1 Taunabunai, lalo-hadai dikadia iboudiai bona koikoi iboudiai bona dibaka karadia bona ere dikadia iboudiai ba nege daure. 2 Lauma ena rata ḡoevaḡoevana ba ura henia, memero karukarudia na heheto; unu amo ba bada oho bada oho, ela bona hahemauri bavabia. 3 Badina be Lohiabada ena harihari-bada vada o mamia toho.

4 Ia dekena aoma; ia na nadi maurina, taunimanima ese e dadaraia, a Dirava ese vada e abia hidi, davana bada nadina ai vada e hataoa. 5 Umui danu bae larebamui dae, mauri nadidia na heheto, lauma ena dubu ai baola, hahelaḡa taumui ai baola, lauma ena boubou ḡaudia ba hahelaḡa, Iesu Keriso dainai Dirava ese baine abi dae ḡaudia. 6 Badina be buka ai ini e torea toma,

9 A umui na e abia hidi besena, hahelaḡa taudia herea-daedia, hanua helaḡana, Dirava ena orea. E abimui hidi, dibura amo e boirimui bona ena diari herea-daena ai e hakaumui lasi tauna ena kara namodia ba gwaurai hedinarai helaoreana. 10 Gunaguna umui na asi besemui, a harihari umui na Dirava ena bese. Gunaguna ta ese se bogamui hisi, a harihari hebogahisi vada o davaria.

11 Egu lalokau taumui e, na noimuimu, umui na noho-hedoa taumui bona laolao taumui na heheto dainai, tau-anina ena heḡahusi karadia basio kara; idia ese lauma e tuari heniamu. 12 A bese idau-idau taudia vairadiai emui kara bae ḡoeva; bena, ena be bae habadelaimui, kara dika taumui bae gwauraimui, to emui kara namo do bae ita dainai idia ese Dirava bae imodaia, iena vadivadi dinana ai.

13 Taunimanima edia taravatu iboudiai ba badina, Lohiabada dainai. Hanua pavapavana ba kamonai henia, badina be ia na herea. 14 Bona gavana taudia, ia ese kara dika taudia ihadikadia bona kara namo taudia ihanamodia totona e siaidia, ba kamonai henidia. 15 Badina be Dirava ena ura be emui kara namo amo kavakava taudia edia hereva kava ba tuidia. 16 Umui na ura kwalimu taumui, to emui ura kwalimu na kara dika dalana ikehona ḡauna ai basio halaoa; Dirava isiaina ba lao heni. 17 Taunimanima iboudiai ba matauraidia. Iseda orea taudia ba lalokau henidia. Dirava garina ba gari. Hanua pavapavana ba matauraia.

18 Hesiai taumui e, biagumui ba kamonai henidia bona ba matauraidia; dia kara namo bona gado namo taudia mo, a daḡedaḡe taudia danu. 19 Badina be ina na mai hahenamona: asi ena kerere tauna ese Dirava ibadinana dainai hisi baine ani. 20 Umui na ba kara dika, bena bae dadabamui negana ai ba haheauka, namona be dahaka? A ba kara namo, bena hisi bavani negana ai ba haheauka, una na mai hahenamona Dirava ena amo. 21 Una dainai e boirimui. Badina be Keriso umui daimui ai e hisihisiva, emui raka dalana e henimui, ia aena gabudia ai ba raka helaoreana. 22 Ia ese kara dikana ta se karaia, bona ia uduna amo hereva koikoina ta se lasi. 23 E ere dika henia, to se hedava. Hisi e ani, to se daḡedaḡe. A Hahemaoro Diravana maoromaorona e abidadama henia. 24 Ia tau-anina ai eda dika e hua, au dorina ai, kara dika enai baita mase bona kara maoromaoro enai baita mauri helaoreana. Ia berona ese vada e hamaurida. 25 Badina be umui na o dobiva, mamoe na heheto; a harihari, laumamui ireḡudia bona ita-taodia Tauna vada o lou henia.