩpɛ Yesu Krisito gbaa‐gbaa mʋ nɩɩ ɔ gyɛ kayɩɩ‐yuuli wuya mʋ, ɔ sa fanɛ kayɩɩ‐yuuli saŋa kʋmaa yɛ ɔkpa kʋmaa sʋ. Anɛ‐Nyɩrɩpɛ Yesu ɔ baa ɔ bʋ fanɛ kpini asɛ.

17 Mɛ Pɔɔlɩ mɛ gbaa‐gbaa mɛ ɩ taa mɛ kɩbaa kyʋrɔɔ afwaala nɩmʋ. Kanɩn nɩɩ n duligi mɛ ɩwʋlɛ kpini. Falɛ nɩɩ n kyʋrɔɔ.

18 Anɛ‐Nyɩrɩpɛ Yesu Krisito kabwaala kɩ baa kɩ bʋ fanɛ kpini asɛ.