Sam Kranzpnu-esz'mz-nrade-nzlvqn (65)
Kxaodu, Kxrpalz, Kxrka
Nabz ne Devet kx yrbzle mz kxrmailz ngr dzbe kxnzngrng.
Kxaodu
1 Gct, nzglqlz-krgr nim Jerusalem tubq-esz'ngr,
X rpikr na-atutr-zpwxkr nzesalz-krbzkrng bam.
2 Murde xlrme nzkrka'-krgr,
Mz nzmnc-xgle-krgr nim.
3 X kxmule-esz' nzvz-rbr-krgrng nzmrilvzlr nigr,
A' ipqpx zvz alwx rgrng amrlx.
4 Namrlz-ngrmle bagr, nigr kcng tqmcpxqng
X tqvzmitrqng Mangr-nzangiongr nim.
Murde sa namnc-zpwxkr
Mz nzrtwzngr da kxmrlzting mz ma nyzm.
Kxrpalz
5 Mevalu rgr, mzli kc tqyrni-ngrbzkr bam, ayzlume natqgr
Mz nzbatr-krme nzaovxio-krgr.
Lr mrkzbleng nzmncng drtc' x trmctu mz nrlc tulvzo.
X sc tzabrtr-kzpzlr drtwrdr bam.
6 Murde mz nzxplr-krm atulzq newz kxetuting,
Mz nzaelwapx-krm nzmyalzkr zmatq ngrm.
7 Aoq nrwx mz nzyclwzkr srkau x aesakiq nzyrpukr natq nrc. ✡ Sam 89:9; 107:29; Matiu 8:26; Mak 4:39; Luk 8:24
X amnc-nabuq leplz kcng tzxpqbrlr-ngrdr nim.
8 Nzamrluengr nim mz nzetukr zmatq ngrm.
X mz nrlc tulvzo nzmalqlvzlr da kcng tqaleqng.
Kxrka
9 Gct, aclve-angidrq nrlc mz nzadc-krm tewa,
Murde dakxnzng nalvc angidr mz drtc'.
10 Tewa lc tqayayrtile drtc' nyzgr,
Murde da kx petikr mz nrlanc nyzgr nalvcpulzmqng.
11 Ycngr dakxnzng kxkqlu mrkcng amrlx tqvzkiq.
X bxli scgrng yrbuti zvz mz da kxmrlzting.
12 X abrtz-zlwz-ngrgr
Nzmc-krgr nzplckr nra nounc nyzgrng.
13 Angrlvzkr nzyrlvzbqtikr animol negrng,
X malqkr murde nrlanc nyzgrng brtipeng x ycpe pipz nzrkqlzngr.