1 यीशु यरीहो माय रेन जाणे बाजरियेल ईतो। 2 तेवी ता जक्‍कय नावान एक एदमी ईतो, तो जुलूम मालदार एने फालो लेणारान मुखी ईतो। 3 जक्‍कय यीशु कुण हे तो देखणे होदतालो पुण गेरदीन कारेण यीशुह देख नाह सेकतालो, काहाकाय तो बुटक्‍योच ईतो। 4 तेवी देखणेन केरता तो आखाम रेन ओंगाण दोवड़ीन एक उमरान जाड़ा पोर चेड़ गीयो, काहाकाय यीशु तीच वाटे जाण्यो ईतो। 5 जेवी यीशु ता जागाम आवो, तेवी जाड़ान उपेर देखीन केयो, “एय जक्‍कय, सेटकोह नेचो उतेर; काहाकाय आज माहु तार गेराम थोबणे जोरेवरी हे।”

6 तो सेटकोह उतऱ्यो एने खुस एन यीशुह तान गेर ली गीयो।

7 ज्य देखीन आखा माणहे कुड़कुड़ावीन केणे बाज गीया, “ज्यु ते एक पापी माणहा फाय पावणो बोणीन थुबेह।”

8 तेवी जक्‍कय उठीन मालीकाह केयो, “एय मालीक, मार मालदेन माय रेन आदो ईसो मी गेरब्याह आप देह, एने मी एगदाह फाय ठेगीन वोदार लेदो एय ताह चार गुणा पोशो आप देह।”

9 तेवी यीशु ताह केयो, “आज ज्या गेरा माय सुटकारो आयेल हे, काहाकाय ज्यो बी अब्राहाम ने बिटोख हे। 10  ✡ 19:10 मत्ती 18:11काहाकाय माणहान बिटोख टाकायेल ताह होदणे एने तान सुटकारो केरने आयेल हे।”

11 जेवी माणहे ज्‍यु वातु होमेलने बाजरियेल एता, तेवी यीशु एक उंजु किस्सो केयो, काहाकाय यीशु यरूशलेम ने आहने ईतो, एने ता सोमेजताला काय बोगवानान राज एवी आवण्यो हे। 12 ते यीशु केयो, “एक मोटलो पोदवालो एदमी सेटाच देसाम जाथे, काहाकाय राज पोदवी लेन आवती रेय।” 13 जाणेन पेल तान दोह पावराह हाद्यो, एने एक एक होनान सिक्‍का आपीन ताह केयो काय, “मी आवुह ताह वोर वेपार किरते रिज्यो।” 14 पुण तान माणहे ता हेऱ्या दुसमोनाय मेलताला, ते ता तान पासाण खोबर्‍या फाय खुबेर मोकली काय, “आमु नाह होदते काय ज्यु आमरे उपेर राज केरी।”

15 जेवी राज पोदवी जुड़ गियी तेवी मालीक पुशो आवो, तेवी तो सिक्‍का आपेल पावराह हाद्यो, काहाकाय मालुम केरने होदतालो काय ता कोलोक कामायेल हेते। 16 तेवी पेल्लो आवीन केयो, “एय मालीक, मी तारा होनान सिक्‍का केरीन दोह उंजु होनान सिक्‍का कामायेल हे।” 17 मालीक ताह केयो, एय हाजा पावोर! तु जुलूम थोड़ाक माय ईमानदार निकेलनो, ते तानकेरता दोह हेयरा पोर आदिकार मेल। 18 दिहरो आवीन केयो, “एय मालीक, मी तारा होनान सिक्‍का केरीन पाच उंजु सिक्‍का कामायेल हे।” 19 मालीक ताह बी केयो, “तु बी पाच हेयरा पोर आदिकार मेल।”

20 तीसरो आवीन केयो, “एय मालीक, देख तारो होनान सिक्को ज्यो हे; जाह मी पोतड़ा माय लीकाड़ मीलेल ईतो। 21 मी तुवाह बितालो, काहाकाय तु काठो माणुह हे, जो तु नाह मिल्यो ताह विस लिथे एने जो तु नाह पेर्‍यो, ताह काटेह।” 22 मालीक ताह केयो, “एय खाराब पावोर, मी ताराच सोबदा केरीन तुवाह गुनेगार ठेरावथो। तुवाह मालुम एतो काय मी काठो एदमी हे, एने मी जाह नाह मिल्यो ताह विस लेथु, एने जो मी नाह पेर्‍यो ताह काटथु; 23 ते तु मार पोयशा होवकाराह काहा नाह आप दिनो? तेवी मी आवीन वियाजताज लेय लितो?”

24 जा माणहे आहने उबरियेल एता, तो ताह केयो, “तो होनान सिक्को ता फाय रेन लेय लिवो, एने जा फाय दोह सिक्‍का हेते ताह आप दिवो।” 25 ता ताह केया, “एय मालीक, ता फाय ते पेलुच रेन होनान दोह सिक्‍का हेते!” 26  ✡ 19:26 मत्ती 13:12; मरकुस 4:25; लुका 8:18मी तुमूह केथु, “जा फाय हे, ताह आपाय जाय; एने जा फाय ना सोतो, ता फाय जो बी हे तो बी लेवाय जाय। 27  ✡ 19:27 मत्ती 25:14-30पुण मार ता दुसमोनाह जा नाह होदताला काय मी ता पोर राज केरू, ताह न्या लावीन मार सामने मार टाको!”

28 ज्यी वात केयीन यीशु तान ओंगाण ओंगाण यरूशलेम ने उगे चाल पुड़नो। 29 जेवी यीशु जेतुन नावान बोयड़ा पोर बेथफगे एने बेतनिया गावान आहने पोचनो, ते यीशु तान चेलाम रेन दुय जाणाह ज्य केयीन मुकल्यो, 30 तुमू सोमोरल्या गावा माय जावो; एने ता पोचताच तुमूह बांदिल एक गेदड़ान पिलो जुड़ी, ता पोर कुण बी नाह बुहेल सोतो ताह सोड़ीन मार फाय लियावो। 31  * 19:31 मालीक; तान मालीककेदी एगदो तुमूह फुसी, “ज्याह काहा सोड़ने बाजरेनाह, ते इहकेरीन किज्यो काय मालीकाह ज्यान गिरेज हे।”

32 जा मुकलेल एता, ता जाईन जीहे यीशु ताह कियेल ईतो, तिहेच ताह जुड़नो। 33 जेवी ता गेदड़ान पिलाह सोड़ने बाजरियेल एता, ते गेदड़ान मालीक ताह फुशो, “ज्या गेदड़ान पिलाह काहा सोड़तेह?”

34 ता केया, “मालीकाह ज्यान जोरवुत हे।”† 19:34 मालीक; तान मालीक 35 ता गेदड़ान पिलाह यीशु फाय लावा, एने तान फाड़का गेदड़ान पिला पोर आथरीन यीशुह ता पोर बोहाड़ देना। 36 जेवी यीशु गेदड़ान पिला पोर बोहीन जाणे बाजरियेल ईतो, ते ता तान फाड़का वाटे आथीरते जाताला।

37 यीशु यरूशलेम ने आहने जेतुन बोयड़ान उतेरती पोर आवो, ते चेलान आखी टोली जुलूम खुस एय गियी एने ज्या चोमेत्कार ने मोटला कामाह देखीन मोठेस आयड़ीन बोगवानान बोड़ाय केरी: 38 “जो राजान नावा माय आवीह तो बोरकेतवालो हे, हेरगा माय सान्ती एने जुगा माय बोगवानान बोड़ाय एय!”

39 तेवी गेरदी माय रेन थोड़ाक फरिसी यीशुह केणे बाज गीया, “एय गुरू, तारा चेलाह ठावका केर!”

40 यीशु जापाप आप्यो, “मी तुमूह केथु, केदी ज्या ठावका रेती ते दिगोड़ आयेड़ने बाज जाती।”

41 जेवी यीशु यरूशलेम ने आहने आवो, तेवी तो ता हेयराह देखीन रेड़नो। 42 एय यरूशलेम! तु आजुच सान्तीन वातुह जाणतो, ते कोलोक हाजो रेतो पुण ज्यी वात तारा डोला केरीन लीकाय जायेल हे। 43 काहाकाय ओहला दिह आवती काय तारा दुसमोन टुलो एन तुवाह कोंड लेती, एने चार मीरेन माणहे तार पोर दाबाव टाकती; 44 तुवाह एने तार माय रेणारे तारा सोराह माराव देती, तार माय देगड़ा पोर दिगोड़ बी नाय रेय; काहाकाय जा टेम माय बोगवान तुमूह वोचाड़नेन आयेल ईतो, पुण तुमू ताह नाह ओलख्या।

45 तेवी यीशु मोंदिर माय जाईन वेचणाराह बाहेर निकालने बाज गीयो! 46 एने यीशु केयो, “वचन माय लिखेल हे काय बोगवान किथे, ‘मारो गेर विन्तान गेर केवाय,’ पुण तुमू ताह डाकुन पाड़ावो बाणाव मेल्याह!”

47  ✡ 19:47 लुका 21:37यीशु दाड़ीन मोंदिर माय हिकवोण केरतालो; एने मुखी चाकर्‍यो एने देरेमगुरू एने माणहान डायला यीशुह मारनेन होदताला, 48 पुण ज्यो काम केरनेन ताह काय गालो नाह जुड़नो काय ज्य किहीक केरहु, काहाकाय आखा माणहे यीशुन वातुह पुरा मोना केरीन होमेलताला।