1 ती टेम थोड़ाक माणहे आव पोचना, एने यीशु हेऱ्या गेलीलान माणहान बाराम वातु केरने बाज गीया, जाह पिलातुस मारेल ईतो। 2 यीशु ताह जापाप आप्यो, “तुमू सोमेजतेह काय ज्या गेलीली दिहरा आखा गेलीलान माणहाह रेन जादा पापी एता काय तान ज्यी देशा एनी? 3 मी तुमूह केथु काय नाह। केदी तुमू पाप केरने बोंद नाय किरहो, ते इहीचकेरीन खेतेम ईहो। 4 काय तुमू सोमेजतेह ता आठरा जाणे जा पोर शिलोम ने मालो पुड़ेल ईतो, एने ता दाबाईन मोर गीया, ता यरूशलेम ने रेणारे आखा माणहाह रेन जादा गुनेगार एता? 5 मी तुमूह केथु काय नाह; पुण केदी तुमू पाप केरने बोंद नाय किरहो, ते तुमू आखा बी इहीचकेरीन खेतेम ईहो।”

6 ओवतो यीशु ज्यो किस्सो केयो: एगदा अंगुर ने खेता माय एक अंजीरान जाड़ एतो। एने तो ता माय फोल होदणे आवो, पुण फोलुच नाह जुड़नो। 7 तेवी तो खेतान राखवाल्याह केयो, देख तीन वोरह्या वोर मी ज्या अंजीरान जाड़ाम फोल होदणेन आवथु, पुण नाह जुड़ेत तान केरता ज्याह तोड़ दिवो काय ज्यो बुईह काहा रोक रेय? 8 राखवाल्यो मालक्याह केयो, “एय मालीक ज्याह ज्यी वोरीह उंजु रेणदे काय मी ज्यान कावदेन खोदीन खोत टाकुह। 9 केदी दिहरी वोरीह फोली ते हाजो, नाह ते ज्याह काट दिज्ये।”

10 विहेवणेन दिह यीशु एक बोक्ती केरन्या गेरा माय हिकाड़तालो। 11 ता एक बायकु एती, जीह आठरा वोरह्या वोर एक कमजोर केरनार बुतड़ो लागेल ईतो, एने ती डोंगाय जायेल एती एने किहीक बी हुतरी नाह एय सेकताली। 12 यीशु तीह देखीन हादिन केयो, “एय बायकु, तु तारी कमजोरीम रेन सुट जायेल हे।” 13 तेवी यीशु ती पोर आथ मिल्यो, एने ती तुलेचबूखे हुतरी उबरेय गियी, एने बोगवानान बोड़ाय केरने बाज गियी।

14 ज्यानकेरता काय यीशु विहेवणेन दिह हुदारेल ईतो, यहुदिन बोक्ती केरन्या गेरान आदिकारी खीजवायीन माणहाह केणे बाज गीयो, “सोव दिह हेते जा माय काम केरने जुवे, एने ताच दिह्या माय आवीन हुदरे, पुण विहेवणेन दिह नाह।”

15 ज्य होमलीन मालीक ताह जापाप आप्यो, “एय कोपट्या, माणहे काय विहेवणेन दिह तुमू माय रेन एक तुमरा बोयलाह नाहते गेदड़ाह कोठाम रेन सोड़ीन पाणी पिवाड़ ने नाह ली जात? 16 ते काय ज्यो हाजो नाह एतो काय जी बायकु अब्राहाम ने बेटीख हे, जीह बुतड़ो आठरा वोरह्या वोर बांद मिलेल ईतो, विहेवणेन दिह ज्या बांदायेल माय रेन सुट गियीह?” 17 जेवी यीशु जी वातु केयो ते तान आखा विरोदी लाजवाय गीया, एने आखी गेरदीन माणहे ता बोड़ायीन कामाह देखीन, जा यीशु केरतालो, खुस एय गीया।

18 पुशो यीशु केयो, “बोगवानान राज कुणीन गेत हे? एने मी तान गेणती कुणा हेऱ्यो केरू? 19 तो राईन दाणान गेत हे, जाह एगदो माणुह लेन तान खेताम पिरीह: एने तो वोदीन जाड़ बोण गीयो; एने चीड़ा तान डालख्यु माय पांजरो बाणावीन रेतेह।”

20 यीशु पुशो केयो “मी बोगवानान राज ने गेणती कायता हेऱ्यो केरू? 21 तो खमीर ने गेत हे, जाह एगदी बायकु लेन फिटा माय बेचकी देनी, एने आखो फिट खमीर बोण गीयो।”

22 यीशु हियोर हियोर एने गाव गाव हिकाड़तेन यरूशलेमान उगे जाणे बाजरियेल ईतो, 23 एने थोड़ाक माणहे यीशुह फुशा, “एय मालीक, काय सुटकारो सापड़ावणारे थोड़ाच हेते?” 24 यीशु ताह केयो, “हाकड़ा बायणाम जाणेन कोसीत किरो, काहाकाय मी तुमूह केथु काय जुलूम जाणे रिगणेन कोसीत केरती, एने ता रिग नाय सेकती। 25 जेवी गेरान मालीक उठीन बायणो लागाड़ लेय, एने तुमू बाहेर उबरेन बायणो ठोकीन किहो, ‘एय मालीक आमरी केरता बायणो उगाड़ दे,’ एने तो केय, ‘मी तुमूह नाह ओलखेत, तुमू कावाला हेते?’ 26 ताहार तुमू किहो, ‘आमु तार सामने खादा पिदा एने तु आमरा आटा माय हिकाड़तालो।’ 27 पुण तो केय, मी तुमूह केथु, ‘मी नाह जाणेत तुमू कावाला हेते। एय अन्याय केरनारे तुमू आखा मार हेऱ्या रेन सेटा एय जावो।’ 28  ✡ 13:28 मत्ती 22:13; 25:30✡ 13:28 मत्ती 8:11,12तुमू अब्राहाम एने इसहाक एने याकुब एने आखा जाणकाराह बोगवानान राज माय बोह रियेल दिखहो, पुण आपणे आपाह ता रेन बाहेर काड़ मीलेल दिखहो, तेवी रिड़हो एने दात केकड़ावहो! 29 तेवी पुर्व एने पश्‍चिम; उत्तर एने दक्शिण रेन माणहे टोलवाती, एने ता बोगवानान राज ने खाणा माय बोहती। 30  ✡ 13:30 मत्ती 19:30; 20:16; मरकुस 10:31एने हुमलो, जा माणहे पासाण हेते, ता ओंगाण एय जाती, एने जा ओंगाण हेते, ता पासाण एय जाती।”

31 तुलेचबूखे थोड़ाक फरिसी यीशु फाय आवीन केया, “हेरोदेस राजा तुवाह मारने हुदेह, केरीन तु न्या रेन एगदी उगे जातरे।”

32 यीशु ताह केयो, “जाईन ता कोल्या हे किय दिवो काय होमेल, ‘मी आज एने हेकाले बुतड़ाह निकालथो एने दुखाऱ्याह हुदारथो, एने तीसरे दिह मारो काम पुरो केरूह। 33 तीबी माहु आज एने हेकाले एने पोरेन दिह चालतेच रेणे जोरेवरी हे, काहाकाय काल्लो बी जाणाव केरनार यरूशलेम ने सावाय दिहरी जागे नाह माराय जाणे।’

34 “एय यरूशलेम! एय यरूशलेम! तु जो जाणाव केरनाराह मार टाकेह, एने जाह बोगवान तुवा फाय मुकलेल, ताह तु देगड़ाठीह। एने कोलीक वार मी ज्यो हुद्यो काय जिहकेरीन कुकड़ी तीन पिच्‍याह फाकड़ा बुंदे टुलो किरेह, तिहेच मी तारा सोराह टुलो केरू, पुण तुमू इही नाह होद्या। 35 दिखो, तुमरो गेर तुमरी केरता उजाड़लोस सोड़ाय जाथे, एने मी तुमूह केथु: जाह वोर तुमू नाय किहो, ‘बोरकेतवालो हे, जो बोगवानान नावा माय आवीह, ताह वोर तुमू माहु पोशा केदी नाय दिखहो।’ ”