1 Mɛ‐daa ana yɛ mi‐supu ana, nbɩɩnbɩɩ n biti fɛɛ n nyiŋi fanɛ asɩn danbɩrasa lɩɩ Yesu mʋ nɩɩ n tɔwɛ mʋ asɩn sa fanɛ, nɩɩ fan kɔɔlɛ kyula, nɩɩ fan san fan yɩlɛ ɩmʋ tɔ mʋ. 2 Nɩɩ fan kan kɩtaa asɩn danbɩrasa mʋ nɩɩ n tɔwɛ sa fanɛ mʋ tɔ kenken mʋ, ɩɩ bɩya fanɛ kamɔlɩgɛ. Nɩɩ ɩ man gyɛ kanɩn bɩrɛ, fanɛ kɩkɔɔlɛ‐gyii kɩ gyɛ kɩyan.

3 Lɩɩ fɛɛ asɩn mʋ nɩɩ n nyɛ, nɩɩ ngbaa mɛ n sʋ n sa fanɛ nɩɩ i tiri ɩ kyɔ ɩmʋ kpini mʋ, ɩ gyɛ yɛ Krisito ba wu lɩɩ anɛ alibi sʋ, fɛɛ kanan mʋ nɩɩ ba kyʋrɔɔ waa Asɩnkyan yɩlasa mʋ tɔ mʋ. 4 Nɩɩ ba pula mʋ, nɩɩ ɩmʋ kakɛ sasapʋ mʋ, Ɩbwaarɛ kyiŋi mʋ ba nkpa tɔ fɛɛ kanan mʋ nɩɩ ba kyʋrɔɔ waa Asɩnkyan yɩlasa mʋ tɔ mʋ. 5 Nɩɩ ɔ lɛɛ mʋ n‐yɩɩ kaapʋ Pita, nɩɩ o bwii lɛɛ mʋ n‐yɩɩ kaapʋ asunpu kudu anyɔ mʋ. 6 Ɩmʋ kamaa mʋ ɔ lɛɛ mʋ n‐yɩɩ kaapʋ mu abuupu mʋ nɩɩ ba kyɔ alɩfa anuu saŋa kʋlʋn tɔ. Saŋa mʋ nɩɩ n kyʋrɔɔ ɩnɩmʋ mʋ bamʋ gaalaagaa ba san ba tɛ nkpa tɔ, nɩɩ bamʋ akʋ mɔɔ ba wu. 7 Ɩmʋ kamaa mʋ ɔ lɛɛ mʋ n‐yɩɩ kaapʋ mu‐supu Gyemisi, pɔyɩ nɩɩ ɔ lɛɛ mʋ n‐yɩɩ kaapʋ mu asunpu mʋ kpini. 8 Ɩmʋ kpini laalaalʋwɛ mʋ, ɔ lɛɛ mʋ n‐yɩɩ kaapʋ ngbaa mɛ, mʋ nɩɩ n du fɛɛ ɔmʋ nɩɩ ɔ man fʋʋ kɩkʋʋgɛ nɩɩ ba kʋʋgɛ mʋ mʋ.

9 Krisito asunpu mʋ kpini tɔ mʋ, mɛ ɩ gyɛ ɔmʋ nɩɩ ɔ man taa bamʋ tɔ, nɩɩ n man dagaa gbaa ba tɩɩ mɛ Krisito osunpu, lɩɩ fɛɛ n kyɩna nyanla Krisito abuupu mʋ. 10 Amaa lɩɩ Ɩbwaarɛ kabwaala mʋ sʋ, nɩɩ n du fɛɛ kanan mʋ nɩɩ n du falɛ, nɩɩ mʋ kabwaala mʋ nɩɩ ɔ sʋ sa mɛ mʋ, man gyɛ kɩyan. Nɩɩ n ba payɩ ansi waa kusun gaa n kyɔ asunpu mʋ kpini, nɩɩ ɩ man gyɛ mɛ ɔlʋn sʋ nɩɩ n taalɛ waa kusun mʋ, amaa Ɩbwaarɛ ɔlʋn mʋ nɩɩ kɩ bʋ mɛ tɔ mʋ ɩ waa. 11 Ɩmʋ sʋ, nɩɩ mɛ asɛ nɩɩ fan nu asɩn danbɩrasa mʋ nɩn‐oo, nɩɩ bamʋ asɛ nɩɩ fan nu nɩn‐oo, ɩmʋ kpini ɩ gyɛ asɩn kʋlʋn mʋ nɩɩ an tɔwɛ sa fanɛ, nɩɩ fan kɔɔlɛ ɩmʋ gyii mʋ.

12 Nɩɩ a maa tɔwɛ fanɛ yɛ Krisito kyiŋi lɩɩ lewu tɔ mʋ, mɩnɛ ɩ waa sʋ nɩɩ fanɛ akʋ bee gyii ɩmɔɔrɛ, yɛ kelewu‐kyiŋi man bʋ tɔ? 13 Nɩɩ kelewu kyiŋi daa man bʋ tɔ mʋ, kanɩn bɩrɛ Krisito gbaa man kyiŋi ba nkpa tɔ. 14 Nɩɩ Krisito man dɩn kyiŋi ba nkpa tɔ mʋ, kanɩn bɩrɛ anɛ abwaarɛsɩn mʋ nɩɩ an tɔwɛ mʋ, man sʋ kyaarɛ, nɩɩ fanɛ kɩkɔɔlɛ‐gyii mʋ gbaa man sʋ kyaarɛ. 15 Naafɔɔ nɩɩ ɩ gyɛ kanɩn bɩrɛ mʋ, ii biti ɩ ba fɛɛ an tɩn antɩŋɛsa gyaga Ɩbwaarɛ sʋ, lɩɩ fɛɛ an tɔwɛ kaapʋ tɔ fɛɛ Ɩbwaarɛ kyiŋi Krisito lɩɩ lewu tɔ. Amaa nɩɩ kelewu kyiŋi man bʋ tɔ mʋ, kanɩn bɩrɛ Ɩbwaarɛ man kyiŋi Yesu lɩɩ lewu tɔ. 16 Lɩɩ fɛɛ nɩɩ kelewu kyiŋi man bʋ tɔ mʋ, kanɩn bɩrɛ Krisito gbaa man dɩn kyiŋi ba nkpa tɔ. 17 Nɩɩ Ɩbwaarɛ man dɩn kyiŋi Krisito ba nkpa tɔ mʋ, kanɩn bɩrɛ fanɛ kɩkɔɔlɛ‐gyii kɩ gyɛ kɩyan, nɩɩ fan san fan bʋ fanɛ alibi tɔ. 18 Nɩɩ ɩ gyɛ kanɩn mʋ, ɩɩ kaapʋ nɩn fɛɛ bamʋ nɩɩ ba kɔɔlɛ Krisito gyii nɩɩ ba wu mʋ, ba wu muuri. 19 Nɩɩ ɩ kan ɩ gyɛ kasɛ sʋ nfɩɩ nkʋn nɩɩ an sʋ tamaa Krisito tɔ bɩrɛ, anɛ asɩn ɩ sʋ kʋwɛɛ gaa ɩ kyɔ ɔkʋmaa nɩmʋ dulinyaa nɩmʋ tɔ.

20 Amaa ɩmʋ kesintin ɩ gyɛ fɛɛ, Ɩbwaarɛ kyiŋi Krisito lɩɩ lewu tɔ ba nkpa tɔ. Ɩnɩmʋ ɩ dan ɩ gyɛ kesintin nɩn fɛɛ, Krisito ɩ gyɛ ɔgyankpaapʋ sa alewupu mʋ nɩɩ Ɩbwaarɛ ii biti o kyiŋi bamʋ lɩɩ lewu tɔ ba nkpa tɔ mʋ. 21 Lɩɩ fɛɛ kanan mʋ nɩɩ lewu bɔla nyɩmɩsa kʋlʋn sʋ ba dulinyaa tɔ mʋ, kanɩn maŋa nɩɩ kelewu kyiŋi ba nkpa gbaa tɔ mʋ bɔla nyɩmɩsa kʋlʋn sʋ ba. 22 Fɛɛ kanan mʋ nɩɩ asa kpini ba lɩɩ Adam tɔ, nɩɩ Adam alibi sʋ asa ba wu mʋ, kanɩn nɩɩ asa kpini mʋ nɩɩ ba gyɛ Krisito lɛɛ mʋ bee biti ba nyɛ nkpa Krisito lewu mʋ sʋ. 23 Amaa falɛ nɩɩ kelewu kyiŋi mʋ ii biti ɩ waa. Krisito ɩ wʋla gyankpaa kyiŋi lɩɩ lewu tɔ ba nkpa tɔ. Nɩɩ ɔ kan bwii ba mʋ, ee biti o kyiŋi bamʋ nɩɩ ba gyɛ mʋ lɛɛ mʋ. 24 Ɩnɩmʋ kamaa mʋ, kɛ laalaalʋwɛ mʋ ɩ ba. Kanɩn saŋa mʋ, Krisito ii biti o nyita kɩbɩlɩsa‐kigyii kʋmaa nɩmʋ yɛ alʋlʋnpʋ kʋmaa nɩmʋ yɛ ɔlʋn kʋmaa nɩmʋ, kɛ ɔ taa kuwura‐gyii mʋ waa mʋ‐Sɛ Ɩbwaarɛ kɩbaa tɔ. 25 Lɩɩ fɛɛ ɩ dagaa Krisito maa gyii kuwura naa fʋʋ saŋa mʋ nɩɩ Ɩbwaarɛ ii biti ɔ taa mʋ dʋn ana kpini waa mʋ ayaa kasɛ. 26 Laalaalʋwɛ ɔdʋn mʋ nɩɩ Ɩbwaarɛ ii biti ɔ nyita mʋ ɩ gyɛ lewu. 27 Lɩɩ fɛɛ ba kyʋrɔɔ waa Asɩnkyan yɩlasa mʋ tɔ yɛ, “Ɩbwaarɛ taa kʋtɔ kʋmaa nɩmʋ waa mʋ kasɛ.” Nɩɩ maa tɔwɛ kanɩn mʋ, ɩ dɛ ɔkpa fɛɛ asɩn mʋ nɩɩ ɔ tɔwɛ yɛ, kʋtɔ kʋmaa nɩmʋ mʋ, Ɩbwaarɛ gbaa‐gbaa mʋ nɩɩ ɔ taa kʋtɔ kʋmaa nɩmʋ waa Krisito kasɛ mʋ man tii sʋ. 28 Nɩɩ saŋa mʋ nɩɩ Ɩbwaarɛ kan ba taa kʋtɔ kʋmaa nɩmʋ waa Krisito kasɛ mʋ, Obii mʋ gbaa‐gbaa ii biti ɔ taa mʋ n‐yɩɩ waa mʋ‐Sɛ Ɩbwaarɛ mʋ nɩɩ ɔ taa kʋtɔ kʋmaa waa mʋ kasɛ mʋ, abaa tɔ. Kɛ Ɩbwaarɛ o be gyii kuwura kʋtɔ kʋmaa nɩmʋ sʋ.

29 Nɩɩ kelewu kyiŋi man bʋ tɔ mʋ, mɩnɛ ɩ waa sʋ nɩɩ akʋ bee biti fɛɛ be gyee bamʋ Ɩbwaarɛ kekyugyee sa bamʋ nɩɩ ba tee wu mʋ? Nɩɩ alewupu ba mɛɛ yɛ be kyiŋi ba nkpa tɔ mʋ, ɩ waa nɛnɛ sʋ nɩɩ akʋ bee biti fɛɛ be gyee bamʋ Ɩbwaarɛ kekyugyee sa bamʋ nɩɩ ba wu mʋ? 30 Nɩɩ anɛɛnɛ bɩrɛ, mɩnɛ ɩ waa sʋ nɩɩ an taga apʋ saŋa kʋmaa kanɩn? 31 Mɛ‐daa ana yɛ mi‐supu ana, n tɔwɛ fanɛ kesintin tɔ fɛɛ n gyaŋɛ lewu asɩn saŋa kʋmaa. Nɩɩ n kaapʋ mɛ n‐yɩɩ fanɛ sʋ, fɛɛ fan maa gyɛ Ɔnyɩrɩpɛ Yesu Krisito abuupu mʋ sʋ mʋ, ɩmʋ sʋ nɩɩ n tɔwɛ kanɩn. 32 Nɩɩ n kan n kɔ yɛ asa mʋ nɩɩ ba du fɛɛ ndʋnbwɛ Efeso Ɔsʋwʋlɛ sʋ, lɩɩ nyɩmɩsa nfɛɛrɛ sʋ mʋ, mɩnɛ nɩɩ n biti n nyɛ lɩɩ ɩmʋ tɔ? Nɩɩ alewupu ba mɛɛ yɛ be kyiŋi ba nkpa tɔ bɩrɛ, fan yɛgɛ a buu asɩn mʋ nɩɩ bɛɛ tɔwɛ yɛ,

35 Amaa ɔkʋ ii biti ɔ taasɛ yɛ, “Nɛnɛ nɩɩ alewupu bee biti ba kyiŋi ba nkpa tɔ? Nɩɩ mɩnɛ kayɩɩ‐wʋlɛ nɩɩ bee biti ba baa ba sʋ?” 36 Mɩnɛ kimelensi asɩn taasɛsa ndee? Fu mee nyi fɛɛ kʋtɔ mʋ nɩɩ fu duu kasɛ tɔ mʋ, kɩ mɛɛ yɛ kɩ kɔyɩ, amɔɔ ki wu pɔyɩ. 37 Nɩɩ kʋtɔ mʋ nɩɩ fii duu mʋ, man gyɛ kɩmʋ oyu mʋ nɩɩ kɩ tɛɛ dan lʋwɛ mʋ gbaa‐gbaa nɩɩ fɩɩ sʋ fii duu, amaa kɩ gyɛ oyu mʋ kibii nɩn fɛɛ kuyu kibi abɛɛ kikyenbee kibi. 38 Nɩɩ Ɩbwaarɛ ɩ sa oyu kʋmaa nɩmʋ kɩmʋ n‐yɩɩ kanan mʋ nɩɩ ee biti. Nɩɩ ɔ sa kibi kʋmaa nɩmʋ kɩmʋ gbaa‐gbaa kɩmʋ n‐yɩɩ kudubi. 39 N‐yɩɩ wʋlɛ kpini man gyɛ kʋkʋlʋn. Nyɩmɩsa kayɩɩ‐wʋlɛ kwɩɩ nɩɩ atɔbwaaya lɛɛ gbaa kwɩɩ. Nbwiibi lɛɛ kwɩɩ nɩɩ ɩkɩn lɛɛ gbaa kwɩɩ. 40 Nɩɩ sʋsʋ n‐yɩɩ wʋlɛ atɔ ɩ bʋ tɔ, nɩɩ kasɛ sʋ n‐yɩɩ wʋlɛ atɔ gbaa bʋ tɔ. Nɩɩ sʋsʋ n‐yɩɩ wʋlɛ bʋnyaa mʋ kwɩɩ, nɩɩ kasɛ sʋ n‐yɩɩ wʋlɛ bʋnyaa gbaa kwɩɩ. 41 Kyɔwɛ kɩkɩɩ tɔ kwɩɩ, nɩɩ ɔbwaayɩ kɩkɩɩ tɔ kwɩɩ, nɩɩ akyikpebi gbaa kɩkɩɩ tɔ kwɩɩ. Nɩɩ kikyikpebi kʋmaa nɩmʋ sʋ kɩmʋ gbaa‐gbaa kɩkɩɩ tɔ.

42 Kanɩn maŋa nɩɩ kelewu kyiŋi mʋ ii biti ɩ ba waa. N‐yɩɩ wʋlɛ mʋ nɩɩ bee pula mʋ ɩɩ gyɔɔ nɩn, amaa n‐yɩɩ pʋpwɛ mʋ nɩɩ Ɩbwaarɛ ii biti o kyiŋi lɩɩ lewu tɔ mʋ bɩrɛ mɛɛ yɛ ɩ gyɔɔ. 43 Kayɩɩ‐wʋlɛ kʋmaa mʋ nɩɩ bee pula mʋ, gyɛ kʋtɔ bɔrɔbɔrɔ nɩɩ kɩ man sʋ ɔlʋn, amaa nɩɩ Ɩbwaarɛ kan kyiŋi kɩmʋ bɩrɛ mʋ, kii biti kɩ baa kɩ sʋ bʋnyaa yɛ ɔlʋn. 44 Nɩɩ ba kan pula kɩmʋ mʋ, kɩ gyɛ dulinyaa tɔ kayɩɩ‐wʋlɛ nɩn, amaa nɩɩ Ɩbwaarɛ kyiŋi kɩmʋ mʋ, kɩ gyɛ kayaayu tɔ kayɩɩ‐wʋlɛ nɩn.

Fɛɛ kanan mʋ nɩɩ dulinyaa tɔ kayɩɩ‐wʋlɛ bʋ tɔ mʋ, kanɩn maŋa gbaa nɩɩ kayaayu tɔ kayɩɩ‐wʋlɛ bʋ tɔ. 45 Fɛɛ kanan mʋ nɩɩ Asɩnkyan yɩlasa mʋ ɩ tɔwɛ yɛ, “Adam gyankpaasa mʋ nɩɩ Ɩbwaarɛ tʋʋ mʋ ba biliŋi nyɩmɩsa kɩɩsa.” Amaa Yesu Krisito mʋ nɩɩ bɛɛ tɩɩ yɛ Adam laalaalʋwɛ mʋ, gyɛ Ɩbwaarɛ Kayaayu mʋ nɩɩ kɩɩ sa nkpa. 46 Man gyɛ kayaayu tɔ kayɩɩ‐wʋlɛ ɩ gyankpaa ba. Amaa dulinyaa nɩmʋ tɔ kayɩɩ‐wʋlɛ ɩ gyankpaa ba, pɔyɩ nɩɩ kayaayu tɔ kayɩɩ‐wʋlɛ ba. 47 Adam gyankpaasa mʋ lɩɩ kasɛ sʋ nɩn, lɩɩ fɛɛ ɩsɛ nɩɩ Ɩbwaarɛ taa pɔyɩ mʋ. Amaa Adam nyɔsapʋ mʋ nɩɩ ɔ gyɛ Krisito mʋ, lɩɩ sʋsʋ nɩn. 48 Kanɩn sʋ fɛɛ kanan mʋ nɩɩ Adam mʋ nɩɩ ɔ lɩɩ kasɛ sʋ du mʋ, kanɩn nɩɩ kasɛ sʋ asa gbaa ba du. Nɩɩ kanan mʋ nɩɩ Adam mʋ nɩɩ ɔ lɩɩ sʋsʋ du mʋ, kanɩn nɩɩ mʋ asa gbaa ba du nɩn. 49 Fɛɛ kanan mʋ nɩɩ an duli kasɛ sʋ nyɩmɩsa mʋ, kanɩn sʋ an biti an baa an duli nyɩmɩsa mʋ nɩɩ ɔ lɩɩ sʋsʋ mʋ gbaa.

50 Mɛ‐daa ana yɛ mi‐supu ana asɩn mʋ nɩɩ n biti fɛn bɩɩ mʋ ɩ gyɛ yɛ, kʋtɔ mʋ nɩɩ kɩ sʋ kayɩɩ‐wʋlɛ yɛ nkalan mʋ, mɛɛ taalɛ nyɛ loo Ɩbwaarɛ kuwura‐gyii mʋ tɔ. Nɩɩ anɛ kayɩɩ‐wʋlɛ mʋ nɩɩ kɩɩ gyɔɔ mʋ, mɛɛ taalɛ kyɩna kakpaa. 51 Fan nu asɩn baalasa nɩmʋ danbɩrasa. Man gyɛ anɛ kpini ii biti a wu. Amaa saŋa kʋ tɔ mʋ Ɩbwaarɛ ii biti ɔ kyɛɛgɛ anɛ Krisito abuupu mʋ keduli yɛ kayɩɩ‐wʋlɛ. 52 Nɩɩ ɩnɩmʋ kpini ii biti ɩ waa opula tɔ fɛɛ ansi sʋ kɩŋabɛɛ, saŋa mʋ nɩɩ kabɩlɛ laalaalʋwɛ mʋ kan fʋlɛ mʋ. Lɩɩ fɛɛ kabɩlɛ mʋ ii biti o su, nɩɩ bamʋ nɩɩ ba wu mʋ, bee biti ba kyiŋi ba nkpa tɔ, nɩɩ ba mɛɛ yɛ ba bɩla wu. Nɩɩ anɛ mʋ nɩɩ an san an tɛ nkpa tɔ mʋ, an biti a kyɛɛgɛ. 53 Lɩɩ fɛɛ kayɩɩ‐wʋlɛ mʋ nɩɩ kɩɩ gyɔɔ mʋ, dagaa kɩ maa kyɛɛgɛ waa kɩmʋ nɩɩ kɩ mɛɛ gyɔɔ. Nɩɩ kayɩɩ‐wʋlɛ mʋ nɩɩ kii wu mʋ, dagaa kɩ maa kyɛɛgɛ waa kɩmʋ nɩɩ ki mee wu. 54 Ɩmʋ sʋ nɩɩ ɩ kan ba fɛɛ, kayɩɩ‐wʋlɛ mʋ nɩɩ kɩɩ gyɔɔ mʋ, kyɛɛgɛ waa kɩmʋ nɩɩ kɩ mɛɛ gyɔɔ, nɩɩ kayɩɩ‐wʋlɛ mʋ nɩɩ kii wu mʋ, kyɛɛgɛ waa kɩmʋ nɩɩ ki mee wu mʋ, tʋtɔ nɩɩ Asɩnkyan yɩlasa mʋ ii biti ɩ ba kesintin tɔ. Ɩmʋ ɩ gyɛ yɛ, “Ba kɔ gyii lewu sʋ muuri mʋ.”

58 Ɩmʋ sʋ mɛ‐daa ana yɛ mi‐supu, fan yɩla tɔ kenken, kɛ fan man yɛgɛ kʋtɔ kʋ ki gyingyen fanɛ. Fan payɩ ansi waa Ɔnyɩrɩpɛ kusun mʋ saŋa kʋmaa. Lɩɩ fɛɛ fen nyi fɛɛ kusun mʋ nɩɩ fen sun Ɔnyɩrɩpɛ tɔ mʋ, ɩ mɛɛ yɛ ɩ waa kɩyan.