इब्रानियो कि पत्री
इब्रानियोन पोत्रो
ओलखात
यीशु जुनाला नेमान जुलूम होवट्यु जाणाव्युह पुऱ्यू किहीक किरेह ज्यो देखाड़नार इब्रानियोन पोत्र हे। ज्यो एक दिर आपणार पुस्तेक हे! एक हिकवोण माय ज्याह बाणायेल हे, आख्यु जाणाव एने मुखी चाकर्यान जापापदारीह यीशु किहीक पुरो किरेल हे तो साप देखाड़नार साठ रेन बी जादा जुनाला नेमान उल्लेख ज्यी पुस्तेक माय हे। तानकेरता ज्यो पुस्तेक यहुदि मसी माणहान केरता प्रोत्साहन ईमोत आपणार मानाय गीयो। ज्यान पासाण ज्यो कायदो यीशु किहीक पुरो किरेल तो ज्यी पुस्तेक माय साप देखाड़ेल हे। आखा पापान केरता एकुच वार एने यीशु कायेम ने बोली ईनो। ज्या पुस्तेक माय ओहलो सोमेज आवीह काय यीशु मसी आपुह बोगवाना पोर बुरहो केरनेन केरता तियार किरेह। 12:2 तिहेस केरीन ज्या काल माय आपु विश्वासीन केरता ज्या पुस्तेक माय मुठलो ईमोत एने प्रोत्साहन हे। आपुह ता पोर निर्बर रेणे जुवे।
इब्रानियोन पोत्र कुण लिखेल हे तो आपुह मालुम नाह सोतो, पुण तीबी थोड़ाक पंडित, विदवान माणहान ज्य मान्नु हे काय बोगवानान सेवक प्रेरित पौलुस, लुका, बरनबास ज्या ज्यी पुस्तेक लिखेल एती। तिहेस केरीन ज्य पुस्तेक केवीह लेखानो एय तो बी आपुह मालुम नाह सोतो। पुण जुलूम विदवान इही मानतेह काय ज्य मसीन जेल्मान पासाण 70 वोरह्यान पासाण लेखाय गीयो एय। जेवी यरूशलेम हियोर 70 साल माय खेतेम केराय गीयो। ज्य पुस्तेक जुलूम होवट्यु मोंडली माय वाचाय गीयो एय। ज्यो रोम हेयराम रेन लेखाय जायेल एतो। 13:24
रूपरेखा
1. यीशु बोगवानान आखा जाणाव केरनार एने हेरोगदुताह रेन मुठो हे। 1:1–4:13
2. जा चाकऱ्या यरूशलेम ने मोंदिर माय सेवा केरतेह ताह रेन बी यीशु मुठो हे 4:14–7:28
3. मुसाह आपेल उकुम ने द्वारे जो जुनाला नेम माय बोगवान तान माणहाह केयो ताह रेन बी यीशुन सेवा मोठी हे। 8:1–10:31
4. यीशु आखी बातीन मुठो सेवक हे ज्यान बाराम सुचना। 10:32–13:17
5. थोड़ोक बोद एने साबासकी आपीन ज्या पोत्राह निवरावेह। 13:18-25
1
बोगवानान वचन बेटाख उगे रेन
1 पेल्ला काला माय बोगवान जाणकारान द्वारे आमरा डायडाया हिऱ्यो आलेग आलेग टेम माय एने आलेग आलेग रिती से वातु किऱ्यो, 2 पुण एवी न्या सेवल्या दिह्या माय आमु हिऱ्यो बेटाख ने द्वारे वातु किरेल, जाह बोगवान आख्यु वोस्तुन वारीस ठेरायो, एने तास ने द्वारे बोगवान आखी केलीह बाणायेल हे। 3 तो बोगवान बोड़ाय ने उजेड़ एने तान वेहान साप रूप हे, तोच आख्यु वोस्तुह तान ताकेतीन वचना केरीन होमालने। जेवी तो आपुह आपणा पापाम रेन दोव दियेल ईतो, ते तो मोटली बोड़ाय पोर बुहेल बोगवानान जीवड़े उगी बोह गीयो।
बोगवानान बेटाख ने मोठवाय
4 एने हेरोगदुताह रेन तो उलोस हाजो ठिरेल, जुलोक तो ताह रेन मोटलो पद ने वोस बोणीन हाजो नाव सापड़ायेल हे।
5 केदी काल्ला हेरोगदुताह बोगवान ज्य कियेल,
“तु मार बिटोख हे;
आज मी तार आबोख बोण गीयोह”
एने पोशो ज्य काल्ला हेरोगदुताह कियेल,
“मी तार आबोख रेह,
एने तु मार बिटोख।”
6 एने जुलबुखे पेल्ला बेटाख दुनिया माय लावीन किथे,
“बोगवानान सोब हेरोगदुत तान सोराह नमस्कार केरी।”
7 एने हेरोगदुतान बाराम ज्य किथे,
“तो तान हेरोगदुताह वारो,
एने तान सेवकाह देदेकताली आक्ठो बाणावीह।”
8 पुण बेटाख ने बाराम किथे,
“एय बोगवान, तारी राजगादि जेलेमक्यीस रेय!* 1:8 एय बोगवान तार राज कायेम रेय; बोगवाना माय तुमरो राज हे।
तु तार राज ने शासक नियाव हिऱ्यो किरहे।
9 तु देरमाह मोंग किरेह एने एदेरमा हिऱ्यो दुसमोनाय किरेल हे।
केरीन बोगवान, तार बोगवान,
तार हातीह रेन जादा खुसीन तेल केरीन तारो निवोड़ किरेल हे।”
10 एने उंजु ज्य किथे,
“एय मालीक, पेलुस तु देरतीन पायो टाकेल हे,
एने हेरोग तार आथान कारागिरी हे।
11 ता ते खेतेम एय जाती, पुण तु बोणीन रिहे;
एने ता आखा फाड़कान गेत जुनाला एय जाती।
12 तु ताह चादरान गेत चोंडाल दिहे,
एने ता फाड़कान गेत बोदेल जाती।
पुण तु तोच हे, एने तार जीवाय ने सेवोट केदी बी नाय एय।”
13 हेरोगदुता माय रेन बोगवान कुणीह कुलबुखे कियेल:
“तु मार जीवड़े उगे बोह,
जाह वोर काय मी तार दुसमोनाह
तार पायान बुंदेन चोवकी नाह बाणाव देव।”
14 काय आखा हेरोगदुत सेवान केरता निवाड़ेल जीव नाह सोता? जा सुटकारो सापड़ावण्या हेते तान सेवा केरी।
*1:8 1:8 एय बोगवान तार राज कायेम रेय; बोगवाना माय तुमरो राज हे।