1 एय मोंगाल्ला, एक एक जीवा पोर बुरहो मा किरहो, पुण ता जीव बोगवानान उगे रेन हेते काय नाह तान पारेख किरज्‍यो; काहाकाय मोकतास जुठा जाणकार दुनिया माय फिरने बाजरेनाह। 2 बोगवानान जीवाह तुमू इहकेरीन ओलेख सेकतेह: जो जीव मान लिथे काय यीशु मसी सेरीर माय एन आवोह एने तो बोगवानान उगे रेन हे, 3 एने जो जीव यीशुह नाह मानेत, तो बोगवानान उगे रेन नाह सोतो; पुण तो जीव मसी विरोदीन जीव हे, जान बाराम तुमू होमेल लियेल हेते काय तो आवण्यो हे, एने एवी बी दुनिया माय हे। 4 एय मारा सोरा, तुमू बोगवानान हेते, एने जुठा जाणकाराह तुमू जिक लियेल हेते; काहाकाय जो बोगवान तुमू माय हे ताह रेन मुठो हे जो दुनिया माय हे। 5 ता दुनियान हेते, केरीन ता दुनियान वातु केरतेह, एने दुनिया तान हुमलेह। 6 आपु बोगवानान हेते, एने जा माणहे बोगवानाह जाणतेह, ता माणहे आपणी होमेलतेह; एने जा माणहे बोगवानाह नाह जाणते ता माणहे आपणी नाह होमेलते। इहकेरीन आपु खेरायीन जीवाह एने जुठा जीवाह ओलखी लेतेह।

7 एय मोंगाल्ला बाय बोणहा, तुमू आखा एका दिहराह मोंग किरो; काहाकाय मोंग बोगवाना फाय रेन हे। एने जो कुण मोंग किरेह तो बोगवाना फाय रेन पायदा ईयेल हे, एने तो बोगवानाह ओलखेह। 8 जो कुण मोंग नाह किरेत तो बोगवानाह नाह ओलखेत, काहाकाय बोगवान मोंग हे। 9 जो मोंग बोगवान आपुह किरेह, तो ज्या माय देखानो काय बोगवान तान एकुस सोराह दुनिया माय मोकलेल काय आपुह तान द्‍वारे जीवणो जुड़ी। 10 मोंग ज्या माय नाह काय आपु बोगवानाह मोंग केऱ्या, पुण ज्या माय हे काय तो आपुह मोंग किऱ्यो एने आपणा पापान माफीन ओहली बोलीन केरता तान सोराह मुकल्यो। 11 एय मोंगाल्ला, जेवी बोगवान आपणी पोर इहकेरीन मोंग किऱ्यो, ते आपुह बी एका दिहरा पोर मोंग केरने जुवे। 12  ✡ 4:12 योहान 1:18बोगवानाह केदी बी कुण नाह देख्यो केदी आपु एका दिहराह मोंग केरहु, ते बोगवान आपणे माय बोणीन रीथे एने तान मोंग आपणे माय पुरो ईथे।

13 आपु ता माय एने तो आपणे माय रीथे, तो आपुह ज्या पोर रेन सोमजाथे काय बोगवान सोतान जीव आपुह आपेल हे। 14 आमु देख बी लियेल एने गोवाही देतेह काय आबोख सोराह दुनियान सुटकारो केरनेन केरीन मोकलेल हे। 15 यीशु बोगवानान बिटोख हे, इहकेरीन जो कुण कबुल किरेह, बोगवान ता माय बोणीन रीथे, एने तो बोगवाना माय रीथे। 16 जो मोंग बोगवान आपुह किरेह, ताह आपु जाण गीयाह एने आपुह ता पोर बुरहो हे। बोगवान मोंग हे, एने जो कुण बी मोंग माय बोणीन रीथे तो बोगवाना माय बोणीन रीथे, एने बोगवान ता माय बोणीन रीथे। 17 इहकेरीन मोंग पुरो ईथे काय आपुह नियाव ने दिह ईमोत एय; काहाकाय जिहकेरीन तो हे तिहेस केरीन ज्यी दुनिया माय आपु बी हेते। 18 मोंग माय बिय नाह रेणे, ज्योलोस नाह ते पुरो मोंग बियाह सेटो किर दिथे; काहाकाय बिय माय नियाव ईथे, एने जो बिथे तो मोंग माय पुरो नाह एनो। 19 आमु ज्यानकेरता मोंग केरतेह काय बोगवान पेल आमुह मोंग किऱ्यो। 20 मी बोगवानाह मोंग केरथु, इहकेरीन केयीन एगदो तान बायाख हेऱ्यो दुसमोनाय किरेह ते तो जुठो हे, काहाकाय तान बायाख तो जो दिखेल हे मोंग नाह किरेत, एने तो जो बोगवानाह नाह दिखेल हे मोंग नाह किर सिकेत। 21 जो बोगवानाह मोंग किरेह तो तान बायाख बी मोंग केरी, ज्यो उकुम आमु ता फाय रेन जुड़ेल हे।