1 Bena David eto, Dirava Iehova ena dubu na iniseni ai baine gini, bona Israel ena ḡole-oho bouboudia patana danu.

2 David e haheḡani, idau bese taudia Israel tanona lalonai na bae haboudia; bena ia ese nadi-utu taudia e haḡaukaradia, Dirava ena dubu ihaginilaina nadidia na bae haḡoeva heḡaegae. 3 David ese danu auri momo herea e habou, raka-vareai iduaradia ikokodia bona hakapu-tao auridia ikaradia totona, bona auri labora-labora momo herea danu, metauna na asi ihahetohona dalana; 4 bona sida audia danu, asi iduahidia, badina be Sidono taudia bona Turo taudia ese sida audia momo herea na David dekena e mailaidia. 5 Badina be David eto, Natugu Solomon na eregabe, bona ḡaukara ai do asine manada, bona namona be Iehova ena dubu hairaina baine herea dae vaitani; harina bona hairaina herevadia na tano idoidiai latadiai bae da'ania; una dainai lau ese baina heḡaeḡaelaia. Taunabunai, David na do se mase ai, ia ese dubu kohuna momo herea e habou guna.

6 Bena ia ese natuna Solomon e boiria, e haḡania, Iehova, Israel Diravana, ena dubu auta baine haginia. 7 David ese Solomon e hamaoroa, eto, Natugu e, lalogu na e ura dubu auta baina haginia nato, Iehova, egu Dirava, ladana ena. 8 A Iehova ena hereva na egu ai e kau, eto: Oi na rara momo vada o hahebubu, bona tuari babada o kara; dubu auta basio haginia lau ladagu ena, badina be rara momo na tano ai vada o hahebubu lau vairagu ai. 9 A itaia, natumu ta baine vara; ia na maino tauna ai bainela, bona lau ese maino baina henia, ana inai taudia iboudiai bogaragidiai. Badina be ladana bae hatoa Solomon;*“Solomon” anina be “maino tauna”. bona iena nega ai lau ese Israel na maino bona laḡa-ani baina henia. 10 Ia ese dubu auta baine haginia, lau ladagu ena. Ia na lau natugu ai bainela, bona lau na ia tamana ai bainala; bona ena pavapava teronona na Israel ai baina haginia ela bona hanaihanai.

11 Taunabunai, natugu e, Iehova ese baine bamomu, bona Iehova, emu Dirava, ena dubu do ba haginia vaitani, ia ese vada e herevalaimu heḡereḡerena. 12 Ḡau tamona, Iehova ese aonega bona lalo-parara baine henimu, bena Israel igunalaina tauna ai baine halaomu negana ai na Iehova, emu Dirava, ena taravatu do ba badinaia. 13 Bena Iehova ese Israel edia taravatu bona hahemaoro herevadia Mose e haḡanilaia ḡaudia na boma badinadia ḡoevaḡoeva negana ai, namomu do baine bada. Ba goada, ba boga auka. Basio gari, basio kudou hetaha. 14 Mai hekwarahi-badagu ida Iehova ena dubu kohudia vada na abi heḡaegae: gold talent domaga-ta,†Domaga-ta = 100,000. Domaga-gwauta = 1,000,000. silver talent domagagwauta, bona auri labora-labora bona auri, asi ihahetohodia dalana badina be momo herea daidiai. Bona au bona nadi danu vada na abi heḡaeḡae. Ini latadiai ma haida bavato kau. 15 Emu ḡaukara taudia na hutuma: nadi-utu taudia, nadi-hagini taudia, kamuta taudia, bona ima-karakara taudia idau-idau, asi iduahidia, 16  gold bona silver bona auri labora-labora bona auri iḡaukaralaidia diba herea taudia. A tore isi, a ḡaukara! Iehova ese baine bamomu!

17 David ese danu Israel lohiadia iboudiai e haḡanidia, idia ese ia natuna Solomon bae durua. Ia eto, 18 Iehova, emui Dirava, na umui ida ani? Ia ese maino vada e henimui kaha iboudiai ani? Badina be ina tano taudia na lau imagu ai vada e atodia, bona tano na vada e hagedaia tari, Iehova mai ena bese taudia ida vairadiai. 19 Harihari mai Ialomui bona daramui ida Iehova, emui Dirava, ba tahua. A tore isi; Dirava Iehova ena gabu helaḡana ba haginia, bena Iehova ena taravatu mauana bona Dirava ena ḡau helaḡadia na Iehova ladana bagunai vada o haginia rumana lalonai bae vareailaidia.