1 Kolin
Pâlaŋ Kolin am ekŋengat zapat meluwaŋ ŋeŋaŋ kapi kumindaye
Zapat meluwaŋ kapi Pâlaŋ Kolin ekŋengat ŋeŋaŋ kumindaye. Kolin ekŋengat zapat meluwaŋ zut kuye yaŋgut nukŋaŋ sepem ikŋak ikŋakgapmti sek zut kuye. Pâlaŋ Kolin mkaen Kawawaŋgalen Zet Zapat Dolakŋaŋ Penaŋ timepme sek zut beye kan keyet Kolin dapmelaŋge msokbemindemti koge. Koti mame nukŋaŋ notnaŋ sokbeme kot zeme nâmtiyepm zapat meluwaŋ kapi kuye.
Kolin mka temaŋ ke Akaia plowis keŋaŋ tazin. Manan Akaia msat ke msat temaŋ alak pigokgat Glis makup keyet keŋaŋ tazin. Am msat keyetnaŋaŋ zelin Glik zet ke manzeip. Kolin mka keyaŋ nembu ganzenan ma msat busiliŋaŋ ŋetekŋaŋ Aika msat temaŋ ma Kolin mka temaŋgatnaŋ mezinen ke atam tatatnaŋnok mam tazin. Âpme am waŋgaen makotemien ekŋenaŋ tokwat bembululuŋgat wisat mti sakwep mepmegalen nâmti waŋgaŋin Kolin msat busiliŋanen ke gapumoti nembet daen mebemti moti mametemien. Mme naman Kolin ke kawa kambuk ikŋakŋen tapme keŋanen amnaŋ sesewat mulup sepem ikŋak ikŋak mamtemien. Kawa kambuk ŋengat keŋan Kawawaŋ sesewatsawien ma ŋengat keŋan nopiom mânep milawatgalen mene sesewatsawien ma kawa kambuk ŋengat nopiom imbi set kileŋgalen. Kogok mme Kolin mka ke mama mimi mgasikgalen sulumsesikgaŋ Kolin am indabulut tapmeyepm Pâlaŋ zapat meluwaŋ kapi kumindaye. Nukŋaŋ notnaŋ Kolin mkaen dapmelaŋge mambien ekŋenmagen sokbeyeen kapigok: Ekŋenaŋ meu nopiom ekŋengat sâpe sâpe zemindamti naman timkot bemkwiti kwiti munduman kobeme dapmelaŋge ekŋengat tuŋguwinanen notnaŋaŋ ke met kwitim nime zezet baŋbaŋaŋmak sokbeye. Notnaŋaŋ nolinaŋgalen mama mimiyet ektekalili mulup omba mbien. Nolin toweweŋaŋ ekŋengat tewalaŋ bembeyet nâmti kumindaye (7:1; 8:1; 12:1; 16:1).
Zet ŋotekŋaŋ temaŋ kapigogaŋ 1 Kolin zapat meluwaŋ keŋan talip:
1:1-9 Pâlaŋ indamukumti zemgwatnaŋ zet notnaŋ zeye
1:10–4:21 Zet atindândâ yaŋ dapmelaŋge kalaŋge
5:1–6:20 Msatgalen mama mimi bekanaŋaŋ dapmelaŋge ekŋengalen nâmkiŋpepeŋin waletme delaŋ zemâge
7:1-40 Pâlaŋ awimbiŋ mamayet zet notnaŋ zeye
8:1–11:1 Keŋ zut palen ku mamayelen; Zisas kwewetaŋ nâmkiŋpemti mamayelen
11:2–14:40 Dapmelaŋge ŋoktik sepem ziboŋ mâti Kawawaŋ sesewatpepeyelen
15:1-58 Zisasiyaŋ gakikiyeengatnaŋ wageyepmti am nâmkiŋpepeŋinmagaŋ kegogak wabep
16:1-24 Pâlaŋ ikŋaŋgat zigok mimiyelen nâŋgeyet zemkawaŋ bemti zemgwatnaŋ mindamti eksem mamayet zemindeye
1
1 Pâl neŋ Kawawaŋaŋ ikŋaŋ nânganok Zisas Kilaisiyaŋ buŋam zapatnaŋ zempalakŋaŋ bembeyelen annaŋ nakumtetiye ma ningat notn nâmkiŋpepeŋaŋmak kwitnaŋ Sosenes 2 nit meluwaŋ kapi kumti Kawawaŋgalen am nâmkiŋpepeŋinmak Kolin mka teman mamaip ingat kumbemalu kozin. Kawawaŋaŋ in Zisas Kilaismak tusumindemti mme teŋ kwapme iknaŋgat zapat etaŋ mamayet indakumtetiye. Kawawaŋgalen Zet Zapat Dolakŋaŋ Penaŋ keyaŋ am sambe msat kataŋ Amobotnaŋŋ Zisas Kilais masesewatpeip ekŋenmagen penaŋ bein ma egaŋ ekŋengalen Amobotnaŋin ma sakam kegogak ningalen Amobotnaŋŋ bein.
3 Bipm Kawawaŋ ma Amobotnaŋ Zisas Kilais egetmagengatnaŋ keŋ taolet ma keŋ sewakŋaŋ inmagen wemti weweyelen mandundulup.
Kolin am ekŋenmagen zet zapat dolakŋaŋgalen penaŋaŋ sokbeye
4 Kawawaŋaŋ in Zisas Kilais nâmkiŋpeme keyepmti egat pembenaŋgat keŋ taolet omba mamimindain. Neŋ Kawawaŋgalen keŋ taoletgat ma kwitnaŋ kwitnaŋ kapiyet egat kan kataŋ wisikŋ zemti mandunduyap. 5 Enenogat in Zisasiyelengapmti Kawawaŋ kwitnaŋ kwitnaŋ sambe in tim mamayelen indaye ke kapigok: in nânâ penaŋ keyelen yaŋaŋ kogogak winde indame nâmbien ma Kawawaŋgalen zet katnaŋ penaŋ ke amgat diindondoyet winde ŋep indayeyaŋ tat indain. 6 Ke Kilaisiyet buŋam zapatnaŋ ingat tuŋguwinan zemkawaŋ bemann keŋinaŋ atam katik mbien. 7 Keyepmti in Kawawaŋgalen Emetak Teŋaŋ taolet yaŋaŋ yaŋaŋ maindain kwep ŋen ku matimalip timti in Amobotnaŋŋ Zisas Kilais bamgat sokbemkawaŋ beme eegalen gulak damuŋ mamip. 8 Ma Kilaisiyaŋ in kegogak bandim mimindeme teŋ mama tapmepme kan delaŋ zenze sokbeween Amobotnaŋŋ Zisas Kilaisiyelen kokot kanen ingat myuŋguŋguŋin ŋen ku aikbe. 9 Kawawaŋaŋ Amobotnaŋŋ Zisas Kilais ekmak pepep bemti mamayet nâmti indakumtetime kobien. Ek zet ŋen zem ŋen zem ku mamin.
Kolin dapmelaŋge ekŋenaŋ kalalaŋ mbien
10 Kilaismagen notnne, neŋ Amobotnaŋŋ Zisas Kilaisiyet kwitnaŋgapmti in golaŋ zet diindoma nâit. In zet mmot mtot mti tuŋguwinan kalalaŋ temaŋ ku sokbak. In keŋ kwep bemti kalalaŋin tazin ke weyaŋme kwep bak. Mme keŋinan ma nânâŋinan tusumti keŋ kwep mamayelen nâwep. 11 Kilaismagen notnne, ingalen tuŋguwinan atindândâ temaŋ tasokbein keyet zapalin ke Koloweyelen sip kwep notnaŋaŋ kot dinome nâmban. 12 Zet zapalin kapigok kot zeme nâmban. Inmagen notnaŋaŋ manzeip, “Nin Pâl egalen am.” Ma notnaŋaŋ manzeip, “Nin Apolosiyelen am.” Ma notnaŋaŋ, “Nin Kepasiyelen* Kapi Pitayet kwitnaŋ ŋen gilik zeleset makuip. am,” manzeip. Ma notnaŋaŋ, “Nin Kilaisiyelen am,” manzeip. 13 Kegok ŋewaŋgut pigok ŋep zenzeyelen Kilaisiyaŋ ikŋaŋ epeemti sambe ku beye. Ma Pâl neŋ ingapmti tewen yomengatnaŋ indatitiyelen ku gakiwan. Ma Pâl nâlen kwilen tusumindemti tu ku zulutindewien.
14 Neŋ inmagengatnaŋ am sambe tu ku zulutindewan yek. Keyet neŋ nâma ŋep bein. An zut Kilipusmak Gaias eget etaŋ zulutidewan. 15 Keyepmti inmagengatnaŋ ŋenaŋ, “Pâlgat kwitnanen tu zulutgeyap,” ŋep ku zenzeyelen. Egaŋ kegogak, “Neŋ egalen zapat,” ŋep ku zenak. 16 Neŋ Stiwen ma an notnaŋ egalen mkaen matalip ekŋen tu zulutindewan ke nâmtalap. Yaŋgut am notnaŋ tu zulutindewan ma yek ke ku nâmâtâtindeyap 17 enenogat neŋ Kilaisiyaŋ am tu zulutindendeyet ku zemneŋge. Egaŋ Kawawaŋgalen Zet Zapat Dolakŋaŋ Penaŋ zemkawaŋbembeyelen mulup ke naŋge. Yaŋ neŋ am nânâŋin temaŋ ekŋenaŋ manzeip kegok am ku maapitilimindeyap. Neŋ belak Kilais tewen kumasasokpewien zapat ke amnaŋ nâmkiŋpepeyelen mandiindoyap enenogat zet zapat ke ikŋaŋgat windeŋaŋ omba penaŋ tasain.
Kawawaŋaŋ amgat set maweyaŋzin ke ŋoktik dolakŋaŋ penaŋ
18 Am waleletgalen mama mimi tapmip ekŋenaŋ Zisasiyet gakikiŋaŋgat buŋam zapat diindomann ekŋenaŋ nâme belakŋaŋ penaŋ mambein. Yaŋgut am yomengatnaŋ indatetitiŋaŋ ekŋengat buŋam zapat ke diindoman kemageset keŋinan Kawawaŋaŋ ekŋenmagen mulupmaŋ windeŋaŋbeŋ mamm. 19 Kawawaŋgalen Zet Itnaŋaŋ meluwaŋ ŋen pigok mimiŋaŋ tazin,
“Neŋ am ŋoktikŋin temaŋ ekŋengalen nânâŋin mtot indewap. Ma am ŋoktik sambe ma otnâip ekŋen ŋoktikŋin peŋ pema mebe.” (Aizaya 29:14)
20 Mti amnaŋ nâme ŋoktik temaŋ mambein ke Kawawaŋaŋ mapeŋpeme mezin. Kelak egaŋ am nânâ omba manâip ekŋengalen nânâ ke ku matimti zein. Egaŋ, “Am Zuda ekŋengalen zii zet nânup,” manzeip ekŋengalen nânâ ke ku matimti zein. Egaŋ am zelaŋ auuyelen weyaŋti manzeip ekŋengalen zet ke mapemewen.
21 In nâit, am Kawawaŋgalen Zet Zapat Dolakŋaŋ Penaŋ ku manâmkiŋpeip ekŋenaŋ Kawawaŋgalen ŋoktik temaŋ penaŋ ke nâme zet kilom mambein. Mme ekŋenaŋ ilinaŋgat ŋoktikŋinaŋgat Kawawaŋ ku nâmâtâtpewien. Yaŋgut Kawawaŋaŋ am Kilais nâmkiŋpewien ekŋen ombemindemti yomengatnaŋ indatitiyet egalen Zet Zapat Dolakŋaŋ Penaneset nin manzemkawaŋ benup keyaŋ am Kawawaŋgat zapat maaŋgalaŋindein. 22 Zuda am ekŋenaŋ menok yaŋaŋ yaŋaŋ eegalen ŋoktikŋin temaŋ keeset bemti matalip. Ma am Zuda maŋgeengatnaŋ ku sokbembeŋaŋ ekŋenaŋ nânâ temaŋmak mamayet ŋoktikŋin keeset mambeip. 23 Yaŋgut nin Zisas tewen kukuŋaŋ keyet zapatnaŋ manzemkawaŋ benup. Mme Zuda am ekŋenaŋ Kilais tewen gakiye keyet zapatnaŋ nânâyet ŋenzinziŋ mamip ma am Zuda maŋgeen ku sokbembeŋaŋ ekŋenaŋ nâme zet ke kilom mambein. 24 Yaŋgut Kawawaŋaŋ Zuda am notnaŋ ma am Zuda maŋgeen ku sokbembeŋaŋ notnaŋ ikŋaŋgat zapat bembeyelen indamandaye ekŋenaŋ Kilaisiyelen buŋam zapat zemkawaŋ beme nâmti ekŋenaŋ Kawawaŋgalen windeŋaŋ am yominangatnaŋ matimkwatindein ke maegip ma nânâŋaŋ temaŋ am walelelen ku mebegalen manâin ke kegogak maegip. 25 Am ekŋenaŋ Kawawaŋgalen zet keyet kilom zeme keyaŋ naman egalen nânâyaŋ amgalen nânâ masebempein. Ma Kawawaŋgat an windeŋaŋ isikŋaŋ bugan nâme keyaŋ naman egalen windeyaŋ amgalen winde masebempein.
26 Ke neŋ pigok nâyapgat zema nâit: Kilaismagen notnne, in ewe ikŋaŋgat zapat ku indakum tetiyeen baen kan keyet in sambe notnaŋ nânâmak ku mambien ma notnaŋaŋ kogogak windemak ku tabien ma notnaŋ kwizet buŋammak ku mambien. 27 Am msat palengatnaŋaŋ anŋine ŋoktik temaŋinmak maombem indeip yaŋgut Kawawaŋaŋ am ŋoktikŋin temaŋmagaŋ sakambuk mimiyelen nâmti keyepm am tototnaŋ penaŋ ke ikŋaŋgalen mulup mimiyelen maonzemindein. Ma am windeŋinmak ekŋenaŋ sakambuk mimiyelen nâmti keyepm am ekŋen windeŋinpiŋ mamaip ke Kawawaŋaŋ maonzemindein. 28 Mme Kawawaŋ ŋep kwitnaŋ kwitnaŋ sambe am msat kapiyetnaŋaŋ nâme mobotnaŋ mambein ke asesekgalen manâin keyepm egaŋ am tototnaŋ maŋgeengatnaŋ ma am msat kapiyetnaŋaŋ nâme ekŋen am tototnaŋ bembeŋaŋ ma ekŋengat kogogak nâmindeme belakŋaŋ penaŋ bembeŋaŋ ke ombemindeye. 29 Msalen am ŋenaŋ Kawawaŋgat zikatnan sek mmobot mnakgapmti Kawawaŋ yaŋaŋ kegok mamimindain. 30 Kawawaŋaŋ ikŋaŋgat ŋoktikŋaŋgalak in indatetimti Zisas Kilaismak tusumindeye ma Kawawaŋaŋ mme Kilaisiyaŋ ningalen ŋoktikŋ beye. Mti Kilaismageset in Kawawaŋaŋ ikŋaŋgat zapat mamayet ma yomengatnaŋ timkwat indemti teŋ mamayet ombemindeye. 31 Keyepmti Kawawaŋgalen Zet Itnaŋaŋ meluwaŋ pigok mimiŋaŋ,
“An ŋenaŋ ikŋaŋgat sekŋaŋ ku mobe. Amobotnaŋaŋ mulup mge keyet nâme mobe.” (Zelemaia 9:24)