7
डायडायान रिती पालनेन बारामाय सावाल
(मत्ती 15:1-9)
1 तेवी फरिसी एने थोड़ाक देरेमगुरू जा यरूशलेम हेयराम रेन आयेल एता, यीशुन कावदेन टोलवाय गीया। 2 एने ता यीशुन थोड़ाक चेलाह बिगेर आथ दुयेल रूटो खाताला देख्या, केरीन ता चेलाह एठा मान्या।
3 काहाकाय फरिसी एने आखा यहुदि माणहे, डायला माणहान रितीन पालेन केरताला: काहाकाय जाह वोर हास केरीन आथ दोव नाह लेणु ताह वोर रूटो नाह खाताला; 4 एने ता आटा माय रेन जी काय बी चिज लावतेह ताह पेल हास केरीन दोव नाह लेते, ताह वोर नाह खाते। एने जुलूम ओहली रितीन पालेन केरतेह, जिहकेरीन वाटको, कुलह्यो एने तांबान ठामलाह चोलनु एने दोवणु।* 7:4 बाजार माय रेन लायेल काह सामान पेल दोवी नाय; नाहते जो काय, जो बाजार माय रेन लावणेन पासाण खुद दोव नाय लेय
5 केरीन फरिसी एने देरेमगुरू यीशुह फुशा, “तारा चेला काहा नाह डावाला माणहान हिकवोणीह मान्तेह, एने बिगेर आथ दुयेल रूटो खातेह।”
6 यीशु ताह केयो, “यशाया जाणकार तुमरो कोपटीन बाराम हास केरीन जाणाव किरेल हे, जिहकेरीन लिखेल हे:
“न्या माणहे ओठा केरीन ते मारो मान मेलतेह,
पुण न्यान मोन मार हेऱ्यो रेन जुलूम सेटो रीथे।
7 न्या उदेड़ मार नावान बोक्ती केरतेह,
एने सोतान नियमाह बोगवानान नेम हे
केरीन माणहाह हिकाड़तेह!”
8 “काहाकाय तुमू बोगवानान उकुमाह टालीन माणहान हिकवोणीह मान्तेह।”
9 यीशु ताह ज्य बी केयो, “बोगवानान उकुमाह टालनेन केरता तुमू जुलूम चेतुर हेते, पुण सोतान बाणायेल हिकवोणीह मान्तेह।” 10 काहाकाय मुसो कियेल हे, “आपणी आईख आबाख ने मान मिलज्यो,” एने जो कुण आईख आबाख ने बाराम बुरो केय, “तो खेरीच माराय जाय।” 11 पुण तुमू केतेह काय जो आईख आबाख आपण्यो एतो, “तो मी नाह आप सिकेत।” काहाकाय तो मी बोगवानाह बेट चेड़ाव दियेल हे, 12 केरीन तुमूह तुमरे आईख आबाख ने चाकरी नाह केरनेन बाहानो जुड़ जाथे। 13 इहकेरीन तुमू बोगवानान वचनाह टाल देतेह। पुण तुमू ठेरायेल ता नेमाह मान्तेह, एने ओहलाच जुलूम काम तुमू केरतेह।
माणहाह एठी केरनार चिज
(मत्ती 15:10-20)
14 उवतो यीशु माणहाह आहने हादिन केयो, “तुमू आखा मारी हुमलो, एने सुमजो। 15 ओहली काल्लीस वोस्तु नाह सोती जी माणहाह बाहेर रेन माय जाईन ताह एठी केरी। पुण जी चिज माणहान माय रेन निकलेह, तीस माणहाह एठी किरेह।” 16 जान होमेलनेन कान एती, ता होमली लेय।† 7:16 ज्यो वचन थोड़ाक लेख माय नाह जुड़ेत। देखी 4:23
17 जेवी यीशु गेरदीह सोड़ीन गेराम गीयो, तेवी तान चेला ज्या किस्सान बाराम फुशा। 18 यीशु ताह केयो, “काय तुमू बी नासमज हेते? काय तुमू नाह सोमेजते काय जी चिज बाहेर रेन माणहान माय जाथे? ती चिज ताह एठी नाह किरेत, 19 काहाकाय ती चिज तान मोनाम नाह जात, पुण पेटाम जाथे एने आगणेन द्वारे बाहेर निकेल जाथे।” ज्य किन यीशु आखी खाणेन चिज चोखो ठेराव दिनो।
20 यीशु पुशो ताह केयो, “जो माणहान माय रेन निकलेह तोच माणहाह एठो किरेह। 21 काहाकाय माणहान मोना माय रेन खाराब विचार आवतेह, जो ताह चोरी, खुन, सिनालो, 22 लोब, खाराब काम, खाराब देखणु, जुठ, चिहटा, मोठलाय, कोपेट एने फोगान गेत वातु केरावणे। 23 ज्यु आख्यु खाराब वातु माणहा माय रेन निकेलनु, एने माणहाह एठो केरने।”
बिगेर यहुदि बायकुन बुरहो
(मत्ती 15:21-28)
24 उवतो यीशु ता रेन निकलीन सुर हेयराम आवो, एने एक गेराम गीयो। तो ज्य नाह होदतालो काय कुण बी ताह ओलखी, पुण यीशु लीकाय नाह सीकनो। 25 एक कनानी जातीन बायकु यीशुन बाराम होमलीन ताह मिलनेन आवी, ज्यीन आतली सोरी माय बुतड़ो रिग रियेल ईतो, एने ती गेराम आवीन तान पाया हेरी पोड़ गियी। 26 ती बायकु बिगेर यहुदि एती, एने सीरीयान फीनीके माय पायदा ईयेल एती। ती यीशुह विन्ता केरी काय मार सोरी माय रेन बुतड़ाह निकाल दे। 27 यीशु तीह जापाप आप्यो, “पेल सोराह आफेरने दे। काहाकाय सोरान रूटो लेन चितान ओंगाण टाकणे हाजो नाह सोतो।”
28 ती यीशुह जापाप आप्यी, “ज्य खेरीच हे मालीक, पुण सोरान उस्टालो रूटो पाटला पोर रेन पुड़ेल चिता खाणु ते खोरा!”
29 यीशु ती बायकुह केयो, “तु ज्य कियेल हे केरीन हुकेह गेर जातरे, काहाकाय बुतड़ो तार सोरी माय रेन निकेल जायेल हे!”
30 ती गेर पोचीन तीन सोरीह खाटला पोर हुवताली देखी; एने बुतड़ो ती माय रेन निकेल जायेल ईतो।
बेयरा एने बोबड्या माणहाह यीशु हुदारने
31 उवतो यीशु सुर ने ईलाका माय रेन निकलीन सेदान ईलाका माय लागतोस गेलील ने देरीया हिऱ्यो आवो, एने दोह गावान हियोर दिकापुलिस माय गीयो। 32 थोड़ाक माणहे ता फाय एक बेयरा माणहाह लावा जो बोबड्यो बी एतो, माणहे ता एदमी पोर आथ मेलनेन केरता यीशुह विन्ता केऱ्या। 33 यीशु ताह गेरदी माय रेन आंगेच ली गीयो, एने यीशु तान आंगल्या बेयरान काना पोर मिल्यो, एने तान आंगल्या पोर थुपीन तान जिबी पोर मिल्यो। 34 एने हेरगान उगे देखीन हाह लिदो, एने ताह केयो, “इप्फत्तह!” मतलब “उगड़ीजा!”
35 ता माणहान कान उगड़ी गीया, एने तान जिबीन गाठ बी जात रेनी, एने तो हास केरीन बोलने बाज गीयो। 36 तेवी यीशु ताह उकुम आप्यो काय ज्य कुणीह मा किहो; पुण ताह जोलो सोमजाड़ेल ईतो, तोला ता माणहाह केया। 37 तान वातु होमलीन बोंगलाय गीया एने केया, “ज्यो कोलोक हास केरीन आखो काय केर लिथे, तो बेयराह होमेलने एने मुकाह बोलनेन ताकेत आपेह!”