10
बायकुह सोड़नेन बाराम यीशुन हिक
(मत्ती 19:1-12; लुका 16:18)
1 यीशु यहुदियान एद्दी सोड़ीन यरदन नेदीन पार आवो। एने गेरदी पोशी यीशुन जागे टोलवाय गियी। एने तान रितीन गेत ताह पुशो हिकाड़ने बाज गीयो।
2 तेवी थोड़ाक फरिसी यीशुह वातु माय फासाड़नेन केरता आवीन ताह फुशा, “आमुह के काय आपणो नेम एक एदम्याह तान बायकुह तलाक आपणेन पारवांगी आपेह?”
3 यीशु ताह जापाप आप्यो, “मुसो तुमूह काल्लो कायदो आपेल हे?”
4 ✡ 10:4 मत्ती 5:31ता यीशुह जापाप आप्या, “मुसो तलाक पोत्रो लेखीन बायकुह सोड़नेन पारवांगी आपेल हे।”
5 पुण यीशु ताह केयो, “मुसो ज्यु कायदो तुमरी केरता लिखेल हे, काहाकाय तुमूह हिकाड़ने जुलूम केठीण हे। 6 पुण केलीन सुरवात रेन जिहकेरीन वचन माय लिखेल हे, ‘बोगवान एदमी एने बायकु केरीन माणहाह बाणायेल हे।’ 7 * 10:7 थोड़ाक लेख माय तान बायकु हेऱ्यो जोड़ाय जाय जोड़ो हेतानकेरता एदमी तान आईख आबाख सोड़ीन आंगेच तान बायकु हिऱ्यो रेय, 8 एने एवी ता दुय एक सेरीर एय जाती। केरीन ता एवी दुय नाह सोता, पुण एक हेते। 9 केरीन जाह बोगवान खुद जुड़ेल हे, ताह माणहे आंगे नाय केरी।”
10 जेवी ता पोशा गेरा माय गीया, तेवी चेला ज्यान बाराम यीशुह पोशा फुशा। 11 ✡ 10:11 मत्ती 5:32; 1 कुरिंथीयो 7:10,11यीशु चेलाह केयो, “जो कुण तान पेल्ली बायकुह सोड़ीन दिहरी बायकु हिऱ्यो वाराड़ किरेह, तो तान पेल्ली बायकुन विरोद माय सिनालो किरेह। 12 एने केदी बायकु तीन पेल्ला एदम्याह सोड़ीन दिहरा एदम्या हेरी वाराड़ किरेह, ताहार तीबी पेल्ला एदम्यान विरोद सिनालो किरेह।”
सोराह बोरकेत आपणे
(मत्ती 19:13-15; लुका 18:15-17)
13 थोड़ाक माणहे सोराह यीशु फाय लावा काय ताह बोरकेत आपी, पुण चेला माणहाह दोपकावणे बाज गीया। 14 यीशु ज्य देखीन रागा माय चेलाह केयो, “सोराह मार फाय आवणे दिवो, ताह मा रूको, काहाकाय बोगवानान राज ओहलाच ने केरता हे। 15 ✡ 10:15 मत्ती 18:3मी तुमूह खेरीच केथु काय जो कुण बोगवानान राजाह सोरान गेत स्वीकार नाह किरेत, तो बोगवानान राज माय केदी नाय रिग सेकी।” 16 तेवी यीशु सोराह खोलाम लिदो, एने आखा पोर आथ मेलीन ताह बोरकेत आप्यो।
मालदार जुवान
(मत्ती 19:16-30; लुका 18:18-30)
17 जेवी यीशु ता रेन निकलीन वाटे जाणे बाजरियेल ईतो, तेवी एक माणुह ता फाय दोवड़तीन आवो, एने तान ओंगाण मांड्या पोड़ीन फुशो, “एय हाजाला गुरू, जेलेमक्यो जीवाय सापड़ावणेन केरता मी काय केरू?”
18 यीशु ताह फुशो, “तु माहु हाजो काहा किथे? बोगवानाह सोड़ीन कुणीच हाजो नाय मीले। 19 तु बोगवानान कायदाह जाणेह: खुन मा किरहे; सिनालो मा किरहे; चोरी मा किरहे; कुणी पोर जुठो आरोप मा लागाड़हे; दुको मा दिहे; आईख आबाख ने मान मिलजे।”
20 तो यीशुह केयो, “एय गुरू, ज्य सोब मी आत्योच रेन मान्तेन आयेल हे।”
21 यीशु ताह मोंग माय देखीन केयो, “तुवाह एक वातीन जोरेवरी हे। जा एने जो काय तुवा फाय हे ताह वेचीन पोयशा गेरब्याह वाट दे, एने तुवाह हेरगाम मालदेन जुड़ी; उवतो वोलीन आवीन मार पासाण चाल।” 22 ज्यी वात होमलीन तो नाराज एय गीयो, एने तो दुखी एन जात रेनो, काहाकाय तो जुलूम मालदार एतो।
23 यीशु कावदेन देखीन तान चेलाह केयो, “मालदार माणहाह बोगवानान राज माय जाणेन केरता जुलूम केठीण हे!”
24 चेला यीशुन वातु होमलीन जुलूम बोंगलाय गीया, पुण यीशु उंजु ताह केयो, “एय मार सोरा, जा मालदेन पोर बुरहो मेलतेह, तान केरता बोगवानान राज माय जाणेन जुलूम केठीण हे?” 25 बोगवानान राज माय मालमात्याह जाणे रेन उटड़ाह हुईन डोसाम रेन सेरकी जाणे होपो हे।
26 चेला ज्य होमलीन जुलूम बोंगलाय गीया एने एका दिहराह फुसणे बाज गीया, “ते ओवतो कुणीन सुटकारो एय सिकेह?”
27 यीशु चेलान उगे सीदो देख्यो एने जापाप आप्यो, “ज्यो माणहान केरता जुलूम केठीण हे, पुण बोगवानान केरता नाह; काहाकाय बोगवानान केरता आखो केठीण नाय मीले।”
28 पतरस यीशुह केयो, “देख, आमु ते आखो काय सोड़ीन तार पासाण आव लागेल हेते।”
29 यीशु केयो, “मी तुमूह खेरीच केथु काय ओहलो कुण नाह सोतो जो मार एने मारी हाजाली खोबरीन पारचार केरनेन केरता गेर एने बाहख बोणह्युख एने आईख आबाख सोरा पोऱ्याह एने खेतीवाड़ीह सोड़ देनो एय, 30 एने ताह ज्यी दुनिया माय एक होव माप नाय जुड़ी। पुण गेरे, बाहख, बोणह्युख, आयह्युक, सोरा पोऱ्या एने खेतीवाड़ी एने दुख; एने सेताव हेऱ्यो आवता टेम माय जेलेमक्यी जीवाय ताह जुड़ी। 31 ✡ 10:31 मत्ती 20:16; लुका 13:30पुण जुलूम जा पेल्ला हेते, ता पासाण एय जात, एने जा पासाण हेते ता ओंगाण एय जाती।”
यीशु तान मोतीन बाराम तिसरी वार जाणाव केरने
(मत्ती 20:17-19; लुका 18:31-34)
32 यीशु एने तान चेला यरूशलेम जाणेन वाटे लाग रियेल एता। एने यीशु चेलान ओंगाण चालने बाजरियेल ईतो, चेला बोंगलाय रियेल एता; एने जा माणहे तान पासाण चालताला ता बियेल एता। एक वारीन यीशु पुशो ता बारा चेलाह आंगेच ली गीयो एने ताह त्यु वातु केणे बाज गीयो, जी ता पोर आवणी एती, 33 “हुमलो, आपु यरूशलेम माय जातेह, एने माहु माणहान बेटाख मुखी चाकऱ्या एने देरेमगुरून आथाम होप देती। ता माहु मारनेन ठेरावती एने बिगेर यहुदिन आथाम होपती। 34 ता आखा मारी ईजुत लेती, माहु पोर थुपती, माहु चापका केरीन देती, एने माहु मारती; पुण मी तीन दिह्यान पासाण जीव उठुह।”
याकुब एने योहानान विन्ता
(मत्ती 20:20-28)
35 तेवी जब्दीन सोरा याकुब एने योहान यीशु फाय आवीन केया, “एय गुरू, आमरी मोरजी ज्यी हे काय जो आमु तुवा फाय मांगहु, तो तु आमरी केरता केर।”
36 यीशु ताह फुशो, “तुमूह काय जुवे काय मी तुमरी केरता केरू?”
37 ता यीशुह जापाप आप्या, “आमरी ज्यी मोरजी हे काय जेवी तारी बोड़ाय एणेन टेम माय आमु माय रेन एक तारे डाखरे उगे एने एक तारे जीवड़े उगे बोह सेकी।”
38 ✡ 10:38 लुका 12:50यीशु ताह केयो, “तुमूह ज्य मालुम नाह सोतो काय तुमू काय मांगतेह। जो दुखान वाटको मी पिण्यो हे काय तुमू पिय सिकहो? एने जो मोतीन बपतीस्मा मी लिण्यो हे काय तुमू लेय सेकतेह?”
39 ता यीशुह जापाप आप्या, “आमु लेय सेकतेह।”
यीशु ताह केयो, “जो दुखान पियालो मी पिण्यो हे तुमूह बी पिणे पोड़ी; एने जो बपतीस्मा मी लिण्यो हे, तो तुमूह बी लेणे पोड़ी। 40 पुण कुणीह बी मार डाखरे एने जीवड़े उगे बोहाड़नेन मार आदिकार नाय मीले, ज्य तान केरता होमालीन मीलेल हे, जाह बोगवान निवाड़ेन तियार किरेल हे।”
41 जेवी बाकीन दोह चेला ज्यी वात होमल्या, ते ता याकुब एने योहान पोर रागाय गीया। 42 ✡ 10:42 लुका 22:25,26केरीन यीशु आखा चेलाह आहने हादिन केयो, “तुमू जाणतेह काय जा बिगेर यहुदिन आदिकारी सोमजाय जातेह, ता फाय ताकेत हे, एने आदिकारीह ता पोर पुरो आदिकार हे। 43 ✡ 10:43 मत्ती 23:11; मरकुस 9:35; लुका 22:26पुण तुमरे माय ओहलो नाह सोतो, जो कुण तुमरे माय मोठो बोणने हुदेह, तो तुमरो आखान पावोर बोणी; 44 एने जो कुण तुमरे माय मुखी बोणने होदि, तो आखान पावोर बोणी। 45 काहाकाय मी माणहान बिटोख ज्यानकेरता नाह आवो काय मारी सेवा चाकरी केरावु; पुण ज्यानकेरता आयेल हे काय मी दिहरान चाकरी केरू एने जुलूम जाणाह सोड़ेवणेन केरता मारो जीव आपु।”
आंदला बरतीमाईह देखतो केरने
(मत्ती 20:29-34; लुका 18:35-43)
46 ज्यान पासाण ता यरीहो गावा माय पोचना, जेवी यीशु तान चेला एने एक माणहान होवटाली गेरदी हेऱ्यो यरीहो रेन बाहेर जाणे बाजरियेल ईतो, तेवी ताह वाटीन मीरे बोह रियेल एक आंदलो बिखारी मिलनो, तान नाव बरतीमाई एने तान आबोख तीमाई ईतो। 47 जेवी ताह ज्य मालुम एनो काय यीशु नासरी हे, तो आयड़ीन केयो, “एय दाऊदान सोरा यीशु! मार पोर गीण केर!”
48 जुलूम माणहे ताह जोर केऱ्या काय ठावको रेय। पुण तो उंजु जोरेस आयेड़ने बाज गीयो, “एय दाऊदान सोरा, मार पोर गीण केर!”
49 तेवी यीशु उबरीन केयो, “ओयाह माहु फाय लियावो।”
केरीन माणहे आंदलाह हादिन केया, “ईमोत मेल! उठ, तो तुवाह हादिह।”
50 आंदलो माणुह तान फाड़का टाकीन कुदिन उबरेय गीयो, एने यीशु फाय आवो।
51 एने यीशु आंदलाह फुशो, “तुवाह मार फाय रेन काय जुवे?”
आंदलो यीशुह जापाप आप्यो, “एय गुरू, मी पुशो देखणे बाज जाव।”
52 यीशु आंदलाह केयो, “जातरे, तारो बुरहो तुवाह हुदार दियेल हे।”
आंदलो चालोच देखणे बाज गीयो एने वाटे यीशुन पासाण चाल पोड़नो।