1 Niiꞌnaꞌmung tee Jiisuuꞌ tee nuaruꞌ Kaaleliꞌnaruꞌ dueꞌke donkonuioꞌ nantoong mmauꞌ porora paampaꞌaakoꞌ kara Kumponing bakaang taara-koo. 2 Eeꞌnoko teie teka kerenta bakaasining oovukoꞌ nuaruꞌkoo tapirua taviꞌ baranukai sipaara biikaning sionung duuꞌpaako. 3 Nareng-koo teing-koo bakaasi-koo Saimoniꞌ bakanareng-koo aaꞌearara Saimoniꞌ niaꞌuma aaꞌpuuꞌ, “Daampeto okiꞌnooꞌ naroꞌ tuuꞌei mereai.” Eeꞌnoko teie tuuꞌuioꞌ teꞌ bakaasi-koo baꞌnanui nau-antavuruꞌnung nantoong tereng-eta.

4 Eeꞌnoko kara bakearako teie Jiisuuꞌke Saimoniꞌ aaꞌpuuꞌ, “Kankonooꞌ danto beꞌantavera dakaang sionung doonko duaꞌeai taviꞌ barang-koo.” 5 Eeꞌnoko Saimoniꞌke makuꞌuma aaꞌpuuꞌ, “Ovoring, niiꞌ poreꞌmoring ookutunaꞌmung muunga. Konkampiaꞌ, teka botomeinaꞌkoo dake ninge doonko duaꞌampaing tee sionung.” 6 Eeꞌnoko teinge teeꞌ nkoaara taviꞌ uumono˜ oraura˜ avoꞌaaruꞌ; 7 Eeꞌnoko biikaang sionung dererereꞌarako biikaning mantaꞌnanka birenge bokuaaruꞌnung oovunareng-koo otorokoꞌning porora pakuaariiꞌnaang. Eeꞌnoko teing porora ookeng bakaasining maantoꞌaara dapiꞌ minkiarikoꞌ.

8 Teka Saimoniꞌ Piitai oovura tee, asikovura Jiisuuꞌkoo kauꞌkanooꞌ kinkinura aaꞌpuuꞌ, “Ovoring ee, ning naning orara, daꞌkoo dueꞌ otoꞌkoo makosi deeaꞌ.” 9 Teing ookara Saimoniꞌ baꞌmaikoriꞌ nariꞌ asikovuruꞌ teing taviꞌnanka barampaaruꞌning ooaarira. 10 Jeemisi namainta Jooni napoꞌ nariꞌ, Sebetiꞌ baurinketa, Saimoniꞌ ninka nariꞌ mantaꞌka taviꞌ barang-koo. Eeꞌnoko Jiisuuꞌke Saimoniꞌ aaꞌpuuꞌ, “Aroreaukaꞌnung. Enang-eta deto dake nantoong baramperimatooꞌnaang.” 11 Eeꞌnoko tenang teinge teing biikaning bakaasinanka tapiru duumeaarira˜ ookara kapooꞌ sipaarira teinge tee siompauꞌ.

12 Jiisuuꞌ niiꞌnavuntuꞌkoo teing-koo osinanka-koo otoko naning narung pouꞌ oramuuꞌke maantoꞌ. Eeꞌnoko tenang Jiisuuꞌ oovura tee kinkinura eentavaruꞌ tee-koo, aaꞌpuma, “Ovoring, daꞌ piarora deekoꞌ dake ning kuimepeuꞌnung.” 13 Eeꞌnoko Jiisuuꞌke bireng tovoroꞌarara kompuuꞌ tee, aaꞌpuma, “Piamoi otong. Enang kuiraring!” Eeꞌnoko namuꞌke tee oramuuꞌke sipuuꞌ. 14 Eeꞌnoko Jiisuuꞌke naning nau-koo orokovura aaꞌpuuꞌ, “Bera piristiꞌkoo siraꞌantararavaing eeꞌnoko boontunang nkoveai daꞌ nantoong dueꞌkoo untuꞌanta-koong Moosesi bakaang botoi minkuvumanaꞌ.”

15 Teka teeꞌ minkuvuioꞌ baruꞌ aaꞌnooꞌ doorenang bereravari nanuuꞌnung tee-koong, eeꞌnoko mmauꞌ nantoong porouꞌ taara-koo eeꞌnoko taare-anta nka-koo biikaning siipananka-koo. 16 Teka niiꞌning batei-koo meeꞌboraꞌ sirakamaaꞌkoo nantoong-eta tontaꞌarama teke kunsiarakoꞌ.

17 Niiꞌnaꞌmung teroong-koo Jiisuuꞌ nau-antavarako Boto Keperuuꞌnavitu eeꞌnoko boto naunuka teke dueꞌke baꞌnanai otorokoꞌ ookara osinairu-eta porora aaꞌning-eta: Kaaleliꞌnavaro-ita, Judiaꞌnavaro-ita, eeꞌnoko Jerusalemaꞌketa. Eeꞌnoko Ovoring bakaang purintoꞌ tee ninka otokoꞌ nantoong taare-anta-koo. 18 Eeꞌnoko nantoonge naning narung batanang-koo otoko poꞌantavauꞌ dootavouꞌnung. Eeꞌnoko teinge taung besiꞌaakoꞌ kuung poꞌantavaara Jiisuuꞌkoo uroꞌkanooꞌ beng-koo. 19 Teka karikaꞌke paampaꞌaioꞌ doona ooaavaꞌ tee kuung poꞌanta-koo, eeꞌnoko teinge daukava-koo koinaara teke toꞌbaꞌaara batanang-koo otoko siauꞌnung meuꞌ Jiisuuꞌanko. 20 Eeꞌnoko tenang Jiisuuꞌke teing tee tavoꞌauꞌning biikaang baito oovura aaꞌpuuꞌ tee naning doota, “Aung ee, dakaning orarananka tontaꞌderonsing.” 21 Eeꞌnoko teinge boto naunuka eeꞌnoko Boto Keperuuꞌnavitu˜ aaꞌning ninka nianiaꞌ tutumpauꞌ aaꞌpaama, “Aunge aming-koo Kumponing bauvaupaaꞌumaang? Naning otoaꞌ orara aarumo tontaꞌupeuꞌnung, Kumponing narung deekoꞌ.”

22 Tenang Jiisuuꞌke biikaning nianiaꞌnanka tasiꞌpura teie makuꞌurima aaꞌpuruꞌ, “Diiꞌ aming-koo diikaang domang-koo kuunge teeꞌ munkururarimaang? 23 Arera kara masikaꞌpoaruko ooverira ning makosi deeaung tammeripeuꞌ aaꞌning-koo, eeꞌ minku-koo, ‘Dakaning orarananka tontaꞌderonsing,’ niiꞌnaꞌ eeꞌ minku-koo, ‘Daaꞌdarara naniai.’? 24 Teka diiꞌke iroꞌ noruꞌmeriiꞌnaang ning Tee Naning-naumpoꞌ Paning-etaing tee purintoꞌ otoꞌmemuing anke kansiꞌkoo oꞌnoi orarananka tontaꞌkoo...” Teeꞌpura tee naning doota aaꞌpuuꞌ, “Ninge aaꞌdamaang, ‘Daaꞌdarara dakaang taniꞌ nkavei naniai dakanava-koo.’ ” 25 Eeꞌnoko namuꞌke, ooai otoko, tee daaꞌarara bempari otokoꞌnung taniꞌ deto nkavui bakanava-koo beuꞌ, Kumponing daangampuma. 26 Eeꞌnoko taꞌnintaꞌning noruꞌ paapaaꞌke ookara dakoꞌuruꞌ eeꞌnoko dankurankuꞌarima Kumponing daangampaama aaꞌpauꞌ, “Niiꞌke eꞌmung kapooꞌ damisimainanka ooampiring.”

27 Teketa tee kato tenkenura Jiisuuꞌke naning taakisi-nka-nung oovuuꞌnung miring Liivaiꞌ,* Aung Liivaiꞌ tee niiꞌnooꞌ miring Maatiuꞌ, teing-koo narung Jiisuuꞌkoo daariauꞌning. taakisi nkavaakoꞌnava-koo baꞌnanuioꞌ bakanavaro-koo. Teketa Jiisuuꞌke aaꞌpuuꞌ, “Ning siomeai.” Eeꞌnoko Liivaiꞌke ookara kapooꞌnanka sipura, deto donkonura tenang-eta deto tee siompui nanuuꞌnung. 28 (-) 29 Eeꞌnoko Liivaiꞌke bakanava-koo paroro pankaing nkoevuuꞌnung Jiisuuꞌ. Eeꞌnoko teke karinga taakisi nkanuka ninka napoꞌ niiꞌning oovuning ninka nariꞌ otorokoꞌning teing ninka eeꞌning ninka nariꞌ baꞌnaniauꞌnung taamantomai. 30 Eeꞌnoko teing Boto Keperuuꞌnavitu biikaning boto naunuka ninka minkuminkuaarikoꞌ bakaning barevare-nupoong-koo aaꞌpaama, “Diiꞌ aming-koo nariꞌ taamanirimaang taakisi nkanuka eeꞌnoko nantoong orenanka ninka nariꞌ?”

31 Eeꞌnoko Jiisuuꞌke makuꞌurima aaꞌpuuꞌ, “Teing nantoong tampaꞌ otoroining naninge nankaiꞌuriiꞌnaang piavoroaꞌ, teka teing siipavoromaing naing piavoromaung. 32 Ning nantoong tampenanka-anko moaꞌ. Ning orenanka-koo mouꞌnung nauaranko bereꞌariaꞌnaang.”

33 Eeꞌnoko teinge Jiisuuꞌ aaꞌpauꞌ, “Jooni bakaning barevare-nupoong amutemuꞌke unkumoarimaung kunsi ninka, eeꞌnoko Boto Keperuuꞌnavitu biikaning barevare-nupoong teeꞌ nariꞌke, teka daꞌ dakaning nai narung-koo otoromaung tuaamparima.” 34 Eeꞌnoko Jiisuuꞌke makuꞌurima aaꞌpuruꞌ teing, “Diiꞌke ee teing baraneeꞌnavitu nampeesi-koo poromaing unkumo-antaverereripeuꞌ tenang tee nampeesinara nariꞌ otoroko teing ninka? 35 Otong niiꞌning doong tee nampeesinara teing-eta tontaꞌaravainaꞌmung. Eeꞌnoko tenang teing doong-koo unkumoariaing.”

36 Eeꞌnoko Jiisuuꞌke kara dikitoꞌ nauvuruꞌnung napoꞌ, aaꞌpuma, “Naninge nerakaraꞌkoo mononopaꞌnaraꞌkoo niiꞌnooꞌ dereꞌura urikaraꞌ ninka naroꞌka pateꞌuarupeuꞌ. Teeꞌ nkovuaing deekoꞌ tee tamung orarivuuꞌnaang teraꞌ nerakaraꞌ dereꞌuinaraꞌ urikaraꞌ ninka pateꞌkoo makotuaꞌnaraꞌ ninka. 37 Eeꞌnoko napoꞌ naninge nerakaruꞌ uaininaruꞌ urikaroꞌkoo kooꞌuarupeuꞌ. Teeꞌ nkovuaing deekoꞌ teruꞌke nerakaruꞌke urikaroꞌ taꞌdaꞌpura piamparapeuꞌ eeꞌnoko teroꞌ tee urikaroꞌ oraruꞌkuainaroꞌ. 38 Teka nerakaruꞌ uaininaruꞌ tee nerakaroꞌkoo kooꞌuaing. 39 Eeꞌnoko napoꞌ naninge urikaruꞌ uaininaruꞌ naivura nerakaruꞌkoo piavoarupeuꞌ aaꞌpuma, ‘Urikaruꞌ aruꞌ tamparuꞌ.’ ”