14
Zân tu zulutindende an egalen gakikiŋaŋgalen zet zapat
(Mak 6:14-29; Luk 9:7-9)
1 Zisasiyaŋ mulup tapmme kan keyet Elolaŋ Zuda am ekŋengalen amobotnaŋ tage. 2-12 Elolaŋ tipman baenen meniŋaŋ Pilip egalen imbiŋaŋ menzemti wage. Imbi ke kwitnaŋ Elodias.
Ke Zân tu zulutindende an ya egaŋ zet kapigok dunduye, “Geŋ imbi wabanan ke yomaŋmak bein.” Kegok zeme ŋenzinziŋ mti Zângat betnaŋ atam zamti mka katikŋan peye. Ŋeŋaŋ zeme Elot egaŋ Zân kegogak kukuyelen nâŋge keyaŋgut Zuda am ekŋenaŋ Zângat golaŋ zenze an manzemtemiengapmti ekŋengat kiŋgati peme tage. Âpme Elotgalen sokbembe kanaŋ beme amobotnaŋ indazemtetime ekŋenaŋ kwawati ondek tapme Elodiasiyet nambaŋaŋaŋ ekŋengat zikalinan silik wendime Elolaŋ sandiyaŋ mti zeye, “Neŋ penaŋ sukwep zeyap, geŋ kwileki ŋengat zenik beme ŋep gasap.”
Zeme imbi nemba ek mamaŋaŋ zempeme meti kapigok zeye, “Neŋ Zân an tu zulutindende an egat ŋokasetnaŋ eleŋgemti alak kapigogak batien bemti na.”
Kegok zeme amobotnaŋ egaŋ kambekat mge yaŋgut am ekŋengat zikalinanen zemkatik beyeyepm ekŋenmagen zetnaŋ windeŋaŋ tototnaŋ besem zemti kasa kuku an zempeme mka katikŋan meti Zân bimaŋ eleŋgemti ŋokasetnaŋ batien bem koti imbi nemba same mti mamaŋ saye. Âpme Zângat nembaŋane ekŋenaŋ koti sekŋaŋ mti met sumen mebemti met Zisasiyet buŋam zapat dunduwien.
Kan keyet amobotnaŋ Elot egaŋ Zisasiyet zapatnaŋ zeme nâŋge, “An ke Zân tu zulutindende an penaŋ gakikiengatnaŋ wageyepmti windeŋaŋbeŋ menok sepem igak igak mamin.” Egaŋ zet ke amobotnaŋ notnaŋ ikŋaŋgat kandaŋan mulup mamip ekŋen keyet zemsokbemindaye.
Zisasiyaŋ am sambe meu indapeleŋguye
(Mak 6:30-44; Luk 9:10-17; Zân 6:1-14)
13 Zisasiyaŋ Zângalen zapat nâmti waŋga ŋengat moti tundua nembet meti msat tuŋgupman igak mamayelen mepme am ekŋenaŋ mege keyet zapatnaŋ nâmti mka ŋen mka ŋen am maŋge temaŋ ekŋenaŋ seleset meti ekmagen mepataŋ zeme 14 Zisas waŋgaengatnan toti am maŋge temaŋ tabien ke indikti keŋaŋ kembeŋ penaŋ beme am zawalinmak mme alik bewien.
15 Kegok tapminepeme msat gasi beme nembaŋane nin ekmagen koti dunduwenn, “Wae, msat tuŋgupman tatnepemann msat gasi bein. Keyet am indemane mkaŋinan kataŋ meti tu meuŋin aigit.”
16 Zemann Zisasiyaŋ kapigok dinndoye, “Zemindeme mebegalen eneyet tazeip? In meu indame nit!”
17 Kegok dinndome nin zewenn, “Nin nupmamaŋ 5 ma aŋgala zuletaŋ tatndain.”
18 Zemann egaŋ kapigok dinndoye, “Ke neŋmagen pien mti kolit!” 19 Âpme am kapigok zemindeye, “In msalen totalit!” Zemti egaŋ nupmamaŋ 5 aŋgala zut ke timtati kululuŋen ekme mopme Kawawaŋgat, “Wisikŋ,” zemti nupmamaŋ mutumti aŋgalamak ndame nin kalaŋkum 20 am nsakwep nimbenn. Nimti am sambeyaŋ nim nalak nalak mme butnaŋ tage ke makum timann tise 12 gak zem tage. 21 Ma am tu meu ke nimbien ke an etaŋ makumann 5,000 kegok. Imbi ma nemba ekŋen ku indamakuwenn.
Zisasiyaŋ tu paleset imti mege
(Mak 6:45-52; Zân 6:15-21)
22 Kegok mti Zisasiyaŋ nin ndeme waŋgaen moti tundua nembet daen nnak mepmann egaŋ am zemindeme mebekobien. 23 Âpme egaŋ am zemindeme mepmâpme igak etaŋ kalaŋan motati dunduye. Tapme msat tambume igak etaŋ ke tage. 24 Kan keyet wagayaŋ tundua sutnan kopme tâgâ temaŋaŋ mebenneset koge keyepmti tu mamaŋ temaŋ kumti katikŋaŋ kwapme waŋgayaŋ tapmotopmaŋge.
25 Âpme msat balalaŋ tazeme Zisasiyaŋ tundua paleset meti nin tabennen sokŋan 26 takopme ekti ŋakŋak mti omba penaŋ kiŋgati zewenn, “We kozin!”
27 Zemann Zisasiyaŋ dinndoye, “Keŋin sewakŋaŋ bek. Nen takolapgat ku kiŋgalit.”
28 Zeme Pitayaŋ zetnaŋ ŋandaŋaŋ nâmti zeye, “Amobotnaŋ, giti penaŋ takodik beme zemane neŋ tu paleset gâlen kobi.”
29 Âpme Zisasiyaŋ zeye, “Ŋepgat kot.” Zeme Pitayaŋ waŋga keŋangatnan toti yaŋbemti tu paleset Zisasmagen mege. 30 Metnepeme tâgâ temaŋ kume ekti kiŋgati tundua kenan towesât mti Zisasiyet kwizet kuye, “Amobotnaŋ, nata!”
31 Kwizet kegok kume keyegak Zisasiyaŋ betnanen atamti zeye, “Geŋ kwilekiyet keŋ zut mnik? Nâmkiŋpependipiŋ, ma?”
32 Kegok zemti waŋgaen mowepmalu tâgâyaŋ peme tage. 33 Âpme nembaŋane nin waŋgaen tabenn nin Zisas sesewatpemti zewenn, “Geŋ Kawawaŋgat Nemuŋaŋ penaŋ.”
Zisasiyaŋ am zawalinmak Genesalet msalen weyaŋindeye
(Mak 6:53-56)
34 Âpme nin tundua kutumti Genesalet msat ganzenan mopmann 35 am ekŋenaŋ Zisasi ekmâtâti zeme mka sokŋan sokŋan ke am ekŋenaŋ am zawalinmak indatimti kobien. 36 Koti ekŋenaŋ Zisas kapigok wekuwien, “Nâmndemane am zawalinmagaŋ sekdi atait ma notnaŋaŋ sâkdi busiliŋaŋ etaŋ timekti zawalin ŋep delaŋ zesem.” Kegok zemti ekŋenaŋ kegok mti alik bemâbien.