Mattup ki Pool yi riiŋe a
Pilemoŋ
Eŋ urzi kʼono ɗoŋ kun tʼoone adda mattup ettiyo
Ette mattup ki Pool yi riiŋe a laŋzayí Pilemoŋ. Yoŋ ti geeger Kolos, yoŋ wede suma adda geeger gette. Wo yʼilliga Pool yi kazita Rabila Majjaanawa maŋ, a kaamiki yʼa ziipe addí a Isa wo yi daaniya urzi kʼIsa. Iŋkino i dʼede wede soo ti diine ɓulagi Pilemoŋ sundí Onezim. Yoŋ geŋ yʼukke okko ti ɗaana galmeegí me, an dʼikkima ti Pool aame yoŋ daŋgay a geeger Room. Pool yi di gizite Rabila Majjaanawa ki Galmeega Isa Almasi, iŋkino Onezim yʼa ziipe addí a Isa.
Pool yi-raaŋiya mattup ette a Pilemoŋ kono yi-tʼise tambobino a Onezim. Geŋ Onezim batum i-dʼetta ti mattup a Pilemoŋ me. Ti kaaga a urzi kʼoogoro Romeŋ geŋ, Pilemoŋ i-dʼede urzi yi-dʼise munɗa wede aa addí i dehu a tukkʼ Onezim me, ise tôwwo toŋ yʼa yi tʼîde. Adda mattup ette Pool yi-dʼoɓe bey a Pilemoŋ kono yʼa ki yʼ wolle Onezim aakede ɓule wede i tʼumbe ye. Yoŋ yi di ruute yʼa yi seeɗa bey sire, kono aŋken̰n̰o kane an a ti gitte kaŋ soo a urzi kʼIsa Almasi me.
1
Toose ki Pool
1 Mattup ette i raaŋiya nuŋ Pool, wede an ni ziiɗa daŋgay kono ni kazita rabila kʼIsa Almasi, ay raaŋiya ti leema Timote. Mattup ette a kee Pilemoŋ leemadey wede ki geyyiso, kee wede naabadiŋ kaŋ soo, 2 wo a zemɓa ɗoŋ ogiyso ti suma kʼIsa a ɓoozá, a teemadiŋ Aapiya, ti Arsip wede a ti giƴƴe ti kine ɗeyyisadiŋ kaŋ soo. 3 Geŋ beeko ti toose ki Meegiŋ Raa ti Galmeega Isa Almasi i koona egguŋ.
Pool yi rootiyo koɗuwo a Raa kono Pilemoŋ
4 Nuŋ daayum adda tondiyadó a Raa gette, sundá ni gi di seɗɗiyo ye, wo ni rootiyo koɗuwo a Raazó, 5 kono nuŋ nʼollige kee daayum kʼa seeɗu zakiɗi a urzi zaapu kʼadde a Galmeega Isa, wo ɗoŋ ki Raa pay kiʼni geyyiso. 6 Nuŋ ni tondiyo Raa kono zaapu kʼaddá a Isa gette, kee kʼa-ti kette ti kaye kaŋ soo. Tode gette tʼa di tʼele elkiyo ere kʼa suune sulɗi ɗoŋ pay majjanɗani a urzi lekkiyadiŋ ere kettiyo kaŋ soo tʼIsa Almasi. 7 Leema ki nuŋ, nuŋ ulbó uŋse wo oo dʼeliyo toogo kono kee ɗoŋ ki Raa kiʼni giyye, wo kʼan dʼeliyo kooke.
Pool yi tondiyo Pilemoŋ a urzi kʼOnezim
8 Kono kamo beehiyeʼŋ a urzi lekkiyo kettiyo kaŋ soo tʼAlmasi geŋ nuŋ oo dʼede urzi nʼa di roote a munɗa wede kee kʼaase me, 9 ki too maŋ nʼa ki tonde ti geyyiso kʼo dʼise munɗa. Eyye, nuŋ Pool eŋ ni tʼize gôole, wo soŋ nuŋ adda daŋgay kono ni kazita rabila kʼIsa Almasi, 10 iŋkino toŋ ni ki tondiyo kee kʼaase adde beehiye a Onezim* 1.10 Onezim: Tʼono Girek suma ette i-kaza «noogiyo»., yoŋ yi tʼize aa ulo nʼehe adda daŋgay a urzi kʼAlmasi me. 11 Aame ti poone yi ki nuuge ye toŋ maŋ, aŋken̰n̰o yʼaane yʼinni nooge, kee ti nuŋ me.
12 Wo aŋkeŋ nʼa di yʼagiba, yode wede ni yʼ giyye tʼaddó pay. 13 Ki too maŋ nuŋ nʼa yʼooli yʼa lekke a sirpadó, aame nuŋ ɓotto adda daŋgay a urzi Rabila Majjaanawa kʼIsa Almasi geŋ me, kono yʼo di naabe a olɗe kee. 14 Wo ni ki dehu ni ki yʼ boohe ye daa kee ki ki dihe ye me, kono munɗa wede beehiye kee kʼaase an gi di kʼise ki toogo ɗo ye, kʼaase ti ulbe uŋse ɗo.
15 Onezim Raa yi ti yʼ liɗɗe tuddá kʼonniyo miibi koo maŋ, onniyo yi ti yʼ gima sirpadá maŋ yʼa lekkey ki daayum. 16 Aŋken̰n̰o yoŋ aa ɓule ye, yi jiire ɓule. Yoŋ aŋkeŋ yi tʼize leema wede kʼoon̰iso. Nuŋ ni yʼ giyye ɓaadaŋ wo a kee yʼa tʼisey wede kʼoon̰iso a ceerey sey, kono yoŋ leema a urzi tudde wo leema a urzi kʼAlmasi.
17 Aame ki ni zuune nuŋ laŋzayá maŋ, yoŋ ki yʼ sooɗoy aa ki seeɗu nuŋ batum. 18 Wo aame yʼa ize ulsuko, koo yi ziiɗa munɗazá toŋ maŋ, kʼoolo a ekki nuŋ. 19 Ki wollo a raaŋiya eŋ nuŋ Pool ti beezó: munɗa wede Onezim yʼa di tʼela geŋ a di yʼ tʼela nuuno, wo ɗe kee toŋ kʼelko a-dʼede see a eedá? Ɗerec, kee toŋ tʼurzi nuuno ɗoo miŋ kʼa ziipe addá a Isa Almasi kollo. 20 Ki kotto leema ki nuŋ, tʼurzi geyyiso ere ki Galmeega, addó kʼo tiʼn asso, kono kine sirwiŋ pay miŋ in lekkiyo kettiyo kaŋ soo tʼAlmasi.
21 Nuŋ ni suune nʼa raaŋiya eŋ naabo ere ni ki tondiyo ette kʼo ti tʼisa, wo ni suune kʼaasa naabo a ceera ere ni ki tondiyo ettiyo sey. 22 Wo soŋ ni ki tondiyo: Kee kʼo okkoŋ ume moone. Nuŋ nʼettiyo, kono nʼelkiyo tondiyaguŋ a Raa gette yoŋ yʼollige, saŋ maŋ an diʼn aɗɗa nʼun diʼn tʼooney.
Ono ɗoŋ ki ɗaŋgu
23 Epapiras yoŋ adda daŋgay ti nuŋ kono ay kazita rabila kʼIsa Almasi, yʼa-tʼize toose. 24 Markus, Aristarko, Demas wo Lik ɗoŋ ay naabiya kaŋ soo eŋ, an a-tʼize toose pây.
25 Iŋkino maŋ beeko Galmeega Isa Almasi ti koona egguŋ.