Sam Kranzpnu-pwx-nrade-rtqmz (48)
Nzmyalzkr Jerusalem, Mzteadau Nyz Gct
Nabz ne nqvi lr Kora.
Mzteadau Nyz Gct
1 Yawe myatxlz-esz'ngr. X takitrde nzglqlz-krgu nide
Mz mzteadau nyzde kc tqycom Saeon, newz kxtr nyzde.
2 Nide king kx rngisc zmatq. X Newz Saeon myatxlz x mzte opx.
X Mzteadau nyzde rkatrpz nzabrtzkr leplz mz nrlc tqlvzo.
3 Gct aelwapxpe-ngrde kx trpnzngr da kx nakx mz drtqgu,
Mz nzmncpx-krmgu badr mz lrpalvc nyzdeng mz mzteadau lc.
4 Kzdung king nzvzmqng nztung me esz'.
Nzrpilr naotang badr lr mzteadau lc.
5 A' kx nzmclr nzmatq-zlwzkr mzteadau Jerusalem,
Nzkctipx-ngrdr x sc tzdwapeng mz zmwxlr,
6-7 Kc tqprtilzle nidr
Apule zvetq ngr drtq olvz kx narmika.
X nzrnrcti-lzbqng
Apule lcsu kxrtcnengr srkau ngr nounenq.
8 X mzli lcpwz, tqmnc-ngrgu mzteadau nyz Gct rgu,
Sc tqmcpe-kzku kx Yawe nide Gct kc tqrninr.
X atu-amqngi-zvzle mzteadau lc,
Da kc tzwai nzyapwxtipxkr melrmqgung le mzli kc.
Mangr-nzangiongr Gct
9 Gct, aoti zvz drtwrgr nzaodu-krm
Mz nzvztr-krgr Mangr-nzangiongr nim.
10 Leplz amrlx mz nrlc tulvzo sa naglqlzlr nim mz nzxlr-krdr nzmyalz-krm.
Murde nzaclve-angidr-krm tubq.
11 X nigr lr Israel amrlx nzabrtz-ngrgr kz
Nztubqkr da kx pipxq.
12 Nigu leplz neng Gct, naolvxtiku Jerusalem,
X nabrti mzku mrkcng tztu-ngrdr kxnzaukz nedeng.
13 Naobqlvzti-zpwxku drkq ngrdeng x nzmqngikr lrpalvc ngrdeng,
Murde nayapwxtipx-zvzbz mz doa ne doa negung.
14 Nzmyalzkr Gct rgu sc tqaelwapx-lzbqngr mz mzteadau lc.
X sc tqmailzle nigu tqyc tqyc.