ଥେସଲନିକୀୟମାନଙ୍କ ନିକଟକୁ ପାଉଲଙ୍କ ପ୍ରଥମ ପତ୍ର
ଥେସ୍ଲନିକା ବିଶ୍ୱାସୀକତାଃତେ ପ୍ରେରିତ୍ ପାଉଲୁସ୍ଆଃ ପାହିଲା ଚିଟାଉ
ପାରିଚାଏ
ପ୍ରେରିତ୍ ପାଉଲୁସ୍ ଥେସ୍ଲନିକା କାଲିସିୟାତେ ନେ ଚିଟାଉ ଅଲାକାଦାଏ ୧:୧ । ନେ ଚିଟାଉ ଥେସ୍ଲନିକା କାଲିସିୟା ନାଙ୍ଗ୍ ପାଉଲୁସ୍ଆଃ ପାହିଲା ଚିଟାଉ ତାନାଃ । ନେଆଁଁ ୟୀଶୁ ଖ୍ରୀଷ୍ଟ୍ଆଃ ଜାନାମ୍ ତାୟମ୍ ୫୧ କରେ ଅଲାକାନା । ପାଉଲୁସ୍ ଚିମ୍ତା କରିନ୍ଥି କାଲିସିୟାରେ ତାଇକେନାଏ, ଇମ୍ତା ନେ ଚିଟାଉ ଅଲାକାଦ୍ ତାଇକେନାଏ । ନେ ଚିଟାଉ ଅକନ୍ କାଲିସିୟାକେ ଅଲାକାଦ୍ ତାଇକେନାଏ, ଏନା ଇନିଃ ବାର୍ସାତେ ମିସ୍ନାରି କାମି ହରାସେନ୍କେନ୍ ଇମ୍ତା ନେ କାଲିସିୟାକେ ବାଇୟାକାଦ୍ ତାଇକେନା ପ୍ରେରିତ୍ ୧୭:୧-୧୦ । ଏନା ଚିମିନ୍ ଯିହୁଦୀକ ଆଡଃ ଚିମିନ୍ ସାଅଁସାର୍ ହଡ଼କଆଃ ହରାତେ ହାରାଇଦିକାନା ମେନ୍ତେ ପ୍ରେରିତ୍ ପୁଥିରେ କାଜିକାନା ।
ପାଉଲୁସ୍ କାଲିସିୟା ବାଇକେଦ୍ ତାୟମ୍ତେ ଥିମ୍ବା ମାହାଁ ଥେସ୍ଲନିକାରେ କାଏ ତାଇନ୍ ଦାଡ଼ିୟାନା । ଏନାତେ ଟୁଣ୍ଡୁରେ ଏନ୍ତାଃରେ ମେନାକ ବିଶ୍ୱାସୀକକେ ଜୀଉରେ କେଟେଦ୍ ଏମାକ ନାଗେନ୍ତେ ନେ ଚିଟାଉ ଅଲ୍କୁଲ୍କେଦାଏ । ମିଆଁଦ୍ ଖ୍ରୀଷ୍ଟିୟାନ୍କେ ଚିଲ୍କା ଜୀହିଦ୍ ଲାଗାତିୟାଁ, ନେ ଚିଟାଉରେ ପୁରାଃ ବିଷାଏ ଆଡଃ ଏଟାଃ ଏଟାଃ ଚିମିନ୍ ଆନ୍ଚୁକ ମେନାଃ ।
ପାଉଲୁସ୍ଆଃ ଆଡଃମିସା ହିନିଜୁଃ ବିଷାଏରେ ଅଲାକାନା । ହବାସାକାଅଆଃ ଥେସ୍ଲନିକା କାଲିସିୟାରେନ୍ ବିଶ୍ୱାସୀକ ପୁରାଃତେ ନେ ବିଷାଏରେ ଚିହୁଲ୍କେଦ୍ତେ ତାଇକେନାକ । ପାଉଲୁସ୍ ୟୀଶୁଆଃ ଆଡଃମିସା ହିନିଜୁଃକେ ନେଲ୍କେଦ୍ତେ ପାର୍ମେଶ୍ୱାର୍କେ ସୁକୁଇଚି ଲେକା ଜୀଦାନ୍ ବିତାଅ ନାଗେନ୍ତେ ଉଦୁବାଃଏ ୫:୬-୮ ।
ପୁଥି ଭିତାର୍ରେ ତାଇକାନ୍ କାଜି
୧. ପାଉଲୁସ୍ କାଲିସିୟାକେ ଜହାର୍ ଆଡଃ ପାର୍ମେଶ୍ୱାର୍କେ ଧାନ୍ୟାବାଦ୍ ଏମ୍କେଦ୍ତେ ନେ ଚିଟାଉରାଃ ଏନେଟେଦ୍ ହବାକାନା । ୧
୨. ତାୟମ୍ତେ ଇନିଃ ତୀମଥି ଆଉୱାକାଦ୍ କାଜି ଆଡଃ ଆୟାଃ କାମି ବିଷାଏରେ କାଜିକାଦା । ୨–୩
୩. ପାଉଲୁସ୍ ଆଚୁକାଦାଏ ଯେ, ଖ୍ରୀଷ୍ଟିୟାନ୍କ ଚିଲ୍କା ୟୀଶୁ ଖ୍ରୀଷ୍ଟ୍ଆଃ ଆଡଃମିସା ହିନିଜୁଃରେୟାଃ ମାର୍ସାଲ୍ରେକ ତାଇନା । ୪:୧–୫:୧୫
୪. ପାଉଲୁସ୍ ଆଡଃମିସା କାଲିସିୟାକେ ଜହାର୍ ଆଡଃ ଇନ୍କୁକେ ନେ ଚିଟାଉକେ ପାଢ଼ାଅ ଲାଗାତିଙ୍ଗ୍ୟାଁଃ ମେନ୍ତେ କାଜିଟୁଣ୍ଡୁକେଦା । ୫:୧୬-୨୮
୧
୧ ✡ ୧:୧ ପ୍ରେରିତ୍ ୧୭:୧.ଆବୁଆଃ ଆପୁ ପାର୍ମେଶ୍ୱାର୍ ଆଡଃ ପ୍ରାଭୁ ୟୀଶୁ ଖ୍ରୀଷ୍ଟ୍ରେ ତାଇକାନ୍ ଥେସ୍ଲନିକା କାଲିସିୟାରେନ୍ ହଡ଼କତାଃତେ ପାଉଲୁସ୍, ସିଲାସ୍ ଆଡଃ ତୀମଥିଆଃ ଚିଟାଉ ।
ସାୟାଦ୍ ଆଡଃ ଜୀଉସୁକୁ ଆପେରେ ହବାଅଃକା ।
ଥେସ୍ଲନିକାରେନ୍କଆଃ ଜୀଦାନ୍ ଆଡଃ ବିଶ୍ୱାସ୍
୨ ଆଲେ ସବେନ୍ ଇମ୍ତା ଆଲେୟାଃ ବିନ୍ତିରେ ଆପେକେ ପାହାମ୍ପେତାନ୍ଲଃ ପାର୍ମେଶ୍ୱାର୍କେଲେ ଜହାରିତାନା । ୩ ଚିୟାଃଚି ଆଲେ ଆବୁଆଃ ଆପୁ ପାର୍ମେଶ୍ୱାର୍ଆଃ ସାମ୍ନାଙ୍ଗ୍ରେ ଆପେୟାଃ ବିଶ୍ୱାସ୍ରାଃ କାମି ଆଡଃ ଆପେୟାଃ ଦୁଲାଡ଼୍ତେ ଅଡଙ୍ଗ୍ଅଃତାନ୍ କେଟେଦ୍କାମି, ଆଡଃ ଆବୁଆଃ ପ୍ରାଭୁ ୟୀଶୁ ଖ୍ରୀଷ୍ଟ୍ରେ ଆସ୍ରାଏତାନ୍ ଆପେୟାଃ ସାହାତିଙ୍ଗ୍ ଜୀଦାନ୍କେଲେ ପାହାମାକାଦା । ୪ ହେ ହାଗା ମିଶିକ, ଆଲେ ସାରିତାନାଲେ, ପାର୍ମେଶ୍ୱାର୍ ଆପେକେ ଦୁଲାଡ଼୍ପେତାନା ଆଡଃ ଆୟାଃ ହଡ଼ ହବାଅଃ ନାଗେନ୍ତେ ଆପେକେ ସାଲାକାଦ୍ପେୟା । ୫ ଚିୟାଃଚି ବାଚାନ୍ତେ ଏସ୍କାର୍ କା ମେନ୍ଦ ପାବିତାର୍ ଆତ୍ମାରାଃ ପେଡ଼େଃତେ, ସୁକୁକାଜିରେୟାଃ ସାନାର୍ତି ପୁରା ସେକାଡ଼୍କେଦ୍ତେ ଆପେତାଃତେ ସେଟେର୍ୟାନା । ଆଲେ ଆପେଲଃ ତାଇନ୍ ଇମ୍ତା ଆପେୟାଃ ବୁଗିନ୍ ନାଗେନ୍ତେ ଚିଲ୍କା ଜୀଦାନ୍ ବିତାଅ ତାଇକେନାଲେ ଏନା ଆପେ ସାରିତାନାପେ । ୬ ✡ ୧:୬ ପ୍ରେରିତ୍ ୧୭:୫-୯.ଆଡଃ ଆପେ ଆଲେକେ ଆଡଃ ପ୍ରାଭୁକେ ଅତଙ୍ଗ୍କାଇ ତାଇକେନାପେ, ଆଡଃ ଆପେ ପୁରାଃ ଦୁକୁ ସାହାତିଙ୍ଗ୍ତାନ୍ରେୟ ପାବିତାର୍ ଆତ୍ମାଏତେ ହିଜୁଃତାନ୍ ସୁକୁରାସ୍କାଲଃ ଏନ୍ ସୁକୁକାଜିକେ ସୁକୁରାସ୍କାଲଃ ତେଲାକାଦ୍ ତାଇକେନାପେ । ୭ ନେ ଲେକାତେ ଆପେ ମାକିଦନିଆ ଆଡଃ ଆଖାୟାରେ ତାଇନ୍ତାନ୍ ସବେନ୍ ବିଶ୍ୱାସୀକଆଃ ନାଙ୍ଗ୍ ନାମୁନା ଲେକାପେ ହବାକାନ୍ ତାଇକେନା । ୮ ଆପେତାଃଏତେ ଏସ୍କାର୍ ପ୍ରାଭୁଆଃ ସୁକୁକାଜି ମାକିଦନିଆ ଆଡଃ ଆଖାୟାରେ ଉଦୁବ୍କାନା ଏନା କାହାଗି, ମେନ୍ଦ ଆପେ ପାର୍ମେଶ୍ୱାର୍ତାଃରେ ବିଶ୍ୱାସ୍କାଦ୍ କାଜି ସବେନ୍ତାଃରେ ଉଦୁବ୍କାନା, ଏନାତେ ନେ ବିଷାଏରେ ଆଲେକେ ଆଡଃ ଆଦ୍କା ଜେତ୍ନାଃ କାଜି କା ଲାଗାତିୟାଁ । ୯ ଆଲେ ଆପେତାଃତେ ସେନ୍ ଇମ୍ତା ଚିଲ୍କା ଆପେ ଆଲେକେ ଦାରମ୍କେଦ୍ଲେୟାପେ, ଆଡଃ ମୁରୁତ୍ ସେୱାକେ ବାଗିକେଦ୍ତେ ଆପେ ସାର୍ତି ଆଡଃ ଜୀନିଦ୍ ପାର୍ମେଶ୍ୱାର୍କେ ସୁସାରି ନାଗେନ୍ତେ ମନ୍ପେ ରୁହାଡ଼୍କେଦା, ୧୦ ଆଡଃ ଚିଲ୍କା ପାର୍ମେଶ୍ୱାର୍ଆଃ ଖିସ୍ଏତେ ଆବୁକେ ବାଞ୍ଚାଅ ନାଙ୍ଗ୍, ଗଜାକାନ୍କଏତେ ଜୀଉବିରିଦାକାନ୍ ଆୟାଃ ହନ୍ ୟୀଶୁଆଃ ସିର୍ମାଏତେ ହିଜୁଃରୁହାଡ଼୍କେ ନେଲ୍ହରା ନାଗେନ୍ତେ ପାର୍ମେଶ୍ୱାର୍ତାଃତେପେ ରୁହାଡ଼୍ୟାନା, ଏନ୍ ସବେନ୍ ବିଷାଏରେ ଏନ୍ତାଃରେନ୍ ହଡ଼କ ଜାଗାର୍ ତାନା ।