3
1 Hanuaboi ai, egu mahuta patana ai,
egu lalokau tauna na tahua;
na tahua, to asina davaria,
na boiria, to ia na se haere.
2 Aina tore isi, hanua ai baina loa eva-eva,
ariara ai bona noho-bou gabudia ai
egu lalokau tauna baina tahua.
Na tahua, to asina davaria.
3 Gima taudia ese e davarigu,
hanua ai e loa eva-evava ai;
na tai henidia, nato
“Egu lalokau tauna so itaia a?”
4 Na rakatanidia, bena asi vanahana
egu lalokau tauna na davaria.
Na dogoa tao, asina kahua nege,
ema bona sinagu ena ruma ai,
e havaragu hahinena ena daiutu ai,
na hakaua dae.
5 Ierusalem kekenimui e, na haḡanimuimu,
uda nanidia bona dia daidiai,
uraheni na basio haoa
ela bona sibona baine noga.
*****
6 Una na dahaka, tano ḡaḡaena amo e maimu,
kwalahu dubuna na heto,
mai bonana, muro bona lebona*“Muro” bona “lebona” na Heberu taudia edia muramura mai bonadia ladadia.
bona hoihoi tauna ena muramura mai bonadia ibouboudiai?
7 A itaia, Solomon ena ivitoto,
goada taudia tauratoi-ahui ese e ginia heḡeḡemu!
8 Idia na Israel ena goada taudia,
iboudiai na mai daredia gabadia ai.
Tuari na mai dibadia;
ta ta edia dare na koekoedia ai;
hanuaboi ena hahegari ḡaudia ilao-ahudia.
9 King Solomon ena laolao kalagana na
Lebanon audia amo e karaia.
10 Aena na silver, tabekau kahana na gold;
helai ḡauna iḡovana na dabua kakakakana.
Laloma kahana na e haheraia ḡoevaḡoeva,
Ierusalem kekenidia ese.
11 Siona kekenimui e, a raka lasi;
King Solomon ba itaia.
Ena havava ḡauna be kwarana ai;
ena headava dinana ai,
lalona e moaleva dinana ai,
sinana ese ia kwarana e havavalaia.
*****