1 काय मी सुटालो नाह सुतो? काय मी प्रेरित नाह सुतो? काय मी यीशुह जो आपणो मालीक हे नाह दिख्यो? काय तुमू मार कामान वोजेसे बोगवाना बाणायेल नाह सोता? 2 केदी मी दिहरान केरता प्रेरित नाह सुतो, तीबी तुमरे केरता ते हे, काहाकाय तुमरो मालीका माय एकी हे ज्योस सबुत हे काय मी प्रेरित हे।

3 जा माणहे मार चोकसी केरने होद्तेह तानकेरता ज्योच मारो जापाप हे। 4 काय आमुह मेहनेत केरीन खाणे पिणेन आदिकार नाह सुतो? 5 काय आमुह ज्यो आदिकार नाह सुतो काय आमु आमरी बायकुह सेवान केरता आरही लेन फिरी, जिहकेरीन दिहरा प्रेरित एने मालीक ने बाहख पतरस किरेह? 6 काय माहु एने बरनबासाह ज्यो आदिकार नाय मीले काय मेहनेत केरीन कामावीन जिवी। 7 ओहलो सिपाय कुण हे जो बिगेर मोंजरीन सिपायीन काम केरी? एने ओहलो कुण हे जो अंगुर ने वाड़ी लागाड़ीन तान फोल नाह खाणे? एने पोशो ओहलो कुण हे, जो मेंड्रान टोलान राखवाली केरीन तान दुद नाह पिणे?

8 काय मी ज्यी वातु माणहान रिती पोर रेन बोलथु? नियमान पुस्तेक ज्यी वात नाह कित? 9  ✡ 9:9 1 तीमुथीयुस 5:18काहाकाय मुसान कायदा माय लिखेल हे, “मोलने बुखेत बोयलान मुय मा बांदहो।” काय बोगवान बोयलान उलुस कालजी किरेह? 10 काय खास केरीन आमरी केरता किथे, होव, आमरी केरतास लेखायेल काहाकाय हाजो हे, काय मोलनार कामाय वाटणेन आसा माय बेसकाणेन केरता चाल्या केरी। 11  ✡ 9:11 रोमीयो 15:27जेवी आमु तुमरी केरता आत्मिक वोस्तु पिरील हेते तेवी ज्यी काल्ली मोठी वात हे? काय तुमरी सारिरीक वोस्तुन कामाय काटी। 12 जेवी दिहरान तुमू पोर ज्यो आदिकार हे, ते काय आमरो ज्याह रेन वादार नाय रेय?

पुण आमु ज्यो आदिकार कामा माय नाह लावा; पुण आखो काय खेटतेह काय आमरी द्‍वारे मसीन हाजाली खुबेर माय काह रोक टोक नाय एय। 13 काय तुमू नाह जाणते काय जा माणहे मोंदिर माय सेवा चाकरी केरतेह, ता मोंदिरा माय रेन खातेह एने जा वेदीन सेवा चाकरी केरतेह, ता चेड़ावो चेड़ायेल वोस्तु माय इसादार एय जातेह? 14  ✡ 9:14 मत्ती 10:10; लुका 10:7इहकेरीन मालीक उकुम आपेल हे काय जा माणहे हाजाली खुबेर होमेलतेह, तान खीरचो हाजाली खुबेर होमेलनारेच पुरो केरी।

15 पुण मी न्या माय रेन काल्लो बी आदिकार कामा माय नाह लावु, एने मी जी वात ज्यानकेरता नाह लेखथु काय मार केरता ओहलो केरने जुवे, पुण ज्याह रेन ते माहु मोर जाणुस हाजो हे, ते कुण मार मोठायाह उदेड़ ठेरावी। 16 केदी मी हाजाली खुबेर केय होमलावु, ते मार फाय मोठाय केरनेन काय कारेण नाह सोतो, काहाकाय ज्यो ते मार केरतास हे, केदी मी हाजाली खुबेर नाय केय होमलावो ते मार पोर हाय। 17 काहाकाय केदी मारी मोरजी माय ज्यो केरथु, ते माहु मोंजरी जुड़ेह, पुण मी ज्यो केरथु काहाकाय बोगवान माहु होपेल हे। 18 ते मारी काल्ली मोंजरी हे? ज्यो काय हाजाली खुबेर होमलावणे माय मी मसीन हाजाली खुबेर बिगेर पोयशा लेन दिहराह होमलावथु, न्या वोर काय हाजाली खुबेर माय ज्यो मारो आदिकार हे ताह बी मी पुरी रिती माय काम माय नाय लावु।

19 पुण मी आजाद हे एने कुणीन बी काबाम नाह सुतो, तीबी मी मोकतास माणहाह बोगवाना राज माय लावणेन केरता आखा पावोर बोण गीयो। 20 जा माणहे मुसान कायदान ताबा माय हेते, ता माणहाह मी मसी माय लावणेन केरता तान गेत बुणील, पुण तान कायदान ताबा माय नाह ईतो। 21 जेवी मी बिगेर यहुदि हिऱ्यो ईतो जा बोगवानान कायदान गेत नाह जीवाय जीवतेह, तान गेत मी बी कायदान ताबा माय नाह सोतो, ताकाय ताह मसी फाय लाव सेकु। पुण बोगवानान कायदाह टालेत नाह, एने मी मसीन कायदान पालेन केरथु। 22 मी कोमजोरान केरता कोमजोरूस बुणेल काय कोमजोराह खेचीन लियावो, मी आखा माणहान केरता आखो काय बुणेल काय काल्लीन काल्ली रिती माय काल्ला एकान सुटकारो केरावो। 23 मी ज्यो आखो काय हाजाली खोबरीन केरता केरथु, काय दिहरा हिऱ्यो तान बागीदार एय जाव।

24 काय तुमू नाह जाणते काय दुवेड़ माय ते सोब दोवेड़तेह, पुण ईनाम एकुस जाण ली जाणे? तुमू तिहेस दुवड़ो काय जिकहो। 25 एकेक पेहेलवान आखी बातीन दिर खाणे; ता ते एक कोमाणार हार सापड़ावणेन केरता ज्यो सोब केरनु, पुण आपु ते ता हारान केरता काम केरतेह, जो कायेम कोमात नाह। 26 तानकेरता मी बिगेर निसाणीन नाह दोवेड़थु, एने नाह वारा माय दुमा देथु। 27 पुण मी मार सेरीराह कुटणे मारने एने ताबाम लावथु, ओहलो नाय एय काय दिहराह पारचार केरीन मी सोताच काल्ली बी रिती माय ईनाम लेणेन लायकीन नाय ठेराव।