1 Isa yʼan di ruute a sanalliyagí, yʼede: «Ɗerec, kane sulɗi daayum ede ɗoŋ i-tʼeliyo ɗuwo adda kʼolɗiko me, wo ɗe dabar a yode wede i tʼeliyo bakadí adda kʼolɗiko. 2 A wede iŋkino geŋ, dabar ere an i di kette assa meeda a golladí an ti yʼ seɗɗe adda bar gette, soodo sey ti ere yi tʼooney a ɗaana Raa te, aame yi tʼeliyo adda kʼolɗiko wede soo ti diine kane ɗoŋ tasse a urzi zaapu kʼadde a nuuno maŋ. 3 Kun koona mentikagi!

Aame leemadá yi tʼiza olɗiko a kee maŋ, kʼodo ki yʼoonoy, ki rootoy munɗa wede yʼa ize geŋ ti golla ere tasse, wo aame yi-kʼilligey olɗikadí yi ti zuuney yi-gimey lekkiyadí maŋ, kʼoyyo ki tʼiso tambobino te. 4 Wo aame leemadá yi tʼiza olɗiko a kee wo saŋ yʼa iido ki tuddá, yʼa tʼeese: “Leema ki nuŋ, nuŋ olɗikadó ni ti zuune nʼa-kime lekkiyadó”, iŋkino iŋkino adda kʼon̰n̰u taŋ sarat toŋ maŋ, kʼoyyo ki tʼiso tambobino te.»

5 Ɗoŋ zina Galmeega an i di ruute, anʼde: «Zaapu kʼaddey a kee baata, kʼayni noogi tʼa tʼihira.» 6 Galmeega yʼa ruute, yʼede: «Ki kotto, aame kune zaapu kʼadduguŋ a nuŋ tʼaase n̰eŋko aa ulo kʼundumu sundí mutard toŋ maŋ, kun aane kun i di roote a undumu eŋ, kun tʼeese: “Tʼumayá eŋ ki-ɗeeto ki koonoy adda bar”, ki kotto yʼa olliga onamguŋ, yʼa-ɗeete.»

7 «Kun ollo, aakede wede soo ti diinaguŋ i-dʼede wede naabo yi derku ise yʼelso mooɗe koo maŋ. Aame yi wulle wede naabo yʼaahiya ti doome maŋ, ki kotto yi-ki roote ye: “Kesiko kʼokki ki-koona omɓo me.” 8 Ki too maŋ yi di roote, yʼa tʼeese: “Kʼo isi omɓo, wo kallagá kʼa booyo ki-tʼossi ɗoŋ ti doolo, omɓo kʼo dʼeli, kʼo dʼeeli soɓo koore ni tʼiima wo nʼaa tʼiiɓa maŋ. Saŋ a kaaɓadá kee kʼa ooma wo kʼa siɓa kollo.” 9 Wede geŋ yi roota ɗey koɗuwo a wede naabadí, a naabo ere yi ruute yʼaase, yi tʼize gette? Aha, yi-ki roota ye koɗuwo me. 10 Geŋ ki kune toŋ iŋkino: Aame naabaguŋ ere an un ruute kun ti tʼize pay maŋ, kun rooto kunʼde: “Kaye ɗoŋ naabo ay kʼede urzi ɗuwo an ay ki roote koɗuwo ye, ay ize munɗa wede an ay ruute ay dʼise ɗaŋŋal.”»

11 Aame Isa yo a urzi yʼette ki Zeruzalem geŋ, yʼa uɗɗe ti diine siiɗo Samari kane ti Galile. 12 A ettiyadí kʼadda kʼille soo iŋkino gette, ɗoŋ bitiɗe koomat an tʼiide an a di yʼ tʼikkimo. Kane an tʼîhirte ti dokki* 17.12 An tʼîhirte ti dokki: Kane ɗoŋ bitiɗe geŋ an tʼîhirte ti dokki kono di kane Yawudiyagi, ɗuwo anʼni wolliyo kane ɗoŋ bitiɗe geŋ ɗoŋ kamilen̰ ye a ɗaana Raa me. Iŋkino maŋ an kʼede urzi an ki dʼette ki sirpa ɗuwo ye. Kun wollo adda mattup ki Lebitik 13.45-46. 13 wo an dʼiise ɗollite, anʼde: «Isa, kee wede dooyisadey, kʼiso adde koɗuwo a kaye.» 14 Isa yʼanni wulle wo yʼan di ruute, yʼede: «Kunʼdo, tudduguŋ kun an ti kazoy a ɗoŋ seɗeke† 17.14 Kun wollo adda mattup ki Lebitik 14.2-3..» Aame anʼte kʼume ɗoŋ seɗeke ɓotto geŋ, a urzi bitiɗayaŋ a n̰ukkiɗe an tʼize kamilen̰. 15 Wede soo ti diinayaŋ yi wulle yʼuune bee maŋ, yʼa-gime kʼume kʼIsa, yi-tamma Raa ti golla awwa. 16 Yʼiideʼŋ yʼa dikke a zoŋ kʼIsa, yʼa tʼuttile zumayí a siiɗo, wo yʼa ruute koɗuwo a Isa. Wo yo wede geŋ Samariten. 17 Iŋkino Isa yʼa ruute, yʼede: «Kane koomat geŋ an ki tʼize kamilen̰ ye ko? Wo kane ɗoŋ gessat uune bee too me? 18 Wenɗa a elke yʼa-kimo yʼa tʼimme Raa umbo daa ki torgusu en̰n̰o ye maŋ?» 19 Maŋ Isa yi di ruute, yʼede: «Ki tʼoozo, kʼeŋgilo. Kono kee ki ziipe addá a nuŋ geŋ, kʼutte.»

20 Onniyo soo kane Pariziyeŋ an di tunde Isa, anʼde: «Woogo Moziko Raa tʼaana me?» Yoŋ yʼan diʼn gime onamaŋ, yʼede: «Aaniya Moziko Raa, todʼte urzi wede aa munɗa kun gi di wolla tʼersaguŋ ye. 21 Ɗuwo an ki roota ye: “Kun wollo todʼte a en̰n̰o!”, ise “Todʼte a ummey me!” Ɗerec kun suuno, Moziko Raa todʼte a diinaguŋ.»

22 Iŋkino maŋ Isa yʼan di ruute a sanalliyagi, yʼede: «Saŋ onniyo tʼaana ere kun di deha kun ti nʼ wolle onniyo soo toŋ maŋ, nuŋ wede an nʼehe aa ulo wede eŋ me, wo umbo kun ki nʼ wolla ye. 23 Aame geŋ ɗuwo an un di roota, an tʼeesa: “Kun wollo yoŋ a en̰n̰o!”, ise “Yoŋ a ummey!” Wo kune kunʼta ye, kun tʼokkita ye. 24 Wo aa kun wolliyo mizzi yʼomile biɗiɗi i-ti tooriyo kandaane pay geŋ, onniyo ki nuŋ wede an nʼehe aa ulo wede en̰n̰o toŋ, tʼaasa iŋkino kay. 25 Wo ɗe ki poone i dehu nʼa dabire ɓaadaŋ wo ɗoŋ aŋken̰n̰o eŋ an di nʼ kiigira.

26 Munɗa wede ize ti kaaga a ozzinagi ɗoŋ ki Nowe geŋ, a onniytagi ɗoŋ ki nuŋ wede an nʼehe aa ulo wede en̰n̰o toŋ, aasa iŋkino kay. 27 Ɗuwo an dʼomɓo, an soɓo, an seɗɗu ti tuddaŋ bini onniyo ere Nowe yi-tʼiide adda tooko ere meeda a jiire. Maŋ mizzi goole yʼa guppe, ahu an tʼiimi siiɗo, iŋkino ɗuwo geŋ pay an tʼinda adda kʼahu‡ 17.27 Taaya ki Nowe kʼa ti tʼoone adda mattup ki Zenez 6.9–7.24.. 28 Wo soŋ munɗa wede ize a ozzinagi Lot geŋ a aana iŋkino kay: ɗuwo geŋ an dʼomɓo, an soɓo, an dʼowilte, an tʼowilte, an dʼaatiya wo an dʼossige ɓoyɗi. 29 Wo a onniyo ere Lot yi tʼuɗɗe ti geeger Sodom maŋ, Raa ti kandaane yʼa guppe ubali kʼuwwo ti moono ki suupire, an tʼîide ɗuwo pay§ 17.29 Taaya ki Lot kʼa ti tʼoone adda mattup ki Zenez 19.24-25.. 30 Geŋ aasa iŋkino kay a onniyo ere nuŋ wede an nʼehe aa ulo wede eŋ, ni kiza tuddó geŋ me.

31 A onniyo gette, wede yʼa ti gili yi-guune tʼekki daŋgayadí* 17.31 Yi-guune tʼekki daŋgay: I-kaza a siiɗo kʼIzirayel geŋ ɗuwo daŋgayɗayzaŋ geŋ awhizaŋ patal kono a ume muno an a di koliyo tʼeego, an di lekkiyo wo an dʼisiyo naabadaŋ. wo sulɗizí yi iili adda maŋ, yi-ɗeego sokiyo ye, yi tʼombo. Iŋkino kay wede yoŋ adda doome maŋ, yi kima ki ɓoozí ye. 32 Kun elko a taaya kʼere Lot† 17.32 Kun wollo adda mattup ki Zenez 19.26.. 33 Wede yi diha boohiyo tuddí kʼaggadí maŋ, yʼa ti dagga, wo wede yʼiila tuddí kono nuuno maŋ, yʼa tʼutta. 34 Kun ollo, nʼun di rooto, a diɗɗo gettiyo batum ɗoŋ sire an moone oŋgalzaŋ soo, wede soo an di yʼamɓa wo wede soŋ an di yʼoola. 35 Erayi sire an massu kaŋ soo, ere soo an ti tʼamɓa wo ere soo an di tʼoola. 36 Kuuli sire kane adda doome soo, wede soo an di yʼamɓa wo wede soŋ an di yʼoola.» 37 Iŋkino maŋ kane sanalliyagi an di yʼ tunde, anʼde: «Galmeegey, a ume too me aasa me?» Wo yoŋ yʼan di ruute, yʼede: «A ume wede nuune yi tʼudiga geŋ, zumbi toŋ ti tʼogiya aŋgen̰n̰o.»