1 जेवी मेंड्रो हातवा सिक्काह उगाड्यो, ते हेरगा माय आरदो गीन्टो वोर सांत वातावरण एय गीयो। 2 तेवी बोगवानान ओंगाण उबरियेल हात हेरोगदुताह मी दिख्यो, ताह हात पावली आपाय जायेल एती।

3 पुशो एक हेरोगदुत होनान दुपदान लेन आवो, एने वेदी पोर उबरेय गीयो। ताह जुलूम दुप आपेल काय आखा बोगवानान माणहान विन्ता हेऱ्यो होनान ती वेदी पोर चेड़ावी, जी राजगादिन ओंगाण हे। 4 एने दुप ने दुवाड़ो बोगवानान माणहान विन्ता हेऱ्यो हेरोगदुत ने आथा केरीन बोगवानान ओंगाण पोच गीयो। 5  ✡ 8:5 प्रकाशितवाक्य 11:19; 16:18ओवतो हेरोगदुत ता दुपदानाह विस्यो एने ताह वेदीन आक्‍ठा केरीन बुऱ्यो, एने देरती पोर टाग दिनो। जाहसे वादलान माय गाजणे, मोटलो आवाज, विजेलनेन चोमेक एने बुकम्प एणे बाज गीयो।

6 तेवी ता हात हेरोगदुत जा फाय हात पावल्यु एत्यु, त्युह फुकणेन केरता तियार एना।

7 पेल्लो हेरोगदुत तान पावलीह फुक्यो। लुय माय मिलायेल बोरफो एने आक्‍ठो देरती पोर पोड़ने बाज गीयो। ज्यान वोजेसे देरतीन एक बाग हेलगी गीयो, उंजु जाड़ान एक बाग हेलगी गीयो, एने आखो निल्लो खेड़ बी रोखड़ो एय गीयो।

8 ओवतो दुसरो हेरोगदुत तान पावलीह फुक्यो। ते आक्‍ठान गेत हेलेगतालो एक मोटला बोयड़ान गेत देरीया माय टाकाय गीयो। ज्यान वोजेसे देरीयान एक बाग लुय माय बोदेल गीयो। 9 एने एक बाग देरीयान जेनवेरे मोर गीया, एने एक बाग डोंडह्या खेतेम एय गीया।

10 ओवतो तीसरो हेरोगदुत तान पावलीह फुक्यो। एक मुठलो तारो बोलान गेत हेलेगतेन जुगाम रेन निचो पुड़नो, एने एक बाग नेदी माय एने जोवरान पाण्या पोर जाय पोड़नो। 11 ता तारान नाव “कोड़वो” हे। एने एक बाग पाणी कोड़वो एय गीयो, एने जुलूम होवटा माणहे ज्या पाण्याह पिणेन कारेण मोर गीया, काहाकाय पाणी कोड़वो एतो।

12 जेवी चोवथो हेरोगदुत तान पावलीह फुक्यो। तेवी एक बाग दिह एने एक बाग चांद एने एक बाग तारा पोर बी तेकलीत आवी, ज्यानकेरीन ता तान एक बाग उजालो गोमाड़ देना; ज्यो एनो काय एक बाग दिह एने एक बाग रात आंदारा माय बुड़ गियी।

13 जेवी मी पुशो दिख्यो, ते जुगान विची माय एक मोराग्याह उड़ती एने मोठास आवाज माय ज्यो कितेन होमल्यो, “ता तीन हेरोगदुत ने पावलीन आवाज ने वोजेसे। जान फुकणे एवी बाकी हे, देरती पोर रेणारा पोर हाय, हाय, हाय!”